To a tamne (24.03.17)
Hrajkowa pistola w šuli je wčera wulke zasadźenje policije zawiniła. Wjacore dźesatki zastojnikow, tež z wosebitych jednotkow, so wobdźělichu. Swědka bě policiju informowała, dokelž bě widźała, kak wosoba z pistolu do šule w bayerskim Gunzenhausenje dźe. Šulske nawodnistwo bu informowane a wšitcy dyrbjachu twarjenje wopušić. Při přepytanju šule napadny zastojnikam 15lětny hólc, kotrehož zajachu. Kaž so wukopa, měješe wón hrajkowu pistolu při sebi. Za čo ju trjebaše ze zdźělenki njewuchadźa.
Podchłódźeneho nukla je policija w delnjosakskim Stadthagenje wuchowała. Zastojnicy wuhladachu skoćatko w nocy na puću. Dokelž wone po wšěm zdaću chětro zymu mrěješe, sadźichu je na motorowu hawbu, hdźež móžeše so zhrěć. Nukl wostanje nětko w zwěrjatowni, doniž so jeho wobsedźer njepřizjewi.
To a tamne (23.03.17)
Swojeje lubosće k słódkosćam dla ma paduch w Tokiju nětko z chłostanjom ličić. Wón je so do něhdźe 40 běrowow w měsće a wokolinje zadobył. Nimo pjenjez pytaše mjez druhim tež za šokolodu, lodom, pudingom a brěčkami. Dokelž pak je so při zadobywanju zranił, nańdźe policija jeho slědy. Na cholesterin bohata krej jeho skónčnje přeradźi.
Z chětro rozmjerzanej maćerju njeje paduch w bayerskim Nördlingenje zawěsće ličił. Něšto dnjow po tym zo běchu jeje jědnaćelětnemu synej mountainbike pokradnyli, wuhlada wona 18lětneho z nim w conje za pěškow. Žona na městnje reagowaše, hrabny jeho a dowjedźe młodostneho na policajski rewěr. Tam młodostny padustwo přizna. „Mać jědnaćelětneho bě po wšěm zdaću chětro přeswědčiwje jednała, zo je paduch dobro- wólnje sobu šoł“, policija zdźěli.
To a tamne (22.03.17)
Pochowanske předewzaće je mylnje wopačne ćěło pochowało. Tole hakle napadny, jako chcychu so swójbni w Steiermarce z 90lětnym zemrětym rozžohnować. W kašću pak ležeše 86lětny muž, staršeho běchu hižo před třomi dnjemi pochowali. Pohrjebny institut so za zmylk zamołwi, pochowane ćěło zaso wuhrjeba a dowjeze je do krematorija. 86lětneho su na to do poprawneho rowa połožili. Nětko chcedźa kruty protokol wjesć, a jón mataj stajnje dwaj sobudźěłaćerjej podpisać.
Nopawa, z kotrejež běchu 1 000 twjerdych pjenjez wuoperowali, je nětko zemrěła. 25lětna žónka z mjenom Omsin, štož rěka lutowanske swinko, je wčera na sćěhi zajědojćeneje kreje zahinyła. Cyłkownje pjeć kilogramow twjerdych pjenjez měješe nopawa w žołdku, čehoždla njeje hižo płuwać móhła.
To a tamne (21.03.17)
Štóž dyrbi w chinskej stolicy Pekingu na zjawny nuznik a trjeba papjeru za njón, ma najprjedy raz swoje mjezwočo skenować dać. Přičina toho je přiběrace padustwa nuznikoweje papjery. Tomu maja skenery nětko zadźěwać, kaž nowiny pišu. Trjeba-li něchtó krótko za sobu papjeru, ma na nju někotre mjeńšiny čakać. Štóž sej časćišo tajku žada, tomu připrawa hižo žanu njepřewostaja.
Produkciju awtow marki BMW staj dźěłaćerjej w Mnichowskej tworni přetorhnyłoj. Wonaj běštaj so chětro wopiłoj a nimo toho joint kuriłoj. Krótko do kónca pózdnjeje słužby pak wobaj kolaběrowaštaj, na čož kolegojo nuzoweho lěkarja zawołachu. Dohromady 40 mjeńšin tam hižo ničo njeběžeše. Škodu trochuje zawod na srjedźnu pjećcyfrowu sumu.
To a tamne (20.03.17)
Swojeho dwulětneho synka zabyłoj staj kónc tydźenja mandźelskaj w Budyskej dźěćacej kofejowni Valentin na Róžowej. Do toho bě sej swójba z pjeć dźěćimi rjany dźeń w kofejowni popřała. Na dompuću pak nichtó njepytny, zo jedne dźěćo pobrachuje. Hakle doma zwěsćichu, zo dwulětny Lukas w awće njesedźi. Bjezposrědnje na to zawoła nan Budysku policiju. Zastojnicy hólčka nańdźechu a so wo njeho luboznje starachu, doniž njebě swójba zaso zjednoćena.
Wabjenski film za poćehnjenje, hdźež so blondinka a šup z mjenom Tomaš we łožu hrajkatej, je po měnjenju coologiskeje zahrody w Moskwje přejara erotiski. Tuž sej žadachu film hižo njewozjewić a wotpowědne sceny a wobrazy w interneće wotstronić. Coo bě šupa Tomaša za wabjenski film ekstra wupožčił.
To a tamne (17.03.17)
Dźakowano socialnej syći móžeše indiska železnica zašły kónc tydźenja hłódnemu ćěšenkej pomhać. Jej bu zdźělenka žony posrědkowana, kotraž bě w ćahu wobkedźbowała, kak młoda mać sobujěducych podarmo wo trochu mloka za swoje pjeć měsacow stare dźěćko prosy. Tak napisa z pomocu twittera próstwu ministerstwu, kotrež hnydom reagowaše a próstwu železnicy dale pósła. Hižo hodźinu pozdźišo přepodachu maćeri na dwórnišću čerstwe mloko.
7,44 karatow ćežki diamant na swójbnym wulěće namakał je 14lětny młodostny w ameriskim Arkansasu. Rědki eksemplar w hódnoće něšto tysac eurow chce sej pachoł wězo zdźeržeć.
To a tamne (16.03.17)
Kanonu za kokosowe worjechi je policija w Berlinje sćazała. Wčera wozjewi zarjad wobraz pjeć metrow dołheje a dwaj metraj wysokeje metaloweje konstrukcije, kotruž běchu studenća zhotowili. Policiju na nju skedźbnił je wobsedźer psa. Jeho bě tajka třělwa nimale trjechiła. Kaž pak so wukopa, bě konstrukt we wobłuku wuměłskeho projekta nastał.
Nimale zawutleneho wujka bě sobudźěłaćer wotpadkoweho předewzaća w kontejneru za staru drastu na parkowanišću delnjosakskeho Vienenburga našoł. Wón zawoła policiju, kotraž zwěrjatko na městnje z wodu zastara a jemu tak žiwjenje wuchowa. Znata sobudźěłaćerja bě zwólniwa, so wo wujka dale starać. Komu wón słuša a kak je so do kontejnera dóstał, njeje dotal jasne.
To a tamne (15.03.17)
24hodźinsku jězbu z awtom na so wzałoj staj čłonaj Domu reprezentantow USA, dokelž njemóžeštaj sylneho sněhowanja a wichora dla z lětadłom lećeć. Wostudło pak jimaj njebě, wšako wusyłaštaj swój roadtrip w interneće. Tak powědaštaj republikan a demokrat na 2 575 kilometrow dołhej jězbje wo politiskich temach, reagowaštaj na komentary a wotmołwještaj na prašenja zajimcow.
Zo prominentni přećiwo nowemu prezidentej USA wustupuja, njeje žane potajnstwo. Tajkej přećiwnikaj Donalda Trumpa staj mjez druhim filmowc Robert de Niro a spěwarka Madonna. A dalši so jimaj nětko přidruža, rap-spěwar Snoop Dogg. W scenje swojeho noweho hudźbneho wideja třěli wón z brónju na klawna, kiž je Trumpej podobny. Z brónje pak njewutřěli kulku, ale chorhojčku z napisom „Bang“.
To a tamne (14.03.17)
Psy su listonošam skerje njepřećel. Němski póst poskića tuž swojim sobudźěłaćerjam prawidłowne kursy, zo bychu nawuknyli, kak maja so we łoskoćiwych situacijach ze štyrinohačemi zadźeržeć. Strach listonošow wšak njeje cyle njewoprawnjeny. Loni registrowachu po wšej Němskej 1 819 tak mjenowanych zetkanjow listonošow z psami. We 850 padach so sobudźěłaćerjo pósta zranichu, tak zo njemóžachu swoje dźěło dźeń abo samo dlěje wukonjeć.
Po jenož jědnaće dnjach je brazilski prezident Michel Temer z ponowjeneho palasta zaso wućahnył. 76lětny a jeho mandźelska běštaj tam njedobru energiju a strach před duchami začuwałoj, kaž magacinej Veja přeradźištaj. Wot prěnjeje nocy w palasće njemóžeštaj wobaj spać. Mandźelska prošeše samo měšnika wo pomoc, zo by lóze duchi wućěrił.
To a tamne (13.03.17)
Wo Božu pomoc za Donalda Trumpa prosył je sobotu farar w klóštrje karmelitow bayerskeho Straubinga. Tak prošeše wón na Božej mši wo to, zo ma nowy prezident USA dobrych poradźowarjow a zo twori rozsudy, kotrež cyłemu swětej tyja. Žona z wosady bě kemše pola fararja za pjeć eurow skazała w nadźiji, „zo by so wšitko derje stało“.
Policiji twochnyć chcyše 74lětny wuměnkar w Aachenje. Najebać znamjenja policije a módru swěcu, zo ma zastać, wón z awtom dale jědźeše a zajědźe do napřećiwneho wobchada. Njeda pak so mylić a ćekny přez mjezu do Nižozemskeje, hdźež po dalšim přesćěhanju policije skónčnje zasta. Tam so wurěčowaše, zo hubjenje słyši, zo policiju scyła widźał njeje a zo je jězbnu dowolnosć doma zabył. Kaž so pozdźišo wukopa, wón hižo pjeć lět žane papjery nima.
