Widźał,słyšał, napisał (04.08.26)
Awtor dźensa
Kilian Hrjehor
Znowa štyri wrota třělili
ST Horni kraj Sprjewja – Sokoł Ralbicy/Hórki 0:4 (0:2)
zestawa hosći: Schöne – Wałda, P. Šołta, N. Šewc, F. Čórlich, B. Heidorn, Čóška, Hicka, Woko, Frencl, R. Šnajder, S. Čórlich, J. Šołta, N. Šnajder, Bulank, T. Žur, L. Heidorn
Poprawom chcychu Ralbičenjo sobotu doma přećiwo Jězorskim wjelkam hrać, tute pak srjedu pobrachowacych hrajerjow dla wotprajichu. Po njeličomnych telefonatach namakachu Sokoljo tola hišće přećiwnika – mustwo z Hornjeho kraja. Drje je cyłk kaž Ralbičenjo w samsnej lize, ale mustwje hrajetej hakle w oktobrje přećiwo sebi. Tuž njebě problem a organizowachu testowu hru w Budestecach.
Kralowski błyšć w Delanach
Tydźeń dołho knježeše atmosfera kaž pola champions league w Ralbicach. 100 dorostowych hrajerjow, a wysoko kwalifikowany trenarski team běchu tu na wopyće. Koparski camp Fundación Real Madrid Clinic na sportnišću Sokoła Ralbicy/Hórki bě wot 20. do 24. julija 2026 nowe měritka sadźił. Bě to dotal najwjetši koparski camp w cyłej wuchodnej Němskej.
Wšitko su před něhdźe połdra lětom z překwapjacej powěsću zahajili. Real Madrid skontaktowa direktnje zamołwitych Sokoła Ralbicy/Hórki a so wopraša, hač by towarstwo oficialny koparski camp wuhotowało. Připrajenje hnydom slědowaše, a rezonanca w regionje bě přemóžaca. Z dokładnje 100 dźěćimi bě treningowy tydźeń na domjacym sportnišću dospołnje wupředaty. Z tym bě event pod profesionelnym nawodom kralowskeje koparskeje šule měznik enormneho wuznama za cyły region.
Róžeńčan Filip Kral je wčera w Hórkach lětuši štwórty běh ...
Postupnik přihotowany
FC Energija Choćebuz – Werder Bremen 2:4 (1:2)
zestawa domjacych: Lotka (91. Kratzsch) - Rorig (91. Hofmann), Manu (91. Campulka), Erlein (61. Pelivan), Zaydan (61. Doumbia, 91. Zaydan) – Bittencourt (61. Guttau), Michelbrink (61. Borgmann) – Boziaris (61. Kinsombi) – Ciğerci (61. Hannemann), Engelhardt (91. Copado), Copado (61. Butler)
wrota: 1:0 Ciğerci (6.), 1:1 Musah (31.), 1:2 Mbangula (41.), 1:3 Erevbenagie (100.), 2:3 Borgmann (109.), 2:4 Chuki (116.)
přihladowarjo: 7.443
Sport (31.07.26)
Předpředań jenož hišće dźensa
Jenož hišće dźensa, 31. julija 2026, a to hač do 23.59 hodź., su trajne kartki za DEL2-sezonu 2026/27 swobodnje na předań. Hač do połnocy móža sej je fanojo za sezonu zawěsćić. Po tym trajne karty za městno k staću hižo njepředawaja.
Štóž chce sej swoje krute městno zaručić, měł tuž spěšnje reagować. Kartki hodźa so online w tiketowym wobchodźe abo přez telefonowu hotline 01806 99 11 82 (wšědnje wot 10:00 do 20:00 hodź.) wobstarać.
Kulow a Róžant hišće
Bičwolejbulowa tura Radija Satkule so nachila. Sćěhujetej hišće turněraj 3. awgusta w Kulowje a 10. awgusta w Róžeńće. Wulke finale budźe potom 17. awgusta w Bobkec jěchanskej hali w Miłoćicach.
Testowe koparske hry
Dźensa wječor hraje prěnje koparske mustwo Sportoweje jednotki Njebjelčicy doma přećiwo hrajnemu zjednoćenstwu Zeleno-běli Halštrow/Hlinowski SC II. Jutře popołdnju nastupi potom Ralbičanske prěnje mustwo w tesće přećiwo Jězorskim wjelkam. To je cyłk z wyšeje ligi.
31.07. 18:30 SJ Njebjelčicy –
HZ Zeleno-běli Halštrow
01.08. 15:00 ST Horni kraj Sprjewja –
Sokoł Ralbicy/Hórki
02.08. 11:00 SJ Chrósćicy II –
Natwar Němske Pazlicy
02.08. 14:00 SJ Chrósćicy –
SJ Njebjelčicy
Wučerjo wysoko dobyli 12:0
Tři dny po wolejbulowej hrě mjez wučerjemi a maturantami na Serbskim gymnaziju Budyšin (SN wo tym rozprawjachu) slědowaše koparska hra. Bě to 33. tajki dwubój, kotryž su tónraz w sportowni Serbskeho šulskeho a zetkawanskeho centruma wuhrali. Dokelž bě tartanowa podłoha wonka po dešćiku hładka, njemóžachu pod hołym njebjom mocy měrić. Po dwěmaj poražkomaj w minjenymaj lětomaj su wučerjo skónčnje zaso raz přećiwo swojim dwanatkarjam dobyli. Zo skónči so partija po dwójce 15 min. tak wysoko (12:0) za staršu generaciju, měješe wosebje jednu přičinu. W mustwje pedagogow je pjeć aktiwnych koparjow sobu hrało – a pola maturantow bě David Leppers jenički akter. Dokelž njesteještaj wolejbulistaj Metod Šołta a Michał Eiselt k dispoziciji, wupomhaštaj něhdyšej maturantaj SGB a nětko wučerjej Alexander Wałda (Serbska zakładna šula Budyšin) a Maksimilian Kral-Zahrodnik (Serbska wyša šula Ralbicy).
Prěni test přěhrali
SJ Chróšćenjo II –
LSV Hory II 3:4 (1:2)
Zestawa domjacych: Škoda – J. Mark, M. Zahrodnik, Wornar, Brühl, Žur, B. Donat, Rätze, T. Donat, Sćapan, Kral-Zahrodnik, Špitank, Richter
Po prěnim treningowym tydźenju nastupi Chróšćanska rezerwa njedźelu w testowej hrě přećiwo rezerwje z Horow. Hačrunjež na woběmaj stronomaj někotři hrajerjo pobrachowachu, dožiwi horstka přihladowarjow na wrota bohatu hru.
Andrej Lupp docpě w 6 min. zažne nawjedowanje za hosći. Tola jenož mjeńšinje pozdźišo pósła Franciskus Wornar Simona Žura, kotryž sam na wrotarja běžo bul do kašćika suny. Přiwšěm hosćo lěpje hrajachu a mějachu lěpše móžnosće. W 26. min so Lupp w šěsnatce přesadźi a Fritz Kobalz trjebaše bul jenož hišće do wrotow sunyć. Po pitnej přestawce pak přewzachu Chróšćenjo kontrolu nad hru. Justus Brühl a Milan Zahrodnik měještaj móžnosći za wurunanje, njewužištej pak jej wuspěšnje. Dalše akcije Chróšćenjo nječisće wuhrachu. Tuž dźěchu ze snadnym zastatkom do połčasa.
Hrajerjo so rozžohnowali
Před wulkej kulisu 3500 přihladowarjow je so FSV Budissa Budyšin w přestawce přihotowanskeje koparskeje hry mjez prěnim koparskim mustwom Budissy Budyšin a druhim zwjazkowym koparskim ligistom Dynamo Drježdźany z wosom hrajerjemi rozžohnowała. Mjez nimi bě tež serbski kopar Damian Jurk (druhi wotprawa) z Hórkow. Wón woteńdźe ke krajnemu ligistej, Drježdźanskemu SC.
Foto: Jörg Stephan
Poradźenej testaj za Sokołow
Po cyłkownje třoch treningach wuhrachu Sokoljo kónc tydźenja dwě přihotowanskej hrě přećiwo cyłkomaj z wokrjesneje klasy a z wokrjesneje ligi. Cil běše so zaso zahrać, kaž tež nowopřichady lěpje zeznać a integrować.
Sokoł Ralbicy / Hórki – Njeswačidło 4:0 (1:0)
zestawa domjacych: Schöne – Wałda, P. Šołta, N. Šewc, F. Čórlich, B. Heidorn, Čóška, Hicka, Woko, Frencl, R. Šnajder, Kunze, S. Čórlich, Hantsch, J. Šołta
Mustwo z bliskeho Njeswačidła su w lěćnej přestawce třo hrajerjo wot Póst Germanije Budyšin zesylnili. Klětu chcedźa do wokrjesneje ligi postupić. W minjenych třoch lětach wobsadźichu stajnje njedźakowne druhe městno.
