Lubmin (dpa/SN). Po porjedźenjach při płunowodźe Nord Stream I. ruski zemski płun přez rusko-němski płunowód wot dźensnišeho zaso ćeče. Tole je rěčnik towaršnosće Nord Stream I powěsćerni dpa wobkrućił. Doniž je połna wukonitosć dodawanja docpěta, drje hišće chwilu traje. Rěčnik zdźěli, zo sćelu wšědnje něhdźe 67 milionow kubiknych metrow płuna. To wotpowěduje 40procentowskemu wućeženju maksimalneje kapacity płunowoda. Hišće wčera běchu politikarjo swoje wobmyslenja zwuraznili, zo Ruska po nachwilnym přetorhnjenju porjedźenskich dźěłow dla płunowy honač scyła wjace njewotwjertnje, štož by energijowu krizu dale přiwótřiło. Po ruskim nadpadźe na Ukrainu bě zapad sankcije přećiwo Ruskej wobzamknył. Ruska bě na to mnóstwo dodawaneho płuna do europskich krajow znižiła abo eksport scyła přetorhnyła.

Mnóstwo płuna so přichodne měsacy masiwnje na hospodarstwo Němskeje, ale tež na priwatnych kupcow wuskutkuje, dokelž płaćizny płuna bjezdwěla dale přiběraja. Wažne je, zo su składy płuna do zymskeho počasa napjelnjene.

Berlin/Drježdźany (dpa/SN). W zwadźe wo sćěhi wójny w Ukrainje podpěruje politikarka Lěwicy Sahra Wagenknecht liniju sakskeho ministerskeho prezidenta Michaela Kretschmera (CDU). Kretsch­mer bě rjekł, zo dyrbjała Němska w konflikće posrědkować a docpěć, „zo tuta wójna přestanje“. Němska trjeba dale ruske surowizny. Wagenknecht rjekny wčera powěsćerni dpa: „Kretschmer ma w tymle dypku prawje.“ Ruske surowizny, předewšěm poměrnje tunja ruska energija, je „eksistencne wuměnjenje za do wubědźowanja kmanu němsku industriju, kotruž njemóžemy parować“, politikarka Lěwicy potwjerdźi. „Hospodarska wójna Němsku skóncuje, mjeztym zo wona Putinej lědma zeškodźi a wójnu w Ukrainje njeskónči.“ Kretschmer bě wójnu Ruskeje jako njeprawo a złóstnistwo zasudźił, zdobom pak rjekł: „Sym kruće přeswědčeny, zo ruske surowizny trjebamy.“ Za to běchu jeho raznje kritizowali. Wagenknecht porno tomu rjekny: „Dokelž njemóže Ukraina wójnu přećiwo atomowej mocy Ruskej dobyć, dyrbjeli za kompromisami pytać, hewak wójna z wjele woporami hišće dołho traje.“

Wjele zboža měł je sobudźěłaćer wěstotneje firmy při rumowanju zawostankow rockoweho festiwala Hurricane. 23lětny bě so po kóncu nócneje słužby w delnjosakskim Scheeßelu k spanju do stana lehnył, kiž běchu hosćo festiwala stejo wostajili. Bager stan hrabny a ćisny jón do wotpadkoweho kontejnera. Muž je akciju njezranjeny přetrał. Najebać to dyrbi wodźer bagra z chłostanjom ličić, dokelž njebě pohladał, hač je stan prózdny.

Dokelž njeměješe prěni oficěr wukubłanje na pilota hišće wotzamknjene, je so pasažěrske lětadło po puću z Londona do New Yorka zawróćić dyrbjało. Airbus A330 bě hižo 40 mjeńšin w powětře, jako w cockpiće zwěsćichu, zo njeje prěni oficěr hišće wšě předpisane treningowe lěty zmištrował. Na to lećachu wróćo. Předewzaće Virgin Altantic rěčeše wo słužbnym planowanskim zmylku.

Berlin (dpa/SN). W boju přećiwo změnje klimy je wonkowna ministerka Annalena Baerbock wšitke kraje swěta namołwjała, so spěšnje na wobnowjomne energije nastajić. „Stary fosilny swět so pominje, nowy swět je swět wobnowjomnych energijow“ rjekny politikarka Zelenych k zakónčenju Petersbergskeho klimoweho dialoga wčera w Berlinje. „Klimowu krizu njemóžemy wotstorčić. Tuž njemóžemy tež bój přećiwo njej wotstorčić.“

W cyrkwjach so wochłódźić

Aurich (dpa/SN). Rekordneje horcoty dla fararka Antje Wachmann ludźom radźi, so w cyrkwjach wochłódźić. Stare cyr­kwje ze swojimi tołstymi murjemi trjebaja cyły čas, doniž njejsu wutepjene. W nich je chłódne, rjekny referentka cyrkwje za turizm Ewangelsko-lutherskeje Hannoverskeje krajneje cyrkwje w Aurichu. „Wokomik wodychnyć a sej ćišinu lubić dać, to tyje ćěłu a duši“. W Delnjeje Sakskej je 400 cyrkwjow, kiž su wšědnje znajmjeńša štyri hodźiny přistupne.

Płomjenja dale zachadźeja