Washington (dpa/SN). Prěni króć po ruskim nadpadźe na Ukrainu chce wonkowny minister USA Antony Blinken přichodne dny ze swojim ruskim kolegu Sergejom Lawrowom rěčeć. Při tym chcetaj wo pušćenju ameriskeje basketbuloweje sportowče Brittney Griner a jeje krajana Paula Whelana rěčeć, Blinken na nowinarskej konferency připowědźi. Knježerstwo USA bě Moskwje hižo před tydźenjemi „substancielne namjety“ předpołožiło. Amerisku sportowču běchu 17. februara na Moskowskim lětanišću Šeremetjewo zajeli, dokelž měješe wona drogi při sebi. Griner argumentowaše, zo wužiwa marihuanu jako lěkarski srědk přećiwo bolosćam. USA kritizuja, zo bě proces přećiwo njej politisce motiwowany.

Paula Whelana, kiž ma wjacore staćanstwa, běchu 2018 w Ruskej zajeli, wumjetujo jemu spionažu. W juniju 2020 zasudźichu jeho k 16lětam jastwa z móžnosću, čas w dźěłowym lěhwje přetrać. Whelan kritizowaše sudniski proces jako politisku inscenaciju. Poměr mjez Ruskej a USA je chětro napjaty.

Pomocny skutk „Chlěb za swět“ žada sej raznu změnu ratarskeje politiki

Berlin (dpa/SN). Hladajo na swět wopřijacu krizu hłodu dla žada sej ewangelski pomocny skutk „Chlěb za swět“ dale zwyšenje statneje pjenježneje pomocy kaž tež zasadnu změnu dotalneje ratarskeje politiki. „Nimo wójny, inflacije a korony słuša skepsana ratarska politika k najwjetšim zawinowarjam zežiwjenskeje krizy“, skoržeše prezidentka organizacije Dagmar Pruin wčera w Berlinje.

Hižo nětko trada po najnowšich informacijach Swětoweje hłodoweje pomocy UNO po wšěm swěće 828 milionow ludźi hłód. Zjednoćene narody su hakle njedawno před najwjetšej hłodowej krizu minjenych lětdźesatkow warnowali, dokelž je ruski nadpad na Ukrainu eksport žita přidatnje masiwnje haćił.

Podstupim (dpa/SN). Plahowarjo hromaka a truskalcow w Braniborskej maja njerjanu sezonu za sobu. Lětuši wunošk žnjow hromaka je z 18 100 tonami naj­niši po lěće 2015, Berlinsko-braniborski statistiski zarjad zdźěla. Płonina za plahowanje hromaka bě lětsa z něhdźe 3 800 hektarami runje tak wulka kaž minjene lěta. Při wšěm je wunošk žnjow wo 14 procentow na 18 100 tonow wote­běrał. Ratarjo skorža špatneho wobrota a zlutniwych kupcow dla. W lońšej sezonje běchu hišće 21 500 tonow tuteje zeleniny w Braniborskej nakałali. Zwjazkowy kraj je najwjetši plahowar hromaka we wuchodnych zwjazkowych krajach.

Tež žně truskalcow njeběchu spokojace, ratarjo skorža. Płonina plahowanja pod hołym njebjom bě lětsa z 220 hektarami wo 90 hektarow mjeńša hač loni. Tak mało płoniny za truskalcy mějachu naposledk 1998. Wunošk na hektar wšak bě wo 17 procentow lěpši hač 2021.

Płonina za plahowanje słónčnych róžow je lětsa wo 16 600 na 29 600 hektarow rozrostła, dokelž je import wolija słónčnych róžow z Ukrainy wójny dla masiwnje woteběrał, zarjad zdźěla.

Pjenjezy na dróze leželi su předwčerawšim, wutoru, w sewjerorynsko-westfalskej gmejnje Kranenburg. Swědcy informowachu policiju, zo je dróha mjez Kranenburgom a Gochom połna pjenjez. ­Zastojnicy zwěsćichu, zo jedna so wo napodobnjene pjenjezy, kotrež wužiwaja w dźiwadle abo filmach: Mały nalěpk na bankowkach tole přeradźa. Wotkal pjenjezy pochadźeja, njeje znate.

Z awtom nana a bjez jězbneje dowolnosće je 17lětny w Berlinje-Spandauwje spytał, so policajskej kontroli wuwinyć. Policisća chcychu awto kontrolować, młodostny pak jědźeše dale. Na ćěkancy ignorowaše wón wjacore čerwjene ample, smaleše na chódniku a by skoro žonu přejěł. Jězba skónči so w slepej hasy. Třo sobujěducy w starobje 16 a 17 lět spytachu ćeknyć, buchu pak dosahnjeni. Šofera policija nachwilnje zaja.