Schlesinger před wuběrk skazana
To a tamne (09.08.22)
Padušnicu nakupowanskich wozyčkow su w braniborskim Nowym měsće nad rěku Dosse lepili. Sobudźěłaćerjam kupnicy bě 71lětna wospjet napadnyła, dokelž přińdźe prawidłownje nakupować a so po tym z wozyčkom wotsali. Přistajeny jej sćěhowaše a zwěsći, zo steješe na kilometer zdalenym statoku, hdźež žona bydleše, hižo 13 wozyčkow. Policija je sej žonu mjeztym na stražu skazała.
Swojej maćeri w Mnichowje žiwjenje wuchował je syn – w Londonje. Warnowanska připrawa za kur bě jeho na mobilnym telefonje alarmowała, mjeztym zo mać w Mnichowje spaše a alarm njesłyšeše. Muž informowaše policiju, kotraž kolegow w Mnichowje a tak wohnjowu woboru wołaše. Žona bě na jědź na kachlach zabyła a sej wusnyła. Jědź so zapali a alarmowu připrawu zbudźi. Wohnjowa wobora móžeše žonu wuswobodźić.
Kritika na stejišću z Vatikana
Vatikan (B/SN). Bamž Franciskus je na zmylk w komunikaciji při wozjewjenju Vatikanskeho stejišća k synodalnemu pućej bjez podpisma a datuma pokazał. Wotpósłar je Vatikanski statny sekretariat. W stejišću mjez druhim pisaja, zo nimaja biskopja a wěriwi prawo „k přiwzaću nowych reformow we wjednistwje a nowych wusměrjenjow wučby a moralki“. Přičina kritiki je, zo byštej so móhłoj cyrkwinska zhromadnosć na hrački stajić a jednotu cyrkwje wohrozyć. Na prašenje žurnalistow, hač tute stejišćo žadanemu dialogej nješkodźi, pokaza bamž na swój wosobinski list k „synodalnemu pućej“ z lěta 2019, kotryž dźensa hišće płaći.
Dokumenty dyrbja pruwować
Lěwica: Socialna katastrofa
Berlin (dpa/SN). Drastisce zwyšenych płaćiznow energije a žiwidłow dla hrozy Němskej „socialna katastrofa“ z chutnymi strachami za demokratiju. Towaršnosći bliži so „perfektny wichor“, rjekny přesyda Lěwicy Martin Schirdewan wčera wječor w sćelaku ARD. Hdyž njemóža sej ludźo přichodne měsacy žiwidła wjace dowolić, hrozy „strašna kriza demokratije“. Lěwica chcyła nazymu protesty organizować, zo by knježerstwo SPD, Zelenych a FDP namołwjała, jednać.
Pólscy putnicy znjezbožili
Zagreb (dpa/SN). Při ćežkim wobchadnym njezbožu w Chorwatskej je sobotu rano dwanaće ludźi žiwjenje přisadźiło. 34 zranjenych dyrbjachu do chorownje dowjezć. Bus z Pólskeje bě po puću do putniskeho města Medźugorje. Njezbožo sta so 60 kilometrow sewjerozapadnje stolicy Zagreba. Přičina njezboža njebě spočatnje jasna. Policija z toho wuchadźa, zo bě sej šofer za wodźidłom wusnył. We Waršawje mjeztym zdźělichu, zo běchu w busu pólscy staćenjo.
Bamž eksport žita witał
Kaž wuludnjene je naměsto Bad Schandauwa w Sakskej Šwicy před ...
Přiměr dotal dźerži
Manewry du dale
Zelenskyj wočakuje dalše brónje
Kijew (dpa/SN). Ukrainski prezident Wolodymyr Zelenskyj je hladajo na ćežke wojowanja w Donbasu swojim krajanam nowe dodawanja brónjow připowědźił. „Přichodny tydźeń wočakujemy nowostki ze stron partnerow nastupajo pakćiki pomocy. Dobre powěsće!“, praji Zelenskyj wčera w swojej widejowej narěči. Kluče wuspěšneho zakitowanja su přeco hišće brónje ze zapada, wón rjekny.
Po podaćach Zelenskyja howrja najzasakliše wojowanja w Donbasu. Połoženje tam wostanje ćežke. Zakitowanje městow kaž „Awdijiwka, Pěsky, Marjinka a Bachmuta žadaja sej naše hłowne napinanje a bohužel wjele žiwjenja“, wón zwěsći. Nimo toho wobnowi wón swoje wumjetowanja napřećo Ruskej, zo je atomowu milinarnju Saporišja wobtřělała. Na to dyrbjeli „principielnu wotmołwu swětoweho zhromadźenstwa“ namakać, žadaše sej wón. Milinarnju běchu wčera znowa wobtřěleli. Ruska a Ukraina dawatej sej mjez sobu winu. Mjezynarodny atomowy zarjad žada sej, fachowcam přistup do milinarnje zmóžnić.
Wulke změny njebyli
Wuskutki dźewjeć eurow tunjeje jězdźenki wědomostnje přepytowane
Berlin/Mnichow (dpa/SN). Wolóženje za přetrjebarjow, přinošk k přewrótej wobchada, lěpšiny za nahladnosć busa a železnicy: Wočakowanja na dźewjeć eurowski tiket w zjawnym wosobowym bliskowobchadźe (ÖPNV) su hoberske. Trochu wjace hač dwaj měsacaj po starće po cyłym Zwjazku płaćiweho tiketa hódnoći zwjazkowy wobchadny minister Volker Wissing (FDP) projekt hižo jako wuspěch. Při tym wědomostne wuhódnoćenje hišće běži. A prěnje dopóznaća pokazuja na to, zo drje wosebita jězdźenka bjezdwěla skutkownosć pokazuje, ale lědma wšitke nadźije a zaměry spjelnić njemóže.
Lěkarka atestow dla zasudźena
Garmisch-Partenkirchen (dpa/SN). Wustajenja sta wopačnych nahubnikowych atestow dla su lěkarku z Hornjeje Bayerskeje k dwulětnemu jastwu zasudźili. Dokelž njeměješe wobskoržena žanoho dowidźenja, njebu chłostanje na pruwowanski čas postajeny, wujasni direktorka hamtskeho sudnistwa Christine Schäfer minjeny pjatk. Statne rěčnistwo kaž tež prawiznik žony stej mjeztym rewiziju přećiwo wusudej zapodałoj.
W pandemiji běchu wosebje přećiwnicy naprawow koronawirusa dla spytali, sej pola lěkarjow wuswobodźenja wot winowatosće wužiwać nahubnik wobstarać. Wopodstatnjene bu to potom z tym, zo njemóhli mějićeljo atestow pječa medicinskich přičin dla nahubniki wužiwać. Wobskoržena medicinarka je tajke strowotniske wuswědčenja wustajała, bjez toho zo by potrjechenych přepytowała. Dohromady dźěše wo 309 padow.
Pola wobwinowaneje běchu tež přepytowanje přewjedli. Najebać to wona dale wopačne atesty wupisowaše. Hamtske sudnistwo je jej tuž zakazało, přichodne tři lěta jako lěkarka skutkować. Zakaz je hnydom płaćiwy.
