Kónc małych stron w Brüsselu
Strasbourg (dpa/SN). Přewšo małe strony w Němskej, kaž Swobodni wolerjo abo satiriska strona Die Partei, dyrbja z tym ličić, zo njejsu noweje móžneje delnjeje hranicy hłosow dla po přichodnych europskich wólbach wjace w parlamenće EU zastupjene. Nawodźa jednanjow najwjetšich frakcijow w parlamenće EU su so na zhromadnu poziciju k reformje europskeho wólbneho prawa dojednali. Wona předwidźi postajić delnju hranicu hłosow w krajach, kotrež su najbohatše na wobydlerjow, mjez druhim w Němskej. Strona Piratow mjenuje plany „nadpad na demokratiju“.
Delnja hranica by rěkała, zo njejsu strony z mjenje hač 3,5 procentami hłosow wjace w Strasbourgskim parlamenće zastupjene. Najprjedy pak dyrbjał parlament EU planam přihłosować, potom měli čłonske staty rozsudźić. Njeje tuž jasne, hač reformu do přichodnych wólbow schwala. Zapósłanc Piratow Patrick Breyer na to skedźbnja, zo je při zašłych wólbach 3,1 milion wolerjow swój hłós šěsć małym stronam, kaž Piratam, dał. Te hłosy bychu z reformu spadnyli, štož by na dobro wulkich stron było.
To a tamne (11.03.22)
Slěd wjace hač 15 000 ličbow spomjatkować móže sej policajska hłowna komisarka Susanne Hippauf a chce tak přichodnu póndźelu nowy němski rekord nastajić. Při tym dźe wo to, městna po komje Pi-ličby z hłowy nawuknyć. Z 11 104 cyframi bě 40lětna z Frankfurta hižo raz rekord nastajiła, konkurent pak bě jón na 15 000 zwyšił. Hippauf chce 15 600 cyfrow naličić. „Dźeń Pi“ swjeća kóžde lěto 14. měrca, a to na česć ličby 3,14.
Z nahubnikami FFP 2 scomt zatwarjenej kameru je 43lětny ludźom při teoretiskim pruwowanju jězbneje dowolnosće ilegalnje pomhał. Muž je swoje posłužby internetnje poskićał, srjedu pak su jeho při wobchadnej kontroli lepili. Wobšudnik je swojim kupcam nahubnik z kameru a małe štepsle do wucha přewostajił a wotmołwy posrědkował. Kelko kupcow 43lětny měješe, dotal njewědźa.
Chcedźa wólbny porjad změnić
Z widom na přichodne wólby braniborskeje Rady za naležnosće Serbow je gremij předwčerawšim prěni raz wudospołnjenja wobstejaceho rjadowanja rozjimał. Wo tym chcedźa sej radźićeljo mysle a měnjenja ze serbskimi gremijemi w Delnjej Łužicy wuměnjeć.
Přepołoža rakety do Pólskeje
Washington (dpa/SN). USA su hladajo na wójnu w Ukrainje wěstosće dla dwaj raketowej systemaj typa „Patriot“ z Němskeje do Pólskeje přepołožili, rěčnik zakitowanskeho ministerstwa zdźěli. Hdźe dokładnje rakety nastaja a kajki zasadźenski status wone změja, nochcyše wón rjec. System Patriot je po jeho słowach najskutkowniši srědk, teritorij NATO zakitować. Rakety su kmane tež jara wysoko lětace lětadła, helikoptery a dalše rakety wottřěleć.
Hotuja so na dźěći ćěkancow
Berlin (dpa/SN). Zwjazkowe kraje hotuja so na statysacy ćeknjenych dźěći a młodostnych z Ukrainy. Dźěćom chcedźa spěšnje na šulach Němskeje wučbu zmóžnić, zo bychu kontakt nawjazali, rjekny předsydka konferency kultusowych ministrow, schleswigsko-holsteinska kultusowa ministerka Karin Prien (CDU), dźensa w telewiziji ZDF. Po informacijach zwjazkoweho nutřkowneho ministerstwa je dotal 80 000 ludźi před wójnu z Ukrainy do Němskeje ćeknyło.
Nowačk na čole kraja
Kritizuje naćisk naprawow
Hannover (dpa/SN). Naćisk zwjazkoweho knježerstwa nastupajo nowe naprawy koronawirusa dla po 20. měrcu w Delnjej Sakskej kritiku zbudźa. Ministerski prezident Stephan Weil na to skedźbnja, zo su ličby infekcijow z wirusom tuchwilu zaso na rekordnym stawje. „Zo runje w tajkim połoženju kašćik instrumentow k wobmjezowanju pandemije wuprózdnja, je ćežko rozumić. Nichtó wohnjohašak preč njećisnje, hdyž so hišće pali“, rjekny politikar SPD wčera w Hannoveru. „Kraje bychu tójšto móžnosćow jednanja přisadźili, kotrež mamy za trěbne. K tomu słuša na přikład winowatosć, zo maja wjetše skupiny ludźi w nutřkownych rumnosćach škitny nahubnik wužiwać.“
Justicny minister Marco Buschmann (FDP) bě so z ministrom za strowotnistwo Karlom Lauterbachom (SPD) na to dojednał, zo najwjetši dźěl wobmjezowanjow po 20. měrcu wotpadnje.
Hilse zasudźeny
Gauck: Zymu mrěć za swobodu
Berlin (dpa/SN). Bywši zwjazkowy prezident Joachim Gauck ma za zmysłapołne, dodawanje ruskich energijowych nošakow do Němskeje hladajo na nadpad na Ukrainu přetorhnyć. „To móžu sej jara derje předstajić“, rjekny Gauck minjenu nóc w telewiziji ARD. Wo tym měli chutnje rozmyslować, a jemu by to lubše było hač tuchwilny staw.
Straty nastupajo derjeměće bychu znjesliwe byli. „Móžemy tež raz za swobodu zymu mrěć. Móžemy někotre lěta znjesć, zo mamy mjenje žiwjenskeje radosće a žiwjenskeho zboža.“ Nimo toho je Němska socialny prawniski stat, kiž so wo najbóle potrjechenych ludźi stara, Gauck rjekny. „Mějachmy hižo cyle hinaše problemy, a smy je zmištrowali.“
Rozsud zwjazkoweho knježerstwa nastupajo razne sankcije a zwyšenje wudawkow za zakitowanje Gauck witaše. Wón bě sej hižo w lěće 2014 na Mnichowskej wěstotnej konferency wjace pjenjez za Zwjazkowu woboru žadał. Němska dyrbjała wjace zamołwitosće přewzać. „Wjeselu so, zo je kraj nadobo wotućił.“
Nadźijeja so diplomatije
Prěnje zetkanje wonkowneju ministrow Ukrainy a Ruskeje w Turkowskej
Kijew (dpa/SN). Do napjeće wočakowaneho zetkanja wonkowneju ministrow Ukrainy a Ruskeje stej wobě stronje tež minjenu nóc we wójnskej kónčinje dale wojowałoj. Ukraina rozprawja wo wobtřělenju wjacorych wulkoměstow, w Kijewje wujachu sireny.
Ukrainski wonkowny minister Dmytro Kuleba je wčera w turkowskej Antalyji přizemił, hdźež chcyše so dźensa ze swojim ruskim kolegu Sergejom Lawrowom zetkać a móžnosće za kónc wójny wobrěčeć. Turkowski wonkowny minister Mevlüt Çavuşoğlu chce mjez woběmaj posrědkować. Jako wuměnjenje za kónc wojowanjow sej Ruska žada, zo so Ukraina w swojej wustawje jako neutralna deklaruje. Nimo toho dyrbjał Kijew wot Ruskeje přiswojenu čornomórsku połkupu Krim a kónčiny separatistow na wuchodźe připóznać. Ukraina drje to dotal wotpokazuje, jeje prezident Wolodymyr Zelenskyj je pak mjeztym zwólniwosć ke kompromisam signalizował.
Zaměr je jasny
To a tamne (10.03.22)
Město žadaneje jězbneje dowolnosće je šofer awta policistam w Kölnje swojorazny dokument pokazał: skazanku na sudniski termin. Přičina sudniskeho jednanja wšak bě łoskoćiwa: Dźěše wo jězdźenje bjez jězbneje dowolnosće. Kaž so wukopa, njeje 23lětny hišće ženje žanu płaćiwu jězbnu dowolnosć měł. Policisća, kotřiž běchu muža zadźerželi, jeho na to na hamtske sudnistwo dowjezechu. Na 23lětneho čaka tuž dalše jednanje.
Policistka w Francoskej, kotraž bě swojeho kolegu za wodźidłom w pryzlach z elektrošokowakom nadpadnyła a tak wobchadne njezbožo zawiniła, wostanje bjez chłostanja. Sudnistwo w Roubaixju přiliča jej wulke zasadźenje pola policije na dobro. Wo disciplinarnych konsekwencach měli zamołwići rozsudźić. Policistaj běštaj po šoku do parkowaceho awta zrazyłoj, ale dale jěłoj.
