Berlin (dpa/SN). Do dźensnišeho zetkanja zastupnikow Zwjazka a zwjazkowych krajow su sej kraje fairne rjadowanje kóštow zastaranja ukrainskich wójnskich ćěkancow žadali. Někotre centralne prašenja su dale wotewrjene a maja so rozsudźić, rjekny ministerski prezident Badensko-Württembergskeje Winfried Kretschmann (Zeleni). Dźe wo kóšty zaměstnjenja a zastaranja ludźi. Po nadpadźe Ruskeje na Ukrainu su sej statysacy ludźi do Němskeje wućeknyli.

Durinski ministerski prezident Bodo Ramelow (Lěwica) je za to, kóšty za ćeknjenych z etata za bjezdźěłnostny pjenjez Hartz IV a nic z etata za požadarjow azyla brać. Berlinska knježaca měšćanostka Franziska Giffey (SPD) rjekny nowinarjam: „Chcemy, zo Zwjazk, podobnje kaž 2015, kompletne kóšty přewozmje“.

Ministerscy prezidenća chcychu popołdnju ze zwjazkowym kanclerom Olafom Scholzom (SPD) wuradźować, kak měli kóšty za zastaranje ukrainskich ćěkancow rozdźělić. Nimo toho dźěše wo jich registrowanje a rozdźělenje.

Ruske wójsko hotuje so wočiwidnje na ofensiwu na wuchodźe Ukrainy

Kijew (dpa/SN). Ukrainski prezident Wolodymyr Zelenskyj je sej razniše sankcije přećiwo Ruskej žadał. Wón namjetowaše embargo ruskeho zemskeho wolija a dospołne wuzamknjenje ruskeho bankoweho systema wot mjezynarodnych financnych wikow. Njedyrbjał-li so zapad na „woprawdźe bolostny paket sankcijow“ dojednać, móhła Ruska tole „jako dowolnosć za dalše wojerske nadpady“ wobhladować, rjekny Zelenskyj minjenu nóc we widejowym poselstwje.

Runočasnje warnowaše ukrainski prezident před wulkej ofensiwu ruskeho wójska na wuchodźe Ukrainy. Moskwa tam swoju bojowu móc natwarja, zo by swoje ambicije nastupajo kónčiny Donbassa zwoprawdźiła, wón rjekny. Knježerstwo w Kijewje je wobydlerjow kónčin wokoło Luhanska, Donjecka a Charkiwa hižo namołwjało, so tak spěšnje kaž móžno do wěsćišich kónčin podać. Kijew z tym liči, zo chce ruske wójsko wokoło Kijewa cofnjene wojerske jednotki nětko na wuchodźe Ukrainy zasadźić.

Po tym zo běch sej minjene dny hromadźe z Worklečanskim wjesnjanostu wonu dźěru w Smječkecach wobhladał, so mi po­dobne tajke wobrazy do mysli tłóčachu, kotrež běch w zašłosći w telewiziji widźał: dźěry wjele wjetšeho rozměra w Rudnych horinach, zesuwane płoniny při Hórnikečanskim jězoru abo wony pad w Nachterstedće, hdźež su samo ludźo žiwjenje přisadźili. Tak zlě w Smječkecach bohudźak njebě a njeje. A tola njebě tam njezbožo wuzamknyć. Čłowjek nochce sej radšo předstajić, što móhło so stać, bychu-li sej tam na přikład dźěći hrajkali a wćipne kaž wone su sej dźěru dokładnišo wobhladali. Na zbožo so ničo stało njeje. Zo by to tak wostało, dyrbja fachowcy na polu ­hórnistwa nětko wuslědźić, čehodla je w Smječkecach wulka dźěra nastała. Na kóždy pad budu dyrbjeć zwěsćić, hdźe su wone podkopki dokładnje byli, hdźež su w 19. lětstotku brunicu wudobywali. Na te wašnje nas nětko stawizny zaso ­dosćahnu. Marian Wjeńka

Wjeselo nad woprawdźitym hrabnjenčkom mjez studowacymi w Nürnbergu njetraješe dołho: Zmylka dla běchu awtomaty tamnišeho bliskowobchada semestersku jězdźenku za 2,07 město 207 eurow předawali. Powěsć wo „rabaće“ bě so póndźelu spěšnje rozšěriła a nawal na awtomaty zbudźiła. Zamołwići su zmylk mjeztym skorigowali. Kelko studentow je sej tuni tiket kupiło, njewědźa.

Putin dóstanje nowe mjeno – znajmjeńša w parku dźiwiny w hornjej Frankskej. Tam bydli dźiwje swinjo z mjenom ruskeho prezidenta. Te pak chcedźa jemu wójny w Ukrainje dla sćazać, zamołwići parka dźiwiny w Mehlmeisel w Bayreuthskim wokrjesu zdźěla. Zwěrjo bě hižo jako proso do parka přišło a swojeho ruskeho nana dla tute mjeno dóstało. „Putin“ waži mjeztym 200 kilogramow a čuje so mjez 21 swinjemi jara derje, kaž zdźěleja.