Moskwa (dpa/SN). Ruski wonkowny minister Sergej Lawrow warnuje před Třećej swětowej wójnu. Tutón strach je „chutny, woprawdźity a njesmě so podhódnoćić“, rjekny Lawrow w ruskej statnej telewiziji. Lawrow zdobom rjekny, zo su transporty bróni ze zapada do Ukrainy „woprawnjeny cil“ za ruske wójsko.

Dobrej dwaj měsacaj po zahajenju ruskeho nadpada na Ukrainu je ruski prezident Wladimir Putin dźensa generalneho sekretara UNO Antonia Guterresa witał. Guterres chce w konflikće mjez Ruskej a Ukrainu posrědkować a zetka so zajutřišim, štwórtk, z ukrainskim prezidentom Wolodymyrom Zelenskym.

Na přeprošenje USA su zastupnicy wjacorych krajow dźensa na wojerskim lětarskim zepěranišću Ramstein w Porynsko-Pfalcy wo wójnje w Ukrainje wuradźowali. Na konferencu na najwjetšim ameriskim wojerskim lětanišću zwonka USA je zakitowanski minister USA Lloyd Austin zastupnikow 40 krajow přeprosył. Němsku zastupuje zakitowanska ministerka Christine Lambrecht (SPD).

Města žadaja sej wjace pjenjez za bliskowobchad – witaja tunju jězdźenku

Berlin (dpa/SN). Sejm městow Němskeje na to pokazuje, zo pobrachuja w zjawnym bliskowobchadźe hižo nětko wjacore miliardy eurow a žada sej hladajo na planowanu jězdźenku za dźewjeć eurow wjace pjenjez wot Zwjazka. Ideja je mudra, z potuńšenym tiketom ludźi do busow a železnicow wabić a tak něšto na dobro klimy činić. „Smy skeptiscy, zo je nachwilna dźewjeć-eurowska jězdźenka skutkowny srědk, zo wobydlerjo dołhodobnje z awta do busow a železnicow přelězu“, rjekny hłowny jednaćel zwjazka Helmut Dedy powěsćerni dpa. „Wulke starosće načinjeja nam tež plany financowanja předewzaća.“

Po naćisku z domu wobchadneho ministra Volkera Wissinga (FDP) chce Zwjazk lětsa srědki na dobro krajow k financowanju zjawneho bliskowobchada wo 3,7 miliardow eurow zwyšić. Tak chcedźa tež kóšty za dźewjeć eurow tunju jězdźenku zapłaćić: Wot junija hač do kónc awgusta móža ludźo w blisko- a dalokowobchadźe za dźewjeć eurow wob měsac sobu jěć.

Mnichow (dpa/SN). Nalada němskeho hospodarstwa je so w aprylu njewočakowano snadnje polěpšiła, wostawa pak na přewšo niskim niwowje. Tak mjenowany předewzaćelski klima, kiž zwěsća institut Ifo, je so w měrcu wo jedyn dypk na 91,8 polěpšił, Mnichowski institut wčera zdźěli. Analysća běchu wójny w Ukrainje dla z dalšim negatiwnym wuwićom ličili. „Po prěnim šoku wójny dla wopokazuje so němske hospodarstwo jako robustne“, rjekny prezident instituta Clemens Fuest. Historisce wostawa nalada dale špatna. Wona je tuchwilu tak hubjena kaž w februaru lěta 2010. Hłownje zamołwite za polěpšenje je wočakowanje dalšeho hospodarskeho wuwića. Tuchwilne połoženje předewzaća jako stabilne posudźuja. Institut ma wuwiće posudka połoženja za pozitiwne překwapjenje. Předewšěm posłužbowy sektor a předźěłace rjemjesło stej předewzaćelsku klimu polěpšiłoj. Wobchodnicy porno tomu ćerpja inflacije a wysokich płaćiznow dla. Nadźije wikowarjow, zo so jich połoženju po skónčenju naprawow koronawirusa dla zasadnje polěpši, buchu z tym dospołnje přesłapjene.

Drježdźany (dpa/SN). AfD w Sakskim krajnym sejmje je z namjetom zwrěšćiła, winowatostne šćěpjenje přećiwo koronawirusej w strowotnistwje wotstronić. Žana druha z w parlamenće zastupjenych stron njeje so wčera namjetej přizamknyła. Strona chcyše krajne knježerstwo namołwjeć, w Zwjazkowej radźe iniciatiwu nastupajo změnu zakonja za škit před infekcijemi zapodać. „Čłowjeske ćěło njesmě so z objektom stać, z kotrymž politikarjo a knježerstwa lubowólnje ­jednaja“, rjekny frakciski předsyda Jörg Urban k wopodstatnjenju. Wón na to pokaza, zo je hižo nětko přemało personala w hladarnjach a zo winowatostne šćěpjenje połoženje dale přiwótřa.

Druhe strony wumjetowachu AfD njetrjebawšu inscenaciju, zo by naladu přećiwo šćěpjenju dale přiwótřiła. „Wulce připowědźena žołma wupowědźenjow je wupadnyła“, rjekny Kathleen Kuhfuß ­(Zeleni). Wjacori zapósłancy kritizowachu AfD za wuprajenja, zo šćěpjenje ­lědma strowotniski wužitk wunjese. ­Alexander Dierks (CDU) přispomni, zo maja kraje z wysokej kwotu šćěpjenja ­jasnje mjenje smjertnych padow.