Zakituje Scholza
Wójna zaběra ratarjow na Agra
Lipsk (dpa/SN). Wójna w Ukrainje ratarjow a politikarjow na wčera zahajenej ratarskej přehladce Agra 2022 zaběra. „Pytnjemy, zo dyrbimy so na krizy přihotować, zo je zaručenje zežiwjenja dźeń a wažniše a zo dyrbimy swoju wotwisnosć na přikład wot surowiznow z Ruskeje wottwarić“, rjekny sakski ratarski minister Wolfram Günther (Zeleni). Wuskutki wójny su mnohostronske a sahaja wot wyšich płaćiznow za hnojidła hač k problemam w logistice, dokelž přińdźe wjele šoferow nakładnych awtow z Ukrainy.
Tež statny sekretar w durinskim ratarskim ministerstwje Torsten Weil warnowaše před wuskutkami wójny a chwaleše zdobom sylnosć ratarstwa za čas koronapandemije: „Minjenej lěće je nas ratarstwo stabilnje ze žiwidłami zastarać móhło.“ Problemy kaž nuzowe hladanje dźěći ratarjow abo prašenje sezonowych dźěłowych mocow su derje rozrisali. Zwjazki ratarjow přiwšěm před wulkimi wočakowanjemi warnuja. Nic jenož płaćizny wuhlady zaćěmnjeja, tež wjedro hraje wažnu rólu: Tuchwilu je w srjedźnej Němskej přesucho. Njeje jasne, kak so žně lětsa wuwija.
Jenož hišće pjeć dnjow karanteny
To a tamne (22.04.22)
Wobšudnikow wutriksowałoj staj rentnarjej w Hamburgu. Do toho běštaj wopačnej policistaj jimaj 60 000 eurow wotewzałoj, dokelž so pječa paduši na dom seniorow měrja. Jako so skućićeljo znowa za pjenjezami – tónkróć na bance – prašachu, starcaj do toho zwolištaj. Do toho běštaj policiju informowałoj. Při přepodaću pjenjez zastojnicy jebakow zajachu.
Na wšě 150 kilometrow po puću był je dospołnje pjany šofer wosoboweho awta na awtodróze A 19 mjez Berlinom a Baltiskim morjom, doniž jeho policija njezadźerža. Muž, pola kotrehož naměrichu 2,13 promilow alkohola, bě ze swojim wobškodźenym awtom a swojoraznym wašnjom jězdźenja hižo w Braniborskej napadnył. Hakle w Rostockskim wokrjesu so poradźi, jeho zadźeržeć. Při awće zwěsćichu čerstwe wobškodźenja a pytaja tych, kiž buchu wot šofera škodowani.
Raznje so rozestajałoj
Paris (dpa/SN). Štyri dny do rozsudneho koła prezidentskich wólbow w Francoskej staj so statny šef Emmanuel Macron a toho kontrahentka Marine Le Pen w telewizijnym duelu chětro raznje rozestajałoj. Wobaj kandidataj prócowaštaj so wo wěcownu debatu, njelutowaštaj pak w dlěje hač dwě hodźinje trajacej debaće wčera wječor z mjezsobnymi nadběhami a wumjetowanjemi, na přikład politiki napřećo Ruskej dla. Po prěnich woprašowanjach je so Macron přesadźił.
Wissler nawjeduje nětko sama
Berlin (dpa/SN). Po njewočakowanym wotstupje sobupředsydki Lěwicy Susanne Hennig-Wellsow chce předsydka Janine Wissler stronu najprjedy raz sama nawjedować. Tole je strona po krizowym wuradźowanju předsydstwa wčera wječor zdźěliła. Hennig-Wellsow bě wčera po dobrym lěće w zastojnstwje swój hnydomny wotstup připowědźiła. Wona wopodstatni to mjez druhim z njespjelnjenymi wočakowanjemi strony a ze seksizmom w swójskich rjadach strony.
Zaso rakety na Israel
Chorobne lětadło A310 MedEvac zwjazkoweje wobory je wčera na ...
Antisemitizm připóznaty
Pjenjezy hižo preč
Baerbock: Nord Stream 2 bě zmylk
Riga (dpa/SN). Wonkowna ministerka Annalena Baerbock je baltiskim krajam hladajo na wójnu přećiwo Ukrainje podpěru w padźe móžneho ruskeho wohroženja přilubiła. NATO teritorij zwjazkarjow zakituje a „kóždy kućik zhromadnje škita“, rjekny politikarka Zelenych wčera po zetkanju ze swojim letiskim kolegu w zastojnstwje Edgarsom Rinkevicsom w stolicy Rize. Wěstota Europy je kruće zwjazana z wěstotu baltiskich krajow, rjekny wona k zahajenju wopyta Letiskeje, Estiskeje a Litawskeje.
Raznje kritizowaše Baerbock energijowu politiku napřećo Ruskej ze stron bywšeje zwjazkoweje kanclerki Angele Merkel (CDU). Zakitowanje wot krajow srjedźneje a wuchodneje Europy dawno kritizowaneho němsko-ruskeho płunowoda Nord Stream 2 bě z jeje wida „fatalny zmylk“. „Město Nord Stream bychmy Baltic Stream na zakładźe čisteje energije twarić móhli a poprawom dyrbjeli“, wona doda. „To běchu jasne a widźomne zmylki, kotrež je nowe zwjazkowe knježerstwo mjeztym skorigowało.“
Wočakuja rusku ofensiwu
Dalše wojowanja wokoło ukrainskeho Luhanska – Zelenskyj optimistiski
Kijew (dpa/SN). Ruske wojerske jednotki ze swojej ofensiwu w Ukrainje pokročuja. Wočakowanu wulkoofensiwu pak drje hišće zahajili njejsu. Minjenu nóc rozprawjachu z wjacorych ukrainskich městow wo wobtřělenju ze stron ruskeho wójska. Wulki dźěl kónčiny wokoło Luhanska je po ukrainskich informacijach w rukach ruskeho wójska, pječa něhdźe 80 procentow. Do toho běchu ukrainske jednotki město Kreminnu wopušćili. Tež měsće Rubišne a Popasna stej po informacijach regionalnje zamołwitych „zdźěla“ pod ruskej kontrolu. Tuchwilu tam pak hišće zasakle wojuja. Při zahajenju ruskeje inwazije před něhdźe wosom tydźenjemi mějachu separatisća „Ludoweje republiki Luhansk“ jenož 30 procentow teritorija w swojich rukach.
