Wo energijowych kóštach rěčeli
Bremen (dpa/SN). Kak móža wobchadne zwjazki sylnje stupace energijowe kóšty zmištrować? Tute prašenje steješe w srjedźišću dźensnišeje wosebiteje konferency wobchadnych ministerkow a ministrow krajow. Wobchadne zawody su tuchwilu energijoweje krizy dla z enormnym stopnjowanjom kóštow konfrontowane. Krajni politikarjo su we widejowej konferency wobrěčeli, hač móža so zwjazkowe kraje w tutym prašenju na zhromadne žadanje zwjazkowemu wobchadnemu ministerstwu dojednać. Wšako maja busy a železnicy najebać stupace płaćizny za ćěriwo a milinu swój dotalny poskitk zachować.
Amtěrowaca předsydka konferency wobchadnych ministrow je Bremenska wobchadna senatorka Maike Schaefer (Zeleni). Jeje rěčnik skedźbni na to, zo dyrbjachu wobchadne zawody minjene měsacy sylne stopnjowanja kóštow dla energijoweje krizy znjesć. K podpěrje by pomocny fonds předstajomny był, přirunajomny z wosebitym fondsom w koronakrizy, rěčnik informuje.
To a tamne (26.08.22)
Wopačneje wjedroweje prognozy dla su nawodnicu madźarskeje wjedrarnje a jeje zastupnika pušćili. Medije tukaja na to, zo ma pušćenje něšto z wěšćenjom wjedrarnje činić, po kotrymž běchu tradicionalny wohnjostroj na dnju narodneho swjatka 20. awgusta wotprajili. Wjedrarnja bě do toho ćežke njewjedro nad stolicu Budapestom připowědźiła. Njewjedro pak njepřińdźe.
Wobmjezowanje spěšnosće planuja w Düsseldorfje – tola jenož za kolesowarjow. Tak chcedźa na Düsseldorfskej Schadowej tempo 10 km/h za kolesowarjow wukazać. Na woblubowanej nakupnej dróze běchu před lětami kolesowarsku šćežku zarjadowali. Ta pak njeje wot pasma pěškow ani twarsce ani optisce dźělena. Tuž přińdźe tam stanje zaso ke konfliktam mjez kolesowarjemi a pěškami. Kak chcedźa limit spěšnosće kontrolować, njeje jasne.
„Wojujemy hač do kónca“
Ukraina 31. róčnicu njewotwisnosće wot Moskwy woswjećiła
Kijew / Moskwa (dpa/SN). Najebać nowe ruske nadpady je Ukraina wčera dźeń njewotwisnosće woswjećiła. Přez ruske wobtřělenje na dwórnišću Čaplyne w kónčinje Dnipropetrowsk bu po informacijach prezidenta Wolodymyra Zelenskeho znajmjeńša 25 ludźi morjenych a něhdźe 50 zranjenych. Po prěnich rozprawach bu wosobowy ćah trjecheny. Wjednistwo w Kijewje přizjewi nimo toho ruske raketowe nadpady we wšelakich regionach. Podaća wójnskich stron njehodźa so njewotwisnje přepruwować. Wójna traješe srjedu dokładnje poł lěta.
Ruska bě susodny kraj 24. februara nadpadnyła. Šěsć měsacow pozdźišo dawatej so wobě stronje dobyća wěstej – najebać tysacow mortwych, zapusćenjow a sprostnjeneho wojerskeho połoženja na fronće. Zelenskyj potwjerdźi zaměr, wšitke wobsadźene kónčiny wróćo zdobyć. USA připowědźa dalšu brónjensku pomoc w hódnoće třoch miliardow eurow. Tež zwjazkowy kancler Olaf Scholz (SPD) podpěru potwjerdźi. Hromadźe z wjace hač 50 druhimi krajemi namołwjachu Němska a USA Moskwu, wójnu hnydom skónčić.
Namócnosće wopominali
Rostock (dpa/SN). 30 lět po rasistiskich namócnosćach w Rostocku-Lichtenhagenje chcyše zwjazkowy prezident Frank-Walter Steinmeier dźensa tehdyše podawki wopominać. Přizjewiła je so tež ministerska prezidentka Mecklenburgsko-Předpomorskeje Manuela Schwesig (SPD). Wot 22. awgusta 1992 běchu wobydlerjo a prawicarjo centralu za přizjewjenja požadarjow azyla a internat vietnamskich dźěłaćerjow nadběhowali a zapalowali. Běchu to najhórše rasistiske namócnosće w powójnskich stawiznach Němskeje.
Köpping kritizuje rjadowanja
Drježdźany (dpa/SN). Sakska ministerka za strowotnistwo Petra Köpping (SPD) je wot zwjazkoweho knježerstwa planowane winowatostne wužiwanje nahubnika FFP2 w spěšnikach kritizowała. W sakskim bliskowobchadźe trjebaja ludźo jeničce medicinski nahubnik. Tole měło tež w dalokowobchadźe móžne być. Nimo toho ma wona rjadowanja k darmotnym koronatestam za překomplikowane. Tak dyrbja ludźo dopokazać, zo chcedźa starownju abo hladarnju wopytać.
Šef policije pušćeny
To a tamne (25.08.22)
Z policistami po całty šoł je dźewjećlětny w mecklenburgsko-předpomorskim Ueckermündźe. Pachoł chcyše njedźelu rano staršeju z čerstwymi całtami překwapić a so skradźu z bydlenja zminy. Hólc pěškej napadny, dokelž steješe samlutki před zawrjenej pjekarnju. Přiwołana policija pak móžeše pjerachej pomhać a jědźeše z nim k druhej pjekarni. Na to dowjezechu hólca z całtami k staršimaj.
Awtomat šokolody ze staplowakom přetřasł je 34lětny na Mnichowskim lětanišću, po tym zo bě šokoloda w nastroju tčacy wostała. Z njewšědnym postupowanjom měješe sobudźěłaćer wačokoweho wotrjada drje najprjedy raz wuspěch. Nětko pak žada sej lětanišćo narunanje nastateje škody při awtomaće.
Ćěriwo hižo nětko dróše
Mnichow (dpa/SN). Dobry tydźeń do kónca tak mjenowaneho tankoweho rabata su płaćizny ćěriwow zaso zlochka stupali. Po nišich płaćiznach a krótkodobnej stagnaciji je ćěriwo nětko zaso dróše, zdźěli němski awtomobilowy klub ADAC. Přičina wyšich płaćiznow je najskerje naprašowanje hladajo na powyšenje přichodny tydźeń. Po informacijach ADAC su wotwisnje wot poskićerjow a regiona rozdźěle płaćiznow wjetše hač hewak.
Gamescom dźensa zahajili
Köln (dpa/SN). Po dwěmaj wudaćomaj bjez publikuma su dźensa w Kölnje zaso wiki Gamescom zahajili. Prěni dźeń smědźa sej fachowcy nowe hry wobhladać. Wot jutřišeho hač do njedźele su wiki wšitkim zajimcam wotewrjene. Po informacijach zarjadowarjow su kartki za sobotu wupředate. Wočakowanu ličbu wopytowarjow njejsu zarjadowarjo do toho zdźělili. Ličba tiketow pak je mjeńša hač w lětach do korony, hdźež bě 370 000 ludźi přehladku wopytało.
Přiwótřene naprawy móžne
K prěnjej wuměnje wo šansach za město Budyšin a wokolinu při ...
Warnuja před nadpadami
Kijew (dpa/SN). Hladajo na wobmyslenja wo móžnym přiběranju ruskich nadpadow přichodne dny su USA swojich wobydlerjow na Ukrainje k hnydomnemu wopušćenju kraja namołwjeli. Pósłanstwo USA w Kijewje je wčera k tomu nowe wěstotne warnowanje wozjewiło, w kotrymž rěka: „Wonkowne ministerstwo ma informacije, po kotrychž chce Ruska swoje prócowanja zesylnić, přichodne dny nadběhi přećiwo ciwilnej infrastrukturje Ukrainy a knježerstwowym zarjadnišćam startować.“
Ukraina swjeći dźensa – runje poł lěta po nadpadźe Ruskeje – 31. róčnicu swojeje njewotwisnosće wot Sowjetskeho zwjazka. Tuž so tam boja, zo móhła Ruska dźeń za wosebje ćežke nadpady znjewužiwać. Wozjewjenje njeje prěnje přirunajomne wěstotne warnowanje. Hižo měsac do zahajenja wójny, 24. januara běchu wšitkich staćanow USA k wupućowanju namołwjeli. W juliju pak wozjewichu USA warnowanje před ćežkimi raketowymi nadpadami.
Čakaja njesćerpnje na koncept
Schwedt (dpaSN). Štyri měsacy do zahajenja wolijoweho embarga přećiwo Ruskej pobrachuje po informacijach dźěłarnistwa za chemiju, hórnistwo a energiju (IG BCE) konkretny koncept za rafineriju w braniborskim Schwedće. „Je najwjetši čas, zo so rozrisanje prezentuje“, wuzběhny přisłušny wobwodny nawoda dźěłarnistwa Rolf Erler powěsćerni dpa. Ludźo w Schwedće njesćerpnje na to čakaja.
Němska je so w běhu sankcijow přećiwo Ruskej na runinje EU dla zawjazała, so wot spočatka lěta 2023 dospołnje ruskeho wolija wzdać. To potrjechi rafineriju, kotraž z ruskim wolijom dźěła. Ruski wobhospodar Rosneft ma po předstawach zwjazkoweho hospodarskeho ministra Roberta Habecka (Zeleni) lědma zajim na tym, so ruskeho wolija wzdać. Habeck a jeho ministerstwo dźěłataj měsacy dołho na rozrisanju. Krótkodobnje móhli tankowcy a přistaw z Rostocka něhdźe 60 procentow potrjeby za rafineriju zaručić. Tež dodawanje wolija z Pólskeje je móžne. Přiwšěm je přichod zawoda njewěsty.
