Budyšin (SN/MWj). Z wosebitym listom je so wjednistwo internata Budyskeho Serbskeho gymnazija na sobudźěłaćerki šwalčernje Serbskeho ludoweho ansambla wobroćiło. Tak nawodnica Gerlind Šubertowa pisa, zo so tuchwilu wo to prócuja internat pod wysokimi měritkami strowotniskeho zarjada zaso do słužby stajić. „Kak a hdy naši młodźi wobydlerjo zaso do šule smědźa, hišće jasne njeje, a to wobstejnosće wobćežuje. Někotre starosće njehodźa so rozrisać.“ Jedna tajka starosć bě, zo sej zarjad žadaše, měć něhdźe 150 škitow za hubu a nós, kotrež hodźa so wupłokać, a to za wobydlerjow a personal. „Poskitk šwalčernje SLA, nam spontanje wupomhać – w běhu krótkeho časa a darmo –, běše za nas kaž wumóženje. Hižo po jednym tydźenju smědźach tajke škitne zakryća w ruce dźeržeć“, so Gerlind Šubertowa wjeseli. W mjenje Rěčneho centruma WITAJ jako nošerja, wšěch kubłarjow a wobydlerjow dźakuje so wona cyle wutrobnje za podpěru a tohorunja za dar dźěłoweho časa a materiala.
Tysacy studentow žadaja sej njekomplikowanu podpěru stata w formje nuzoweho fondsa. Mnozy su koronapandemije dla swój studentski job zhubili. W Sakskej je tuchwilu 108 000 studowacych, z kotrychž je wulki dźěl peticiju wo hnydomnu pomoc podpisało.
Podstupim/Drježdźany (SN/MiR). Internetna peticija měri so na zwjazkowy sejm. Tak žadaja sej na studenta jónkrótnje 3 000 eurow, zo bychu nuzowy staw přichodne štwórć lěta přetrali. Dotal je peticiju wjace hač 54 000 studowacych a podpěraćelow podpisało. Studenća so jara starosća, dokelž su swój studentski job zhubili a tak hižo pjenjezy nimaja swoje wšědne wudawki zarunać.
Wot 18. měrca su wšitke šule w Sakskej zawrjene. Wukaz płaći najprjedy raz hač do kónca jutrownych prózdnin. Wo wuknjacych zakładnych a spěchowanskich šulow, kotrychž starši w systemorelewantnych powołanjach skutkuja, staraja so wučerjo w šuli. Wjetšinu dźěći pak starši doma hladaja.
Budyšin (SN/MiR). „Potrjechene dźěći, kotrychž starši dyrbja dźěłać, tuchwilu wšědnje na šulach nuzowje zastaruja. To chcemy tež w jutrownych prózdninach činić“, rozłožuje rěčnik Budyskeje regionalneje wotnožki Krajneho zarjada za šulu a kubłanje (LaSuB) dr. Jens Drummer. Wučerjo zakładnych kaž tež spěchowanskich šulow nětko wšědnje dale na swojich šulach dźěłaja, tež hdyž nic wšitcy nadobo, ale wotměnjejo so a wot doma, to rěka w homeofficu. „Zasadźenje wotpowěduje normalnemu postupowanju. Tež hdyž sej to přeco hišće wjele ludźi mysli, wučerjo nimaja kaž šulerjo prózdniny, ale dyrbja dźěłać – hač na tón čas, hdyž maja dowol“, dr. Drummer wuswětla. To rěka, zo njebudu wučerjo, kotřiž su za tydźeń po jutrach wo dowol prosyli, do nuzoweho zastaranja kaž tež do homeoffica zapřijeći.
Rozsudźić so za praktikum w Ludowym nakładnistwje Domowina njebě Janoshej Kluze ćežko. Wšako zajimuje so 21lětny student za rěče, wosebje słowjanske. Wón je w redakciji Serbskich Nowin – wjacore jeho přinoški smy w serbskim dźeniku wozjewili – kaž tež w lektoraće LND skutkował. Tam je wšelake manuskripty přełožił. „Za mój studij njeběše dźěło w LND jenož dobre nazhonjenje, ale pohon, sej swoje přeće wo pozdźišim skutkowanju jako žurnalist abo lektor pohłubšić“, wón powěda.
We wobłuku swojeho wědomostneho studija na Uniwersiće Greifswald studuje Janosh Kluga slawistiku a anglistiku. Za oxfordsku abo amerisku jendźelšćinu so wón hišće doskónčnje rozsudźił njeje. We wobłuku slawistiki studuje mjeztym w štwórtym semestrje čěšćinu a ukrainšćinu. „Mjez docentami tón abo tamny tež stawizny serbskeje rěče a jeje wosebitosće do studija zapletuje. Wjacori wědźa, zo ma Greifswald słowjanske korjenje“, Janosh Kluga rozłožuje, „přichodny čas chcu tam dale za swědkami słowjanskeje doby pytać, kaž je to na přikład rěka Ryck, kotraž po Greifswaldźe čeće.“
Choćebuz (SN/MiR). Serbske šulske towarstwo je wčera prěni delnjołužiski internetny poskitk za dźěći online stajiło. Su to serbskorěčne materialije a ideje za praktiske dźěło kubłarkow z chowancami dźěćacych dnjowych přebywanišćow. Projekt orientuje so na před njecyłymaj lětomaj zawjedźenym hornjoserbskim poskitku www.dyrdomdej.de. „Internetna strona www.dyrdakojstwo.de pak měri so tež na dźěći a swójby“, wuswětla předsydka Serbskeho šulskeho towarstwa Ludmila Budarjowa. Nětko su wćipni na reakciju tych, kotřiž so z prěnim poskitkom zaběraja. A chcedźa jón krok po kroku rozšěrić. Partnerka za Delnju Łužicu a za wšitkich, kiž maja prašenja abo chcedźa stronu z dalšimi idejemi wobohaćić, je Mila Zachariasowa.
Załožba za serbski lud zwoprawdźenje projekta spěchuje. Ze spěwami, powědančkami a pohibowanjom chcedźa wužiwarjow pohonjeć, delnjoserbsku rěč nałožować a so w njej dale wukmanić. Dźěćom, staršim, kubłarkam a kubłarjam kaž tež dźědam a wowkam pomhaja při tym Majka, Flori, Lenka a Karlo – figury, kotrež po poskitku wjedu.