W internaće plincy pjekli
Někotři wobydlerjo internata Budyskeho Serbskeho gymnazija su so minjeny štwórtk zetkali, zo bychu zhromadnje plincy pjekli. Cyły dom za słódnym ćěstom wonješe, štož mnohich šulerjow přiwabi.
Jejka za ćěsto smy wuduli. Chcychmy je za wóskowanje jutrownych jejkow wužiwać. W horcej pónoji z butru abo wolijom potom jedyn plinc po druhim napječechmy. Při tym dźěłachmy kaž w pjekarni. Zo bychu so złoto-brune plincy spěšnišo na nas smjeli, měješe kóždy swój nadawk. Plincy z nazhonjenjom a z wosebitej techniku – je do powětra mjetajo – wobroćachmy.
Prěnja škla ćěsta bě bórze prózdna, tuž změšachmy hnydom dalšu šklu a po tym samo hišće třeću, zo móhli cyły internat nasyćić. Knjez Pöpel dyrbješe dwójce nakupować hić, dokelž přidawki tak spěšnje přetrjebachmy. Hotowy plinc z pónoje hnydom na taler połožichmy, zo móhli jón šulerjo ćopły a čerstwy jěsć. Wulki nawal šulerjow do kuchnje k tomu wjedźeše, zo na kóncu ani jenički plinc wyše njezwosta.
Drježdźanscy Serbja ptači kwas swjećili
Drježdźanske towarstwo Stup dale je minjenu njedźelu serbskich wobydlerjow sakskeje stolicy a dalšich zajimcow na ptači kwas witało. Zarjadowanje wotmě so na žurli wosady „Marije donjebjeswzaća“ w Strěžinje. Wosom serbsko-němskich swójbow z 13 dźěćimi w starobje wot jednoho lěta hač do 15 lět bě přeprošenje sćěhowało. Krótko po třoch zastupowaca předsydka towarstwa Nadja Herbichowa přitomnych powita.
Swójby wužiwachu móžnosć, nałožk ptačeho kwasa tež zwonka Łužicy w zhromadnosći hajić. Ptače pjerka, ptača chěžka, klance w serbskej drasće, wobrazy wo ptačkach atd. atmosferu přisporjachu. Po spěwčkach a rejkach dachu sej kofej słodźeć. Nimo słódnych srokow a tykanca poskićeše towarstwo tež zaběru a paslenje. Tak zhotowichu nowolětka a pomolowachu ptače chěžki. Po dwěmaj hodźinomaj zaspěwachu sej posledni spěwčk a zarejowachu sej poslednju rejku. Towarstwo Stup dale dźakuje so wšitkim za čiłe wobdźělenje kaž tež za mały dar a so hižo wjeseli, wopytowarjow tež klětu zaso witać móc.
Premjera w Serbskej pěstowarni w Delanach
W statnej kencliji ministerskemu prezidentej ptači kwas předstajili
Tydźenje dołho hižo knježeše we Worklečanskej pěstowarni „K wódnemu mužej“ mjez našimi předšulskimi dźěćimi napjate předwjeselo. Za tradicionalny ptači kwas wšitcy pilnje zwučowachu, spěwy wuknjechu, reje nazwučowachu a kóždy detail luboznje přihotowachu. K tomu dóńdźe powěsć, kotraž samo najwjetšu fantaziju dźěći přetrjechi – přeprošenje ministerskemu prezidentej Michaelej Kretschmerej do Drježdźanskeje statneje kenclije, zo bychmy tam naš ptačokwasny program předstajili.
Rozbudźenosć bě přewšo wulka! Skónčnje zaso wulka jězba z busom, woprawdźity dyrdomdej za dźěći. Jako bu potom tež hišće znate, zo nas Serbska telewizija za wusyłanje „Wuhladko“ tutón wosebity dźeń přewodźa, njeznaješe zahoritosć hižo hranicy. Hižo dny do toho bě napjatosć w dźěćoch hoberska.
Wjesela so na wustup w sukelnicy
Aktiwni a spěchowacy čłonojo chóra Budyšin su so póndźelu w klubowni Serbskeho ludoweho ansambla k swojej hłownej zhromadźiznje zešli. Předsyda chóra Benjamin Wirth analyzowaše w swojej rozprawje zašłe lěto. Při tym zhladowaše na chórowe lěhwo w Ochranowje, na šěsć wustupow, tři nahrawane spěwy a tři chórowe swjedźenje. Wón wuzběhny wuspěšny koncert ćichu sobotu w Budyskim Serbskim muzeju, tradicionalne lětne spěwanje na Čornoboze, beneficny koncert Rotary-kluba w Marije Marćinej cyrkwi na dobro Budyskeje wokrjesneje hudźbneje šule, wobrubjenje kermušneho nyšpora w Zdźěrjanskej cyrkwi, zahajenje Wjacławskich wikow w Budyšinje z mjezynarodnymi hodownymi spěwami a wustup na adwentničce župy „Jan Arnošt Smoler“ w Serbskim domje.
Na zhromadźiznje witachu noweho čłona Michała Šołtu a počesćichu dwě jubilarce: Dagmar Pawolska je chórej hižo 25 lět swěrna, Anja Krawcowa pak 15 lět. Dirigent chóra Michał Janca so chorosće dla wobdźělić njemóžeše. Cyły chór jeho postrowi a jemu dobre polěpšenje přeješe.
Zhromadny projekt so radźił
My šulerjo Serbskeje zakładneje šule ,,Michał Hórnik“ Worklecy smy loni srjedź decembra adwentny koncert w našej sportowej hali wuhotowali. Koncert měješe titul ,,Dohodowny dyrdomdej“. Předstajichmy w nim hodowne nałožki druhich krajow.
W septembrje smy z probami započeli. Zwučowachmy w třoch skupinach: rejowarki, dźiwadźelnicy a chór. Chór nawjedowachu knjeni Ošikowa, knjeni Cyžowa a knjez Hejduška. Wo dźiwadło postara so knjeni Hojerec, kotraž bě tež stawiznu, tak mjenowany libreto, napisała. Reje je Katharina Hermanowa wot Serbskeho ludoweho ansambla z nami nastudowała. Tydźeń do koncerta zwučowachmy wosebje intensiwnje w sportowej hali. Wučerjo a domownicy přihotowachu jewišćo a cyłu halu. Pjatk dopołdnja, na dnju koncerta, přewjedźechmy ze wšěmi sobuskutkowacymi generalku.
Pěstowarni defibrilator dariłoj
Ralbicy. „40 lět – 40 dobrych skutkow“ je hesło akcije, kotruž składnostnje swojeho 40lětneho wobstaća firma Beier tzwr ze Zhorjelca přewjeduje. Zawod poskićuje techniku a serwis kołowokoło chłódźenja, mróženja a klimy. Jedyn z tutych 40 dobrych skutkow wjedźeše jednaćelku firmy Viviane Beier minjeny tydźeń do Ralbic, hdźež přepoda wjednistwu tamnišeje serbskeje pěstowarnje defibrilator. To je nastroj, kotryž móže čłowjekej w nuzy žiwjenje wuchować, z tym zo myleny rytmus wutroby w nuzowym padźe z pomocu elektriskich šokow normalizuje. W prěnim rjedźe to wězo pedagogiski instrument njeje. Pěstowarnja pak ma jako zarjadnišćo nadawk, wěstotu dźěći zaručeć. Tomu ma sponsorowany nastroj w trěbnym padźe słužić. Nimo firmy ze Zhorjelca je so na darowanskej akciji tež w Delanach bydlacy předewzaćel Tomaš Bjeńš z pjenježnej podpěru wobdźělił. Serbska pěstowarnja so woběmaj firmomaj wutrobnje za jeju dobry skutk dźakuje.
Jadwiga Nukowa
Popołdnjo zhromadnosće dožiwili
Minjeny štwórtk wotměchu so na ležownosći Worklečanskeje pěstowarnje „K wódnemu mužej“ znowa małe, luboznje wupyšene adwentne wiki. Druhi raz běštej angažowana staršiska rada a team kubłarkow na wosebity swjedźeń přeprosyłoj. Cyłe kubłanišćo bě rjenje wupyšene. Kubłarki a kubłarjo, starši a staršiska rada běchu za to wjacore tydźenje paslili, dekoraciju přihotowali a planowali. Wuslědk běchu harmoniske wiki, kotrež wuprudźachu ćopłotu a zhromadnosć.
Wosebje wabješe wulki bifej, za kotryž běchu starši a pěstowarske skupiny tykanc, poprjancy, přikuski, horce wino a dźěćacy punš přihotowali. Na stejnišćach poskićachu swěčki, wudebjene škleńcy, hodowne kule, pječwo a druhe maličkosće.
Adwentne wiki přitulne byli
Nowa Wjeska. Dohodowne wjeselo knježeše minjenu sobotu na nawsy w Nowej Wjesce. Tam přichadźeše tójšto ludźi na tradicionalne adwentne wiki. Wopytowarjow wočakowachu wonjate chłóšćenki, horce napoje, dujerska hudźba a žadny hósć z dalokeho sewjera. Hižo popołdnju knježeše we wsy hołk a tołk. Wjeršk pak bě, jako rumpodich přińdźe, sej přeća najmłódšich wjesnjanow naposka a jim ze swojeho měcha mału překwapjenku wobradźi.
Wo hudźbne wobrubjenje postarachu so młodźi dujerjo, kotřiž ze swojimi instrumentami klasiske a moderne hodowne pěsnje zanjesechu. Jich zynki swjatočnu atmosferu hišće přisporjachu. Tež kulinariski poskitk bě mnohostronski. Tak móžachu hosćo runje tak burgery kaž praženu kołbasku abo słódke, ze šokoladu poćehnjene płody woptać. Njebě stajnje lochko, so za to jedne abo tamne rozsudźić.
Wosebje rjenje bě při lěhwowym wohenju, hdźež so Nowowješćenjo a jich hosćo ze šalku horceho wina w ruce zhrěchu. Adwentne wiki w Nowej Wjesce skićachu tež lětsa zaso poradźenu měšeńcu tradicije, wokřewjenja a zhro- madnosće. Emma Młynkec
Rěčacy fotowy album nastał
Na přeprošenje rěčneje motiwatorki Marije Šołćic je tele dny we Wojerowskim Domowinskim domje we wobłuku dźěłarnički rěčacy fotowy album nastał. Jedna z wobdźělnikow je swój fotowy album sobu přinjesła. Mjez druhim widźiš w nim jeje swójbnych w młodych lětach. Zo bychu tež potomnicy hišće wědźeli, koho na fotach widźa, je Marija Šołćic z BOOKii-pisakom wšitke trěbne informacije zwěčniła – a to serbsce kaž tež němsce. Jedna ze serbskich wopytowarkow, něhdyša wučerka za biologiju a chemiju, běše překwapjena wo ideji, zo móžeš rěčace fota hač do Awstralskeje a druhdźe pósłać. Tež wona chce nětko dary wosebiteho razu přihotować a hromadźe z BOOKii-pisakom přiwuznym pósłać. Dźěłarničku wospjetuja sobotu, 6. decembra, wot 10 do 12 hodź. w Budyskej Serbskej kulturnej informaciji.
Dale móža sej zajimcy 4. a 18. nowembra wot 14 do 16 abo wot 17 do 19 hodź. we Wojerowskim Domowinskim domje hodowne kule ze serbskimi motiwami wudebić. Marija Šołćic
