Wustajeńca dale pućuje
Kamjenc. Loni nastatu wustajeńcu wo česćowanju swjateho Bosćana w Chróšćanskej wosadźe wotewru jutře, srjedu, w 19 hodź. w Kamjenskej Haninej cyrkwi. Nawodnica Lessingoweho muzeja dr. Sylke Kaufmann wopytowarjow po přehladce powjedźe.
Na swjedźenišću maja wodu
Němcy. Na iniciatiwu wjesneho a młodźinskeho kluba ma wjesne swjedźenišćo w Němcach nětko swójski přizamk za wodu. Hłubokotwarske dźěła za 70 metrow dołhu rołu je twarski zawod ze wsy přewzał. Sobudźěłaćer Wojerowskich zastaranskich zawodow je wšitko přizamknył. Nowy hydrant słuži zdobom za rjedźenje wodowoda.
Radźićeljo so schadźuja
Radwor. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w jědźerni tamnišeje zakładneje a wyšeje šule. W zjawnym dźělu schadźowanja póńdźe mjez druhim wo wobstaranje nowych laptopow za wučerjow a wo dróhotwarske dźěła w Boranecach.
Přizjewjenja hišće móžne
Přewjeduja dźěłarničku
Do Dubrjenskeho bahna
Michałki. Kulowska přirodoškitna skupina Nabu přeproša za zajutřišu njedźelu na prózdninske pućowanje po Dubrjenskim bahnje. Zajimcy zetkaja so w dźewjećich při hosćencu w Michałkach. Wobdźělenje płaći dwaj euraj za dorosćenych, dźěći smědźa darmotnje sobu hić.
Přewjedu hornčerske wiki
Hózk. Mjeztym hižo 18. raz wotměja so jutře a njedźelu w Hózku hornčerske wiki. 18 wobdźělnikow chce tam swoje twory poskićeć. Mjez nimi budu někotři, kiž su wot wšeho spočatka pódla, a dalši, kotřiž prěni raz přijědu. Wopytowarjow zastaruja z ćopłymi jědźemi kaž tež z čerstwym tykancom.
Za dźěłarničku so přizjewić
Na hłownu zhromadźiznu
Konjecy. Hońtwjerske drustwo Konjecy přeproša swojich čłonow na hłownu zhromadźiznu, kotraž budźe zajutřišim, 6. awgusta, w 19.30 hodź. w Konječanskej burskej stwě. Dnjowy porjad je we wuwěškowym kašćiku wupowěsnjeny.
Za pruwowanja so přizjewić
Budyšin. Rěčny centrum WITAJ přewjedźe 18. septembra pruwowanja za rěčny certifikat hornjoserbšćiny A2 a B2. Informacije k pruwowanjam a zwučowanski material namakaja zajimcy pod . Přizjewjenja přijimuje RCW hač do 18. awgusta. Dalše informacije podawa Manuela Smolina pod telefonowym čisłom 03591/ 550 413 abo e-mailnje pod manuela.smolina@witaj.domowina.de.
Kniha změje premjeru
Budyšin. Křesćan Krawc předstaji zajutřišim, 5. awgusta, swoju knihu „Was wir in uns tragen“ w Budyskej Smolerjec kniharni, a to nimale po zwučenym wašnju w 19 hodź. na městnje. W Ludowym nakładnistwje Domowina wušła zběrka portretow je přełožk publikacije „Sej statok stajili“ a wopřijima tohorunja reportažu wo „Chróšćan zběžku“. Wopytowarjo měli płaćiwe postajenja hygieny wobkedźbować.
Pomhaja pěstowarni
Budyšin. Na iniciatiwu Budyskeho Lionsoweho kluba su so štyri kluby regiona k zhromadnej akciji zjednoćili pomhać wot přepławjenja potrjechenej kónčinje nad rěku Mosel. Budyski klub wobdźěli so z 5 000 eurami. Dorostowa organizacija kluba Leo Club je 2 000 eurow přinošowała. Pjenjezy su za dospołnje skóncowanu pěstowarnju w porynsko-pfalcskim Salmtalu. Dalše pjenežne dary na konto Lionsoweho kluba pod čisłom DE39 8509 0000 5091 8010 37 su rady witane.
Za čestnohamtske dźěło
Budyšan turněr dobył
Chrósćicy. Jurij Hanto z Budyšina je minjenu wutoru škotowy turněr serbskich seniorow dobył. Cyłkowne hódnoćenje nawjeduje nětko Gerat Šmeling před Wolfgangom Kühnom a Křesćanom Weclichom. Přichodny turněr wotměje so 31. awgusta w Radworskej „Zelenej hałžce“. 14. septembra podadźa so škotowarjo na wulět do Błótow. Za njón móža so hač do 8. awgusta přizjewić.
We wsy zaso swjeća
Sernjany. Mały wjesny swjedźeń přewjedu tónle kónc tydźenja w Sernjanach. Jutře w 14 hodź. započnje so soccerowy turněr. Hodźinu pozdźišo su dźěći na zabawu přeprošene, wot 21.30 hodź. budźe kino pod hołym njebjom. Njedźelu wot 10 hodź. su wšitcy na rańše piwko a bjesadu přeprošeni. Póndźelu wot 17 hodź. chcedźa tam stan zaso zhromadnje wottwarić.
Raz kaž ranger być
Poskićeja socialne lěto
Budyšin. Za čas wot 1. septembra 2021 hač do 31. awgusta 2022 poskića Muzej Budyšin młodym zajimcam, přewjesć dobrowólne socialne lěto we wobłuku měšćanskich a kulturnych stawiznow. Do jich nadawkow słuša inwentarizować a digitalizować objekty, hladać a rozšěrić datowu banku, rešeršować za wustajeńcy a pomhać wosebite přehladki sobu natwarić a wottwarić. Nadrobniše informacije dóstanu zajimcy pod telefonowym čisłom 03591/ 534 931.
Radźićeljo wuradźuja
Wotrow. Dalše twarske dźěła we wobłuku saněrowanja šulskeho twarjenja w Pančicach-Kukowje budu jedna z temow přichodneho posedźenja tamnišeje gmejnskeje rady jutře w 19 hodź. na Wotrowskej starej šuli. Dale zaběraja so radźićeljo z ponowjenjom wjesneje dróhi w Kanecach, za čož dyrbi gmejna nětko roły, wobhrodźenja a zornowcowe plesternaki kupić. Nimo toho póńdźe wo nowu bydlensku štwórć při Srjedźnym puću w Pančicach-Kukowje.
Wot wčerawšeho twarja
Žuricy (SN). Dróhotwarskej projektaj w Budyskim wokrjesu staratej so wot wčerawšeho wo poćeženje wobchada. Hač do 20. awgusta ponowjeja wokrjesnu dróhu K 7266 wot křižowanišća při Porchowskim přemysłownišću hač na kromu Žuric. Dróha wostanje cyły čas dospołnje zawrjena. Šoferojo měli B 98 a S 94 wužiwać. Hač do spočatka septembra ponowjeja tež Salowski puć w Kulowje, štož stanje so w dwěmaj twarskimaj wotrězkomaj. Tež ta dróha je w času twarskich dźěłow dospołnje zawrjena. Wokołopuć wjedźe wot Hózka přez Koćinu a Salow.
Za wulět so přizjewić
Čorny Chołmc. Drježdźanske towarstwo Stup dale planuje 15. awgusta přewjesć wulět do Čornochołmčanskeho Krabatoweho młyna. Nimo wodźenja a wobjeda je předwidźane, Drježdźanske dźěći serbsku narodnu drastu woblec a z nimi program nazwučować. Za to móža so zajimcy hač do kónca julija pola Jadwigi Pjacec pod telefonowym čisłom 0176/ 429 86 468 přizjewić. Wot 14.30 hodź. chcedźa publikumej swój program předstajić. Na to su potom wšitcy přeprošeni.
Popołdnjo za swójby
Budyšin. Pisane popołdnjo za serbske swójby wotměje so zajutřišim, njedźelu, w Sundowner-barje na zahrodźe Serbskeho ludoweho ansambla w Budyšinje. Započatk je w 15 hodź. Wšelakore serbskorěčne poskitki za dźěći su přihotowane, mjez druhim hry pod hołym njebjom, paslenje a překwapjenki. Zarjadowarjo, župa „Jan Arnošt Smoler“, zamołwity za Sundowner-baru Beno Brězan a partnerojo so nadźijeja, zo přińdźe prawje wjele swójbow z Budyšina a wokoliny.
Seniorojo škotuja
Chrósćicy. Přichodny škotowy turněr serbskich seniorow wotměje so wutoru, 27. julija, w 14 hodź. w Chróšćanskim Krawčikec hosćencu. Kaž organizator Měrćin Nowak zdźěli, planuja 14. septembra tradicionalny wulět škotowarjow, kiž powjedźe tónraz do Błótow. Zajimcy njech přizjewja so pola Alojsa Langi (tel. čo. 035792/ 50 126) abo pola Měrćina Nowaka (tel. čo. 03585/ 402 420.
Z busom do Krupki
Radwor. Na putnisku Božu mšu srjedu, 25. awgusta, w 10 hodź. w Krupce pojědźe zaso bus. Štóž chce sobu jěć, njech so w Šmitec wozydłownistwje w Radworju přizjewi (tel. čo. 035935/ 28 60).
