Zakónča wustajeńcu
Zarěč. W konsumowej galeriji Zarěčanskeho knježeho domu přewjedu pjatk, 26. junija, w 17 hodź. dalše zjawne zarjadowanje. Z finisažu zakónča tam wustajeńcu z wobrazami Petry Ehrlich z Kinsporka a ze skulpturami Olafa Klepziga z Rabenauwa. Lawdaciju změje Thomas Gerlach. Wo hudźbne wobrubjenje budźe postarane, rěka w přeprošenju. Wšitcy zajimcy su wutrobnje witani.
Pytaja dohlad za biblioteku
Budyšin. Budyska měšćanska biblioteka pyta čestnohamtskeho sobudźěłaćerja /čestnohamtsku sobudźěłaćerku jako dohlad za čitansku žurlu. Zasadźeny/zasadźena budźe zwjetša jónu wob tydźeń we wotewrjenskim času, za čož płaća měsačne zarunanje. Zajimcy njech přizjewja so pod telefonowym čisłom 03591/ 534 811.
Radźićeljo so zetkaja
Pančicy-Kukow. Přichodne posedźenje gmejnskeje rady Pančicy-Kukow wotměje so štwórtk, 25. junija, w 19 hodź. na Wotrowskej starej šuli. Mjez druhim chcedźa tam přepodać nadawk za wuměrjenje jednotliwych twarskich ležownosćow w nowej bydlenskej štwórći při Srjedźnym puću w Pančicach-Kukowje.
Pytaja změrca
Wulka Dubrawa/Radwor. W juliju skónči so wólbna doba změrca Wulkodubrawskeje gmejny. Tohodla pytaja tam nětko zajimcow, kotřiž chcyli tónle čestnohamtski nadawk za gmejnje Wulka Dubrawa a Radwor wukonjeć. Zajimcy njech přizjewja so hač do 3. julija pisomnje na Wulkodubrawskim gmejnskim zarjedźe.
Benedikt Dyrlich čita
Njebjelčicy. Na knižne předstajenje z awtorom Benediktom Dyrlichom štwórtk, 25. junija, w 19 hodź. w towarstwowej stwě Njebjelčanskeje gmejny přeprošeja Ludowe nakładnistwo Domowina, Domowinska skupina Njebjelčicy a tamniša gmejna. Awtor čita ze swojeje knihi „Doma we wućekach 2“, kotraž je loni nazymu wušła. Z wječorkom Ludowe nakładnistwo Domowina po wobmjezowanjach korony dla swoje knižne předstajenja zaso zahaji. Přiwšěm płaća powšitkowne postajenja hygieny, městna su dodźerženja wotstawkow dla wobmjezowane.
Pytaja žadnostki
Nowy zakładny kurs serbšćiny
Pančicy-Kukow. W nowym šulskim lěće poskići Rěčny centrum WITAJ znowa zakładny kurs serbšćiny za staršich serbšćinu wuknjacych dźěći a dalšich zajimowanych dorosćenych. Kurs wotměje so wot 7. septembra 2020 hač do 18. januara 2021, stajnje póndźelu wot 19 hač do 20.30 hodź. w Šuli Ćišinskeho w Pančicach-Kukowje. Přizjewjenja přijimuje RCW e-mailnje pod abo pod telefonowym čisłom 03591/ 550 400.
Wabjenski film zestajeli
Zhorjelc. Wokrjesna hudźbna šula Třikrajowy róžk je imageowy film zestajała. Hudźbnicy, spěwarjo, dalši wuměłcy a ludźo z Łužicy a za jeje mjezami, kotřiž so ze swojej domiznu zwjazani čuja, su so na projekće „Tak dźe Sakska“ wobdźělili. Wabjenski film na woblubowany spěw wo Hornjej Łužicy bu krótkodobnje zwoprawdźeny a je na internetnej stronje hudźbneje šule třikrajoweho róžka widźeć. Zajimcy móža sej jón pod https://kreismusikschule-dreilaendereck.de/oberlausitzlied wobhladać.
Wosebity program k jubilejej
Poskićeja kurs čěšćiny
Chrósćicy. Za posledni tydźeń wulkich prózdnin, wot 24. do 29. awgusta 2020, planuje Rěčny centrum WITAJ intensiwny kurs čěšćiny za młodostnych a dorosćenych z čěskim wučerjom Janom Breindlom w Chrósćicach. Pod dodźerženjom předpisow škita před koronu ma so wšědnje wot ranja hač do zažneho popołdnja poskićeć wučba čěšćiny a popołdnju zarjadowanje k čěskim stawiznam a kulturje. Jedna so wo poskitk za započatkarjow a pokročenych. Wobdźělenje na kursu płaći 100 eurow, šulerjo a studenća płaća 50 eurow. Zajimcy njech přizjewja so w RCW pod abo pod telefonowym čisłom 03591/ 550 400. Na nadrobniše prašenja wotmołwja Jan Breindl pod abo pod tel. čo. 0179/ 24 37 041.
Pokładownja zaso přistupna
Budyšin. Wopyt Budyskeje tachantskeje pokładownje je zaso móžny. Hladajo na koronowe postajenja pak je ličba runočasnje w rumnosćach přitomnych wosobow na pjeć wobmjezowana. Wuwzaće su swójby z wjace hač třomi dźěćimi. Wodźenja tuchwilu móžne njejsu, wopytowarjo maja sej hubu a nós zakryć.
Pytaja hodowny štom
Swjedźeń chcedźa přestorčić
Brětnja-Michałki. Srjedź awgusta planowane lětuše 43. němsko-serbske swjedźenske hry w Brětni-Michałkach w tym času njebudu. Hinak hač druhdźe, hdźež su podobne podawki lětsa dospołnje wotprajili, pak wjesna rada wo tym rozmysluje swjedźeń přestorčić. Móžny termin móhł być kónc tydźenja srjedź abo kónc septembra, praji wjesny předstejićer Lothar Kujasch. Na kóždy pad pak dyrbja program přikrótšić. Kujasch móhł sej předstajić, zo zahaja swjedźeń sobotu wječor z korčmowym kwisom, štož je na lońšej premjerje dobry wothłós žnjało. Njedźelu móhli Božu słužbu w bróžni swjećić a program serbskeje rejwanskeje a drastoweje skupiny pokazać.
Wobdźěla so na swjatku hudźby
Wojerecy. We wobłuku staroměšćanskeho bulwara wobdźěli so město Wojerecy přichodnu njedźelu na Fête de la musique. Kaž stajnje na najdlěšim dnju lěta wotměja so po wšěm swěće nadróžne hudźbne akcije, kotrež je francoski kulturny minister Jack Lang 1981 do žiwjenja zwołał. We Wojerecach chcedźa 21. junija w času wot 16 do 21 hodź. pod hołym njebjom hudźić.
Twarske dźěła pozdźišo
Znowa do „Sundownera“
Budyšin. Na zahrodźe Serbskeho ludoweho ansambla změja tež lětsa baru „Sundowner“. Chcedźa ju w juliju a awgusće pod hesłom „Dobra kapka woła, hdyž so słónco chowa“ wopytowarjam spřistupnić. Zarjadowar Beno Brězan je zrěčenje z SLA mjeztym podpisał a chce so z partnerami na poskitki dojednać.
Durje wirtuelnje wotewru
Přeprošeja na kofej
Nowoslicy. Štóž chce sej zajutřišim, njedźelu, snano z kolesom do Delan wulećeć, móže rjanu přestawku na Dinarjec piwowej zahrodźe w Nowoslicach zapołožić. Wot 14 hodź. přeprošeja tam na plincy, kofej a tykanc a wězo na chłódne piwo, a to při hudźbnym wobrubjenju.
Na pišćelowy koncert
Chróstawa. Lubowarjo pišćeloweje hudźby njech njeskomdźa wosebity koncert njedźelu, 14. junija, w 16 hodź. w Chróstawskej cyrkwi. Tam poskićeja pišćelowy koncert na tamnišich Silbermannowych pišćelach. Organista Sebastiana Knebela přewodźa Thomas Friedländer na cinku. Při tym jedna so wo pišćałce podobny instrument, kotryž su předewšěm w zažnym 17. lětstotku wužiwali. Na koncerće zaklinči hłownje španiska hudźba z časa Korle V. a Philippa II. Koncert wospjetuja w 17.30 hodź. Zastup je darmotny, proša pak wo dar.
Kak so přichodnje zežiwjeć?
B 96 znowa zawru
Holešow. Přichodny tydźeń budźe zwjazkowa dróha B 96 mjez wotbóčkomaj do Holešowa a Šešowa wjacore dny dospołnje zawrjena. Kaž Budyski krajnoradny zarjad zdźěli, chcedźa na wjace hač kilometraj dołhim wotrězku wot póndźele, 15., hač do pjatka, 19. junija, jězdnju z nowej asfaltowej worštu pokryć. Wokołopuć powjedźe w tym času přez Njeswačidło, Šešow a Nižu Wjes do Rakec.
Zarjadaj zaso přistupnej
Budyšin. Při-, pře- a wotzjewjenja móža wobydlerjo města Budyšina po terminowym dorěčenju nětko zaso direktnje we wobydlerskej přizjewjerni resp. na stawnistwje wobstarać. We wobłuku sukelnicy na Nutřkownej Lawskej stej wobaj zarjadaj přećahnyłoj, a to na 2. poschod. Wopytowarjo móža lift wužiwać. Štóž ma w sukelnicy něšto wobstarać, njech wobkedźbuje, zo maš tam škit za hubu a nós nosyć. Najebać terminowe dorěčenje proša wobydlerjow wo zrozumjenje, dyrbja-li w přizjewjerni abo na stawnistwje raz čakać.
Wopyt nachwataja
Tójšto namakankow wotedali
Wojerecy. Pjeć mužacych a žonjacych kolesow kaž tež kolesowy připowěšak su wobydlerjo w meji we Wojerowskim běrowje za namakanki wotedali. Dale přiwzachu tam wosom klučow na wjacorych rynkach, awtowy klučik za wosobowe awto typa Audi, dwaj handyjej kaž tež słónčne nawoči. Potrjecheni, kotřiž su snano něšto zhubili, móža so pod telefonowym čisłom 03571/ 456 347 přizjewić a so wobhonić, hač so wo jich swójstwo jedna.
Tež w młynje maja koncept
Čorny Chołmc. Krabatowy młyn w Čornym Chołmcu je wotstawkowy a hygienowy koncept zapodał, zo móhli tam zaso zarjadowanja za wjetšu zjawnosć přewjesć. Mjez druhim chcedźa filmowe nocy a čaporowe wiki organizować. Tuchwilu poskićeja hižo wodźenja pod hołym njebjom. Hosćenc a předawanišćo zakuskow stej wotewrjenej. W přichodnych měsacach zwoprawdźa projektaj we wobłuku fondsa „Čiń sobu!“. W jednym chcedźa předstajić serbske nałožki w běhu lěta z pomocu rollup-systema.
