B 96 znowa zawrjena
Rakecy. Wot dźensnišeho hač do pjatka, 17. septembra, na zwjazkowej dróze B 96 wot wotbóčki do Šešowa hač do Rakec hornju asfaltowu worštu ponowjeja. Po něhdźe połdra kilometra dołhim twarskim wotrězku je dróha dospołnje zawrjena. Wokołopuć wjedźe wot Njeswačidła přez Šešow a Nižu Wjes do Rakec.
Prawniske poradźowanje
Budyšin. Prawiznica Ursula Mrosk-Fröde rozjimuje wutoru, 14. septembra w 17 hodź. w Budyskim žónskim centrumje na Marxowej „prěnje kroki w zwisku z dźělenjom mandźelstwa“. Poskitk žónskeje iniciatiwy sprjewineho města je darmotnyo. Tež hladanje dźěći je móžne. Zajimcy njech přizjewja so pak z mejlku na pak telefonisce pod 03591/4 23 53.
Dwórnišćo sej wobhladać
Radwor. Poněčim so Radworske dwórnišćo na integraciske zetkanišćo a přebywanišćo přeměnja. Kohož zajimuje, što je hižo nastało, njech pozastanje tam njedźelu na dnju wotewrjeneho pomnika. Towarstwo dwórnišćo inkluzije Radwor přeproša wšitkich zajimcow cyle wutrobnje na wodźenje po wobnowjenych rumnosćach. Wosebje rady chcedźa nowu kuchnju za projektowe dźěło prezentować. Wo ćělne derjeměće so wězo tež postaraja, poskićejo hrochowu poliwku, gulaš z kotoła a samopječeny tykanc.
Darmotnje do muzeja
Budyšin. We wobłuku dnja wotewrjeneho pomnika zajutřišim, njedźelu, budźe tež Budyski Serbski muzej přistupny, a to darmotnje. Na tamnišej žurli kaž tohorunja na dalšich stacijach pokazaja stawizny domu. Nimo toho móža zajimcy wosebitu wustajeńcu „machot časa – wot běłeho k čornemu“ wopytać.
Literatura w radiju
Koncertuja w cyrkwi
Budyšin. Twórbje „Missa D-dur“ a „Te Deum“ čěskeho komponista romantiki Antonína Dvořáka zaklinčitej jutře, pjatk, w 19.30 hodź. w Budyskej tachantskej cyrkwi swj. Pětra. Juhoněmski lěkarski chór a jeho orchester spěwatej a hudźitej pod nawodom cyrkwinskohudźbneho direktora Mariusa Poppa. Zastup je darmotny. Po beneficnym koncerće budźe kolekta za młodźinske dźěło wobeju tachantskeju cyrkwinskeju wosadow.
Serenada w zelenym
Stróža. Wječor do lětušich nazymskich přirodowych wikow w Stróži pola Hućiny wotměje so tam tež jutře, pjatk, serenada w zelenym. Cyle po tradiciji serbsko-němskeje kulturneje kónčiny předstaji tam w 19 hodź. Trio con moto swój dialog z knihu Jurja Brězana „Moja archa Horni Hajnk“. Hraja Hanka Tiedemann, Bettina Witke a Helfried Knopsmeier, čita Lisa Čornakowa. Koncert zarjadujetej biosferowy rezerwat Hornjołužiska hola a haty kaž tež Stróžanske domizniske towarstwo Radiška.
Kockert nowy komornik
Maja hišće lisćiki
Chrósćicy. Za premjerne předstajenje serbskeje popoweje opery „Carpe Noctem – Njeskónčna nóc“ zajutřišim, pjatk, w Chróšćanskej „Jednoće“ su wšitke zastupne lisćiki wupředate. Za wšěch, kotřiž chcedźa jenož na wječorne reje z kapału Praskot přińć, maja při wječornej kasy kartki za pjeć eurow. Tež za sobotu a njedźelu hišće někotre zastupne lisćiki maja. Njedźelu poskića k předstajenju kofej a tykanc. Na wšěch předstajenjach maja wopytowarjo nahubnik nosyć, doniž njejsu na městnje.
Do akademije pohladać
Budyšin. Dźeń wotewrjenych duri změja sobotu, 11. septembra, wot 9 do 13 hodź. w Budyskej studijnej akademiji. Zajimcy móža so tam wo dohromady šěsć studijnych směrach na polu hospodarstwa a techniki wobhonić a sej nowe laborowe twarjenje wobhladać. Tež tym, kotřiž su so hižo za dualny studij rozsudźili, ale hišće žanoho partnera za praksu nimaja, móža na dnju wotewrjenych duri pomhać.
Stupdalnicy so zetkaja
Nowa wustajeńca widźeć
Wojerecy. Wot minjeneho pjatka pokazuja we Wojerowskim měšćanskim muzeju nowu wosebitu wustajeńcu wuměłca Michaela Krusche. Moler a fotograf je so 1961 we Wojerecach narodźił a bydli dźensa jako swobodnje skutkowacy w Berlinje. Ze swojimi mólbami zapopaduje wón zaćišće na swojich jězbach do wšelakich kónčin swěta. Wot lěta 1990 poby wón mjez druhim w Maliju, Andaluziskej, New Mexiku a Jemenje.
Stajne blido nachwataja
Rakecy. Tradicionalne wobydlerske stajne blida w jednotliwych wsach Rakečanskeje gmejny dyrbjachu minjeny čas korony dla wupadnyć. Nětko je tamniši wjesnjanosta Swen Nowotny (CDU) nachwata. Mjeztym zo je wón tajke móžnosće rozmołwy w Stróži a Komorowje hižo poskićił, wotměje so přichodne stajne blido jutře, wutoru, w 19 hodź. we wjesnym towarstwowym domje Psowje (Oppitz). Tam móža zajimowani wobydlerjo aktualne problemy wsy kaž tež gmejny narěčeć, pokiwy dawać a so wo wuwiću komuny informować.
Wo serbskich naležnosćach
Čorny Chołmc. Serbskopolitiske krajne kruhi Zwjazka 90/Zelenych, Lěwicy a SPD w Sakskej přeprošeja na forum ze zastupjerjemi swojich a dalšich stron kaž FDP a CDU składnostnje wólbow přichodneho Němskeho zwjazkoweho sejma. Zjawny dialog wotměje so wutoru, 7. septembra, we 18 hodź. w Čornochołmčanskim Krabatowym młynje. Kandidatki a kandidaća za zwjazkowy sejm přednjesu swoje předstawy a ćežišća k naležnosći zastupnistwa Serbow w přichodnym zwjazkowym sejmje a přijmu zdobom nastorki, přeća a ideje wolerkow a wolerjow. Tež prěčne linije, profile a diferency jednotliwych stron k temje hodźa so rozjimać. Planowane su krótke předstajenje kandidatow a jich politiske ćežišća za Serbow w zwjazkowym sejmje, prašenja a nastorki přitomnych hosći kaž tež wotmołwy kandidatow na přinoški hosći a ewentualnje diskusija. Předewšěm měło hić wo kubłanje, strukturnu změnu, medije, financowanje a dalše. Zarjadowanje, kotrež Cosima Stracke-Nawka z Budyšina moderěruje, budźe dwurěčne.
Žony w srjedźišću
Kedźbu, gymnaziasća!
Žona na druhim městnje
Radwor. Škotowy turněr serbskich seniorow wčera w Radworskej „Zelenej hałžce“ je cyłkownje nawjedowacy Křesćan Weclich z 3 123 dypkami dobył. Druhe městno wobsadźi Sonja Krječmarjowa jako jenička žona w kole muži z 2 601 dypkom před Geratom Šmelingom (2 117). Z Měrkom Šmitom a Joachimom Mejglom móžachu kartyplacarjo dweju nowačkow witać. Přichodny turněr wotměje so 28. septembra w Haslowskim Bizoldec hosćencu.
Běchmy – smy – budźemy
