Na serbske blido
Lipsk. Serbja w Lipsku a wokolinje njech njeskomdźa přichodne serbske blido. Zajimcy zetkaja so wutoru, 27. septembra, w 19 hodź. w kofejowni Grundmann na Bebelowej 2. Organizatorojo wjesela so na prawje wjele wopytowarjow.
Zhromadnje hriby pytać
Kulow. Składnostnje prěnjeho europskeho dnja hribow přewjedźe Herbert Schnabel z Kulowskeje skupiny NABU jutře, sobotu, hribowu ekskursiju. Wobdźělnikam chce wón zajimawostki wo prawakach a kozakach rozłožić. Nimo toho wón pokaza, kotre dalše su jědźne hriby. Zajimcy zetkaja so w 9 hodź. na parkowanišću při Kulowskej kupjeli. Wobdźělenje płaći dwaj euraj.
Porěči wo rěči
Budyšin. Přichodne zarjadowanje Budyskeho kluba wuchowarjow rěče wotměje so wutoru, 27. septembra. W Budyskim hosćencu Sprjewina pensija porěči wot 19 hodź. dr. Peter Ulbrich na temu „Rěč w zwjazkowej republice“. Wšitcy zajimcy su witani, zastup je darmotny.
Ryba a přiroda
W piwarni znowa swjeća
Kulow. 25. raz wotměje so wot jutřišeho hač do njedźele piwarniski swjedźeń w Kulowskej piwarni. K jutřišim rejam hraje kapała Božemje Cryers. Sobotu a njedźelu stajnje w 13 a 15 hodź. zajimcow po piwarni powjedu. Sobotu w 16 hodź. započnje so piwarniske wubědźowanje. Wječor hraje kapała nA und. Njedźelu wočakuja tam dubl Rolanda Kaisera.
W parku předawaja rostliny
Wochozy. Wulka nazymska bursa rostlin wotměje so sobotu a njedźelu, 24. a 25. septembra, we Wochožanskim parku błudźenkow. Wjacore zahrodniske zawody a štomownje kaž tež plahowarjo žadnych rostlinskich družin chcedźa tam swój poskitk předstajić. Někotři wikowarjo so prěni raz wobdźěla. Rostlinske wiki, organizowane wot spěchowanskeho towarstwa parka, budu wobaj dnjej wot 10 do 18 hodź. přistupne.
Hudźbny nyšpor
Budyšin. Lubowarjo chóroweho spěwa njech njeskomdźa hudźbny nyšpor jutře, sobotu, w Budyskej cyrkwi swj. Pětra. Jón wuhotuje chór Budyšin. Mjez druhim zanjesu spěwarki a spěwarjo twórbu „Liturgia Trinitatis“ Sebastiana Elikowskeho-Winklera. Wšitcy zajimcy su wutrobnje přeprošeni. Hudźbny nyšpor započnje so w 17.15 hodź.
Nazhonjenja z demokratiju
Budyšin. Kotre nazhonjenja su wobydlerjo Hornjeje Łužicy po přewróće ze zawjedźenjom demokratije měli? Kak hodźi so demokratiska kultura w Hornjej Łužicy zesylnić? Wo tutej a wo dalše prašenja póńdźe na diskusijnym forumje wutoru, 20. septembra, we 18 hodź. w Budyskim Kamjentnym domje. Zarjadowar je Budyski Zwjazk 90/Zelenych.
Sportnišćo nětko přepodadźa
Serbske Pazlicy. Wulki wokomik budźe jutře za Njebjelčanske sportowe towarstwo. Jeho nowe sportnišćo w Serbskich Pazlicach chcedźa w 17.30 hodź. oficialnje přepodać. K tomu budźe kopańca za dźěći, kotrež móža so tež na skakanskim hrodźe wucychnować.
Wustajeńca so skónči
Budyšin. Přehladka Budyskeho Serbskeho muzeja „Pruhi, kruhi, třiróžki – Pisane serbske jutrowne jejka“ so njedźelu, 18. septembra, skónči. Tón dźeń budźe wot 15 hodź. poslednje wodźenje po wustajeńcy starodawnych mustrow a ornamentow w ludowym wuměłstwje. Wot 16 hodź. zahudźa čěscy a němscy hudźbnicy na zhromadnym koncerće na žurli muzeja. Serbski muzej je jedna ze stacijow koncertneho rjadu we wokolinje němsko-čěskeje mjezy z wobdźělenjom Turnowskeho orchestralneho zwjazka. Repertoire zestaja so ze staršich a nowšich kompozicijow.
Swjedźeń a muzejowa nóc
Reje za wšitkich
Haslow. Wobdźělnicy wulěta dekanatneje młodźiny zajutřišim, njedźelu, do Sakskeje Šwicy zetkaja so wječor k rejam w Haslowskej bróžni. Tam pak su wot 19.30 hodź. tež wšitcy dalši zajimcy wutrobnje witani, kotřiž so na wulěće njewobdźěla. Za nich płaći zastup tři eura. K rejam hraje skupina Sorbian Art Trio.
Durje dźiwadła wotewrjene
Budyšin. K zahajenju noweje sezony přewjedźe Němsko-Serbske ludowe dźiwadło njedźelu, 11. septembra, w swojim hłownym domje dźeń wotewrjenych duri. Z literarnymi a hudźbnymi programami, z wurězkami wšelakich inscenacijow, z čitanjemi a dalšimi poskitkami chcedźa wopytowarjow wot 14 hodź. na nowu sezonu wćipnych činić. Mjez druhim zahrajetaj Marian Bulank a Julija Klingnerec w 16 hodź. na probowym jewišću 2. inscenaciju „Zhubjene a namakane“. Wosebje skedźbnjeja na zakónčenje tohole dnja. We 18 hodź. pokazaja na hłownym jewišću zhromadnu produkciju NSLDź a SLA „Jurij Brězan – ze studnje jeho lět“. Zastup je zajutřišim za wšitke jednotliwe poskitki darmotny.
Rěčne hodźiny
Župa wuhotuje kermušku
Chrósćicy. Swoju kulturnu kermušku wuhotuje Kamjenska župa „Michał Hórnik“ sobotu, 24. septembra, wot 19 hodź. w Chróšćanskej „Jednoće“. Wopytowarjo dožiwja pisany program sobustawskich dźiwadłowych, rejwanskich a spěwnych skupin. Po programje budu reje z Chróšćanskimi muzikantami a z kapału Logarhythmus. Zastup z wosebitym kulinariskim přikuskom płaći w předpředani šěsć eurow, při wječornej kasy wosom. Lisćiki dóstanu zajimcy w regionalnym běrowje Domowiny w Chrósćicach.
Babylěćo w Delanach
Přepodadźa nowy teren
Budyšin. Dobrej lěće po tym zo běchu staru suknjernju potorhali, su pod Budyskej Starej wodarnju wšitke dźěła zakónčene. Areal nima nětko jenož spodobny napohlad, ale přeproša ze swojimi ławkami a druhimi móžnosćemi k posydnjenju. Nimo toho je tam nowe parkowanišćo nastało. Wutoru, 6. septembra, w 14 hodź. chce twarska měšćanostka Juliane Naumann (njestronjanka) nowowuhotowany teren oficialnje přepodać.
Znamki a druhe wěcy měnjeć
Budyšin. Zběrarjo listowych znamkow, pohladnicow a podobnych wěcow njech njeskomdźa přichodny měnjenski dźeń Budyskeho filatelistiskeho towarstwa zajutřišim, 4. septembra, wot 9 do 12 hodź. na Budyskim pósće. Dźěći a młodostni móža samo někotružkuli žadnostku darmotnje dóstać.
W prazwěrjencu sportować
Mały Wjelkow. Wosebitej sportowej dnjej přewjedu jutře a njedźelu w Małowjelkowskim prazwěrjencu. Budyski sportowy zwjazk budźe tam ze swojim mobilom z hosćom. Młodźi kaž tež starši wopytowarjo móža retomas sportowych nastrojow darmotnje wužiwać a swoju wušiknosć přepruwować.
Wo stawizničkach eksponatow
Bebelowa zawrjena
Budyšin. Twarske dźěła na Budyskej Bebelowej so nachileja. Wot dźensnišeho jězdnju z asfaltom pokrywaja. Wona wostanje tuž na wotrězku wot Walskeje hač k Tuchorskej hač do 5. septembra dospołnje zawrjena. Tež wobydlerjo njemóža w tym času z awtom na swoje ležownosće. Po tym zatwarja hišće indukciske sekle za amplu k Walskej. 12. septembra ma puć hotowy być.
Wo stawiznach rěče
Budyšin. Klub wuchowarjow rěče wotwjedźe wopytowarjow swojeho přichodneho zarjadowanja jutře, wutoru, do stawiznow rěče. Ines Adler ze Załomja porěči na temu „Stara a nowa Budyska łaćonšćina – teksty Kaspara Peukera“. Zarjadowanje w Budyskim hosćencu „Sprjewina pensija“ započnje so w 19 hodź. Zastup je darmotny.
Kupjel zaso wotewru
Budyšin. Po lětnjej přestawce budźe Budyska Röhrscheidtowa kupjel w Strowotnej studni wot póndźele, 29. awgusta, zaso přistupna. Minjene tydźenje su tam wšelake roły wuměnjeli, zdźěla nowe kachlicy kładli a wšu techniku překontrolowali. Kupjel budźe wutoru a pjatk hižo wot 6.30 hodź. wočinjena, hewak wot 10 hodź.
Dobytk z lěsa
Kulow (AK/SN). Z wobhospodarjenja swojeho 162 hektarow wulkeho komunalneho lěsa wočakuje město Kulow w lěće 2017 něhdźe 3 500 eurow dobytka. Kaž w hospodarskim planje za komunalny lěs steji, chcedźa za nimale 20 000 eurow drjewo předać a nadźijeja so nimale 10 000 eurow přiražkow Sakskeje. Na tamnym boku změja 8 500 eurow wudawki za žně drjewa, za 14 500 eurow chcedźa płoniny zalěsnić a je hladać, k tomu přińdźe nimale 3 500 eurow zarjadniskich wudawkow.
Pjekarnja swjeći jubilej Kubšicy. Na swój 125lětny jubilej zhladuje tele dny Kubšiska Richterec pjekarnja. Pjatk, 26. awgusta, móža tam dźěći popołdnju pjec, wječor budźe swjedźeń w stanje a zajimcy móža sej pjekarnju wobhladać. Sobotu, 27. awgusta, přeprošeja wot 9 hodź. na rańšu zabawu z dujerskej hudźbu a snědanju.
Pjenjezy za kompjutery
Kulow (AN/SN). 680 eurow wunjesła je tombola Kulowskeje wyšeje šule „Korla Awgust Kocor“ na njedawnym Krabatowym swjedźenju w měsće. Z pjenjezami podpěruje staršiska přirada nošerja kubłanišća při wuhotowanju noweho kabineta za informatiku. Prěnje dny noweho šulskeho lěta běchu starši retomas mytow do šule přinjesli a za tombolu přewostajili. Nimale 40 šulerjow bě zwólniwych, na woběmaj dnjomaj Krabatoweho swjedźenja losy předawać. Hižo sobotu popołdnju běchu wšitke rozpředate. Na te wašnje je někotryžkuli wopytowar rjane myto dobył, šula pak je nastupajo kabinet mały krok dale.
Na seniorowu akademiju
Wojerecy. Kak móža starši ludźo swoje swójstwo přećiwo paducham a zadobywarjam najlěpje škitać, je tema akademije seniorow Křesćansko-socialneho kubłanskeho skutka štwórtk, 25. awgusta, w 10 hodź. na Wojerowskej dźěćacej a młodźinskej farmje. Kriminalny hłowny komisar Burkhard Röwer rozłoži temu na aktualnych přikładach.
Dźěći móža wikować
