Pytaja najlěpše ideje
Budestecy. Gmejna Budestecy swojich wobydlerjow namołwja, wubědźować so wo najlěpše ideje, za čo měła komuna po jich měnjenju 10 000 eurow zasadźić, kotrež wona lětsa a klětu za hajenje dwurěčnosće dóstanje. Wjesnjanosta Frank Lehmann (njestronjan) namjetuje, nowe nadróžne tafle nastajeć. Dale rozmysluja wo nowym dwurěčnym wuhotowanju internetnych stron gmejny, wo dwurěčnej listowej papjerje a wo runje tajkich wizitkach. Wobydlerjo móža nětko rjec, što je jim wažne.
Na swójbne popołdnjo
Stróža. Cyłe šulske lěto přewjeduja sobudźěłaćerjo zarjadnistwa biosferoweho rezerwata Hornjołužiska hola a haty z dźěćimi a młodostnymi na šulach najwšelakoriše přirodoškitne a dalše projekty. Dźěći, młodostnych, jich swójbnych a wšěch dalšich zajimcow přeprošuja jutře, pjatk, wot 15 do 18 hodź. na zetkawanske popołdnjo do Stróžanskeho Domu tysac hatow. Tam chcedźa aktiwity jednotliwych skupin předstajić. Nimo toho změja program za cyłu swójbu přihotowany. Zastup je darmotny.
Na idejowu dźěłarničku
Budyšin. Załožba za serbski lud přeprošuje na zjawnu idejowu dźěłarničku k projektej „Lawski areal“ a rumnostnym kapacitam w Serbskim domje, kotraž budźe pjatk, 7. junija, wot 18 do 20.30 hodź. na žurli Budyskeho Serbskeho domu. Direktor Załožby za serbski lud Jan Budar předstaji dotalny staw koncepcije za twarski projekt na Lawskich hrjebjach. Nimo noweho domicila za Serbski institut, Serbski kulturny archiw a centralnu biblioteku rozmysluja wo dalšim přerjadowanju serbskich zarjadnišćow. Wotewrjene je nimo toho prašenje wužiwanja 4. poschoda Serbskeho domu po wućahu rozhłosoweho sćelaka MDR. Z wopytowarjemi chcedźa prašenja rozjimać a koncepciju konkretizować.
Sympozij wo klóšterskim kraju
„Mały Muk“ na jewišću
Budyšin. Štóž njeje dotal hišće najnowšu inscenaciju Serbskeho dźěćaceho dźiwadła NSLDź „Mały Muk“ widźał, móže to jutře, srjedu, nachwatać. Młodźi dźiwadźelnicy pokazaja swoju hru w 10 hodź. w Budyskim Dźiwadle na hrodźe.
Wo geologiskich swědkach
Stróža. Geologiske wosebitosće w biosferowym rezerwaće Hornjołužiska hola a haty kaž tež w jeho nakromnych kónčinach steja w srjedźišću přednoška dr. Andreasa Gertha jutře w 19 hodź. w Stróžanskim Domje tysac hatow. Budyski geologa a awtor rozłoži wšelake geologiske procesy, kotrež běchu k dźensnišim powjerchowym formam regiona wjedli. Z najwšelakorišimi geologiskimi swědkami rozprawja referent wo mnohich dramatiskich wuwićach w běhu zemskich stawiznow we Łužicy. Zastup płaći dwaj euraj, potuńšeny jedyn.
Pomocnicy pytani
Chrósćicy. Za XIII. mjezynarodny folklorny festiwal pytaja pomocnikow wot 16 lět hłownje za natwar a wottwar jewišćow kaž tež za přihot infrastruktury w Chrósćicach, a to wot wutory, 2. julija, hač do wutory, 9. julija. Zajimcy njech so prošu w regionalnym běrowje Domowiny w Chrósćicach přizjewja, pod telefonowym čisłom 035796/ 96 254 abo e-mailnje pod .
Swjeća w starym měsće
Wojerecy. Hižo wot wčerawšeho maja we Wojerecach lětuši staroměšćanski swjedźeń. Jutře wot 13 hodź. předstaja so na jewišću při radnicy najwšelakoriše talenty. Wječor wočakuja kapału Nordstern. Po njedźelnym rańšim piwku z Rakečanskim dujerskim orchestrom budźe wot 15 hodź. serbski program z Ćišćanskej rejwanskej skupinu a z tamnišim Serbskim dźěćacym towarstwom. Wot 17.30 hodź. wustupi k zakónčenju swjedźenja Choćebuska kapała Total. Tohorunja njedźelu budźe w zwěrjencu dźěćacy měšćanski dźeń.
Lěsna kupjel wočini
Ekskursija do jastwa
Budyšin. Powołanskoinformaciski centrum Budyskeje agentury za dźěło přeproša zajimowanych młodostnych na zarjadowanje do Budyskeho jastwa. Pjatk, 31. meje, w 10 hodź. chcedźa tam wukubłanje na justicneho zastojnika/justicnu zastojnicu předstajić. Zajimcy změja składnosć, nadrobne informacije takrjec z prěnjeje ruki dóstać a so zdobom z dźěłowym wobłukom na městnje zeznajomić. Jim posrědkuja dale pokiwy za požadanje a za wuběr požadarjow a rozłoža wuměnjenja, wobsahi wukubłanja a pozdźiše powołanske perspektiwy. Wopyt jastwa je jenož z płaćiwym personalnym wupokazom móžny. Wobmjezowanych městnow dla měli so zajimcy pěrizjewić, a to pod telefonowym čisłom 03591/ 661 410 abo pod .
W Koćinje pozastać
Wšitcy Horjenjo swjeća
Hory. Wjes Hory w gmejnje Halštrowska Hola pohosći lětsa zastupjerjow sydom dalšich wsow z němskim mjenom Bergen, ležacych we wosom zwjazkowych krajach Němskeje. Su to Bergen na kupje Rujany w Mecklenburgsko-Předpomorskej, Bergen we wokrjesu Celle a Bergen nad rěku Dumme w Delnjej Sakskej, Bergen w Posaarskej, Bergen nad rěku Nahe w Porynsko-Pfalcy, Bergen-Enkheim w Hessenskej a chiemgauski Bergen w Bayerskej. Wot 30. meje do 2. junija chcedźa woni zhromadnje swjećić. 1. junija budźe na jewišću zabawny program. Mjez druhim předstajitej so tam Židźinska drastowa skupina kaž tež šulska a domizniska stwa Ptačecy.
Wotkryja Wincarjec studnju
Partnerstwo z wuměłstwom
Budyšin. Krótko po měrliwej rewoluciji běchu třo mužojo z Heidelberga prěnje zwiski do Budyšina nawjazali. Pozdźišo wuwi so z toho měšćanske partnerstwo. Lětuše 150. wobstaće Muzeja Budyšin su za wuměłcow z wobeju městow přičina, wuhotować 1. junija we wustajenišću ekspoziciju pod hesłom „Kontekst & kontrowersa“. Mjez wosom wuměłcami je Iris Brankačkowa.
Tež w Hórkach meja padnje
Hórki. Hórčanska młodźina a wjesne towarstwo Při skale přeprošatej jutře, 25. róžownika wot 15.30 hodź na mejemjetanje. Po zhromadnym kofejpiću předstaja wjesne dźěći mały program. Potom chcedźa wone kaž tež młodostni wokoło meje rejować a so wo mejski wjeršk wubědźować. Po tradiciji ma tež kěrluš „Nět meja nazeleni“ zaklinčeć. Dźěći změja zabawu na wulkim skakanskim hrodźe. Młodostni a dalši zajimcy wjesela so na „spěwny wječor“ z Donatec bratrami.
Hosćićeljo być
Budyšin. W septembru dóstanje so Boliwiska do Sakskeje. Towarstwo Amigos de la Cultura je młodostnych z dalokeho kraja na wuměnu přeprosyło a chce tamnišu kulturu a rěč z pomocu młodostnych tudyšim wobydlerjam spřistupnić. Nětko pytaja jeho angažowani čłonojo tež w Budyskim wokrjesu za hóstnymi staršimi. Wotsrjedź septembra hač do spočatka januara 2020 budu hólcy a holcy w starobje 14 do 16 lět, kiž w domiznje němčinu wuknu, w Sakskej přebywać. Zajimcy, kotřiž chcedźa młodostnych njecyłe štyri měsacy pohosćić, móža swójby, pory kaž tež samokubłacy być.
Serbska Lěwica so zetka
Budyšin. Přichodne zetkanje Serbskeje Lěwicy budźe jutře, pjatk, we 18 hodź. we wobydlerskim běrowje Lěwicy na Budyskej Šulerskej 10. Mjez druhim chcedźa wo lisćinje kandidatow strony za wólby Sakskeho krajneho sejma diskutować.
Dźěłowy kruh wuradźował
Pančicy-Kukow (SN). Čłonojo dźěłoweho kruha „Žiwidła su hódne“ zetkachu so njedawno w zežiwjenskim a zelowym centrumje w Pančicach-Kukowje k swojemu prawidłownemu wuradźowanju. Kruhej přisłušeja zastupjerjo ministerstwow, towarstwow, institucijow a zawodow zežiwjenskeho hospodarstwa Sakskeje. Na spočatku předstajichu jim aktiwity w prěnich štyrjoch měsacach lěta. Tak bě so Miłočanski Křesćansko-socialny kubłanski skutk wuspěšnje na Zelenym tydźenju w Berlinje wobdźělił. Na kóncu wobhladachu sej wustajeńcu „Bjez zbytkow derje jěsć“, kotraž je hač do kónca septembra přistupna.
Městna njedosahaja
Na rěčnu hodźinu do „Meje“
Radwor (SN). Radworski gmejnski zwjazk CDU přeprosy jutře, 22. meje na rěčnu hodźinu wo temje „Je situacija spokojaca?“. Na zarjadowanju póńdźe wo medicinske zastaranje w komunje. Jako hosći su sej bywšu zapósłanču zwjazkoweho sejma a čłonka jeho strowotniskeho wuběrka Marju Michałkowu, społnomócnjenu medicinskeho zastaranskeho centruma Hornja Łužica Kristin Bartke kaž tež domjacu lěkarku, internistku dr. Moniku Liznarjowu, přeprosyli. Rěčna hodźina w Radworskim hosćencu „Meja“ započnje so w 19.30 hodź.
Dźěłarnička „Přichod Krabat“
