Znajmjeńša rozmołwy wjesć
Balkanski wjeršk w Berlinje
Berlin (dpa/SN). Zwjazkowy kancler Olaf Scholz (SPD) je so dźensa ze statnymi a knježerstwowymi šefami šěsć statow zapadneho Balkana na wjerškowe zetkanje zešoł. Na konferency wobdźěla so tež zastupjerjo dalšich krajow EU, prezidentka komisije EU a reprezentanća mjezynarodnych organizacijow.
Zetkanje krajow zapadneho Balkana, kotrež přewjeduja kóždolětnje wot 2014, ma tomu słužič kraje kaž Serbisku, Albansku, Bosnisko-Hercegowinu, Montenegro a Sewjernu Makedonsku poněčim do Europskeje unije wjesć. Na wjeršku chcedźa tež akciski plan za zhromadne regionalne wiki a nowe zrěčenje wo mobiliće wotzamknyć, kotrež zmóžnja lěpši přistup ke wysokošulskemu kubłanju.
Mortwi při nadpadźe na Israel
Tel Aviv (dpa/SN). Při nadpadźe z trutami libanonskeje milicy Hisbollah na zepěranišćo israelskeje armeje njedaloko města Binjamina 60 kilometrow sewjernje Tel Aviva su štyrjo israelscy wojacy žiwjenje přisadźili. Sydom dalšich wojakow poćerpi ćežke zranjenja, wójsko zdźěla. Něhdźe 60 ludźi so snadnje zrani. Wčerawši nadpad nětko přepytuja.
Wot Irana podpěrowana milica Hisbollah zdźěli, zo je z wjacorymi trutami zwučowanske lěhwo israelskeje armeje nadběhowała. Truty su pječa kmane, radar přewinyć a so objektam skradźu bližić. Na zepěranišću njeběchu žane sireny słyšeć, kiž bychu wojakow warnowali.
Israelske wójsko zdźěla, zo je dwaj trutaj wobkedźbowało, kotrež so z morja na Israel měrještej. Jedyn trut su wottřělili, tamny su z wočow zhubili. Sireny njejsu zapinyli, dokelž piloća israelskich lětadłow z toho wuchadźachu, zo je trut tohorunja na zemju zrazył. Wočiwidnje pak je so wón hač k zepěranišću předrěł. Nětko chcedźa powětrowy škit kraja z nowej modernej techniku z USA zesylnić.
Plany SPD Merza „šokuja“
Socialdemokraća daloko sahace plany na dobro ludźi wobzamknyli
Berlin (dpa/SN). Kanclerski kandidat CDU/CSU Friedrich Merz je plany SPD na dobro 95 procentow wšěch dawkipłaćerjow jako dospołnje njerealistiske kritizował. Tajke wolóženje by SPD w swojich minjenych nimale 20 knježerstwowych lětach dawno činić móhła, rjekny Merz w sćelaku ARD. „Hdyž tole na kóncu woznamjenja, zo su lěpje zasłužacy hišće bóle poćežowani, potom je naša wotmołwa cyle jasnje: ‚ně‘. To je poćežowanje srjedźneho stawa.“
Zwjazkowe předsydstwo SPD chcyše dźensa swoje klawsurne posedźenje k přihotam wólbow zwjazkoweho sejma wotzamknyć. Wčera běchu socialdemokraća strategiski dokument wobzamknyli, z kotrymž chcedźa słabu hospodarsku konjunkturu w Němskej skónčić. Přesyda Lars Klingbeil rjekny w přihotach wólbow zwjazkoweho sejma: „Rozsudne prašenje, kotrež měli sej wolerjo we wólbnej kabinje stajić, je: Chcedźa Friedricha Merza abo Olafa Scholza za zwjazkoweho kanclera měć.“ Wobsahowje měri so SPD na aktiwny stat a na wuchowanje industrije, wón rjekny.
Radšo wěrnosć spóznać
To wšak dyrbiš Olafej Scholzej wostajić: Optimizm, kotryž wón hladajo na šansy SPD při wólbach zwjazkoweho sejma runje za lěto wuprudźa, je njepowalny. Mjeztym so mnozy prašeja, što wón kóžde ranje bjerje: W aktualnych woprašowanjach nahladnosće leži SPD po wšej Němskej z runje hišće 16 procentami za AfD na třećim městnje. Scholz sam je sobu najnjewoblubowaniši politikar Němskeje. Najebać to chce wón jako kanclerski kandidat SPD nastupić a ze swojim nowym programom hospodarstwo wuchować.
Friedrich Merz porno tomu móže so wróćo lehnyć. Na wólbnym bojowym zarjadowanju w Bayerskej su jeho hižo jako „noweho zwjazkoweho kanclera“ witali. Mi so zdawa, zo móže CDU mjeztym samo 2021 zwrěšćeneho Armina Lascheta k wólbam nastajić. Tež to by hišće fungowało. Sym wćipny, što sej socialdemokraća hišće wšitko wumysla. Snano by lěpje było, wěrnosći wotpowědować a spóznać, zo je čas wotběžał. Marko Wjeńka
Nóc kreatiwnych hłójčkow wuspěšna
W Zhorjelcu konopjowy klub
Zhorjelc (dpa/SN). Prěni konopjowy klub Sakskeje nastawa w Zhorjelcu. Krajna direkcija za nutřkowne, socialne a strowotniske naležnosće je wotpowědnej próstwje Zhorjelskeho towarstwa přizwoliło. Wot spočatka julija je po informacijach zarjada jědnaće próstwow wo dowolnosć załoženja tajkeho konopjoweho kluba dóšło.
Wotpokazali žanu próstwu njejsu. Jednu próstwu su zapodarjo sami zaso cofnyli. Kluby smědźa po přizwolenju dźěławosće konop za swójski konsum plahować a swojim čłonam dale dawać.
Hač do spočatka nowembra liča z dalšimi přizwolenjemi, rěčnica zarjada zdźěla. Najwjetše wužadanje na puću k přizwolenju su podłožki, kotrež njejsu častodosć dosahace. Tuž dyrbi sej zarjad dalše dokumenty žadać. Konopjowe kluby su po wšěm swobodny staće rozdźělene, w Lipsku, Kamjenicy, Drježdźanach, ale tež we wjesnych kónčinach.
Přizwolenje próstwow je wužadace. Pruwowarjo wobhladaja sej twarjenja towarstwow a kontroluja zakonsce předpisane wotstawki. Dowolnosć traje tři měsacy a płaći mjez 750 a 2 750 eurow.
Pytaja swědka za nadpad w měsće
Budyšin (SN/mb). Lokalne medije su minjene dny wo tutej powěsći rozprawjeli: „Młoda žona wobćežowana a přesćěhana“. Policajski rewěr Budyšin pyta swědkow za njeskutk zašłu srjedu wječor w 21.30 hodź. mjez dr. Arnošta Mukowej dróhu a Sukelnskej (tel. 03591/3560). Potrjechena je 16lětna Olena z Ukrainy, najmłódša holca ukrainskeje swójby, kotraž je wot měrca do decembra 2022 pola Nukec swójby w Radworju bydliła. Po wuprajenju holcy a jeje maćerje je muž z kolesom a klepotacymi blešemi jej hižo wot Awgusta Bebeloweho naměsta přesćěhał, holcu potom wotzady spowalił a so na nju sydnył. Kaž Jan Nuk nam na naprašowanje zdźěli, „bě wona chrobła dosć a je drapała a kusała, tak zo je so złóstnik chětro krawjo z procha měł.“ Tak je so radźiło, skućićela zaso wotbyć.
Ukrainska swójba bydli mjeztym w Budyšinje, woni wopytuja rěčny kurs za B1. Muzisce wobdarjeny syn Michał je w Awstriskej, hdźež chce kompoziciju a dirigentstwo studować. Za Olenu je Jan Nuk termin pola towarstwa za pomoc woparam namocy Weißer Ring wobstarał, zo by so tam psychologisce lěkowała.
To a tamne (14.10.24)
Infarkta wutroby dla njeje pilot w USA hižo dale lećeć móhł. Na to je mandźelska 78lětneho wodźidło małeje mašiny přewzała. Mandźelskaj běštaj z dwajmotorowym lětadłom po puću z Nevady do Kaliforniskeje, jako muž infarkt poćerpi. Žona, kotraž njeměješe žane lětarske nazhonjenja, je na to z pomocu škričkowych pokiwow lotsow lětanišća mašinu w Bakersfieldźe w Kaliforniskej přizemić móhła. 78lětneho dowjezechu do chorownje, hdźež wón wudycha.
Cyłu fabriku za produkciju syntetiskich drogow je policija w Lettiskej namakała a zawrěła. Mjezynarodna cwólba bě tam drogi we wulkim stilu zhotowiła. Zastojnicy namakachu ilegalne substancy w hódnoće 400 milionow eurow. W składźe ležeše cyła tona moderneje drogi Clephedrone. W nadróžnym wikowanju płaći jedyn gram drogi něhdźe 25 eurow.
Iran hrozy susodam z wjećbu
Washington (dpa/SN). Jordaniska, Zjednoćene arabske emiraty, Sawdi-Arabska a Katar nochcedźa USA při móžnej wojerskej wjećbje přećiwo Iranej podpěrować. Tole rozprawjeja medije w USA. Štyri kraje, w kotrychž maja USA wojerske zepěranišća, su knježerstwu we Washingtonje zdźělili, zo njesmědźa USA a Israel jich powětrowy rum za ofensiwne operacije přećiwo Iranej wužiwać. Iran hrozy wšitkim arabskim krajam nimo toho z wjećbu, kotrež nadpad Israela podpěruja.
Wjace podpěry pěstowarnjam
Berlin (dpa/SN). Kwalitu pěstowarnjow w Němskej chcedźa polěpšić. Zwjazkowy sejm je za to wčera nowy zakoń wobzamknył, kotryž wot januara płaći. W nim je rjadowane, zo Zwjazk krajam přichodnej lěće stajnje dwě miliardźe eurow za lěpše zastaranje w pěstowarnjach přewostaji. Tak chcedźa wjace kubłarkow a kubłarjow přistajić, wosebje na zapadźe Němskeje. Tam trjebaja hač do lěta 2030 něhdźe 90 000 nowych sobudźěłaćerjow.
Zelenskyj po puću w Europje
