Nastajenje k serbšćinje mjez wobydlerjemi lěpše
Budyšin (SN/MiR). Prěnje wuslědki ewaluacije kampanje „Sorbisch? Na klar.“ su so wozjewili. Sakske statne ministerstwo za wědomosć, kulturu a turizm (SMWK) zdźěli, zo ludźo hódnotu serbskeje rěče a kultury kaž tež wužiwanje serbšćiny w zjawnosći w Hornjej Łužicy bóle připóznawaja. W cyłku je 1 796 wosobow w Hornjej Łužicy resp. w serbskim sydlenskim rumje kaž tež we wokolnych gmejnach Budyskeho a Zhorjelskeho wokrjesa na naprašowanje wo serbšćinje a imagowej kampanje „Sorbisch? Na klar.“ wotmołwiło. 41 procentow naprašowanych w serbskim sydlenskim rumje a 28 procentow z wokolnych gmejnow měješe lětsa za pozitiwne, rěči-li so w jich přitomnosći serbsce. Při prěnim naprašowanju 2023 bě to hišće 37 resp. 25 proc.
Nawoda centruma wupokazany
Hamburg (dpa/SN). Pjeć tydźenjow po zakazu jako islamistiskeho zastopnjowaneho islamskeho centruma w Hamburgu chcedźa nětko tež toho nawodu z Němskeje wupokazać. 57lětny Mohammed Hadi Mofatteh je wukaz Hamburgskeho nutřkowneho zarjada dóstał. W lisće jeho namołwjeja, Němsku w běhu 14 dnjow wopušćić. Hewak hrozy jemu wotsunjenje. Jemu je nimo toho zakazane, so do Němskeje nawróćić.
Dlěše dźěło mytować
Berlin (dpa/SN). Zwjazkowe knježerstwo chce ludźi pohnuć, dlěje dźěłać. Štóž tež po docpěću rentnarskeje staroby ze 66 lětami dale dźěła, měł přidatnu premiju dóstać. Tu chcedźa hač do třoch lět nalutować a po tym wupłaćić. Nimo toho chcedźa ludźom, kotřiž dlěje dźěłaja, čas žiwjenja wyšu rentu płaćić. Nowe namjety chcedźa na posedźenju zwjazkoweho knježerstwa 4. septembra wobzamknyć, medije rozprawjeja.
Trump prowokuje Harris
Ze zahorjacej swjatočnosću na najwjetšim naměsće francoskeje ...
NATO přilubja Ukrainje pomoc
Wuraz eugeniki zbudźa kritiku
EU za sankcije přećiwo Israelej
Ramallah/Tel Aviv (dpa/SN). Generalny sekretar UNO António Guterres wobhladuje napjate połoženje w kraju zapadnje Jordana a najnowše israelske wojerske zasadźenje we wobsadźenych kónčinach z wulkimi starosćemi. „Wón zasudźuje smjerć njewinowatych ludźi – smjerć dźěći pak najraznišo“, zdźěli jeho rěčnik Stéphane Dujarric. Guterres žada sej hnydomny kónc wojerskich akcijow. Israel argumentuje, zo wuchadźeja z kraja zapadnje Jordana dalše nadpady na Israel z třělbami a rozbuchadłom.
Ranjenja čłowjeskich prawow w palestinskich kónčinach přez Israel dla je społnomócnjeny EU za wonkowne naležnosće Josep Borrell knježerstwam 27 čłonskich statow EU namjet sankcijow předpołožił. Tute měrja so přećiwo israelskemu prawicarsko-ekstremnemu financnemu ministrej Bezalelej Smotrichej a prawicarsko-ekstremnemu policajskemu ministrej Itamarej Ben-Gvirej. Wobaj ilegalnu židowsku sydlensku politiku a wućěrjenje Palestinjanow w kraju zapadnje Jordana podpěrujetaj.
Namjet Merza wotpokazał
Wicekancler Robert Habeck na zarjadowanju Zelenych w Lipsku
Lipsk (dpa/SN). Wicekancler Robert Habeck je namjet předsydy CDU Friedricha Merza nastupajo „narodne nuzowe połoženje“ z raznymi słowami wotpokazał. „To njeje rozrisanje problema, to je njezamołwite“, rjekny politikar Zelenych na zarjadowanju za wólbny bój w Lipsku.
Merz bě móžne wukazanje „narodneho nuzoweho połoženja“ namjetował, zo móhła Němska prawidła EU na dobro ćěkancow zběhnyć a migrantow, kotřiž su z druheho kraja EU do Němskeje přišli, na mjezach Němskeje wotpokazać. Habeck na to pokaza, zo by tole wulke střasenja w EU zawinowało a rěčeše wo „wopačnym namjeće“. Dale wón rjekny. „Njewěm tak prawje, hač je to njewěda abo pospyt, raz něšto njewšědneho namjetować. Wuslědk je samsny: Žadanje, kotrež njeje zwoprawdźomne.“
Habeck chwaleše sej wuwiće wuchodnych krajow z pomocu statneho spěchowanja. Dobre dźěło Zelenych minjene tři lěta pokazuje so tež w ličbach rozrosta a w snadnej bjezdźěłnosći, wón rjekny.
Wólby krajneho sejma přichodnu njedźelu mjenowaše „rozsudne“.
Młodźina, wotuć!
Tuchwilu wotměwaja so w Sakskej a Durinskej wólby za młodostnych pod 18 lětami. Tak mjenowane junior-wólby skića młodostnym składnosć, swójski hłós wotedać. Na zakładźe tutoho podawka, kotryž njeje hižo jónkrótny, sym naprašowanje wo temje „Młody być a wolić“ přewjedła. Z pomocu tohole srědka chcych sej prosće dohlad do zajimow a potrjebow młodostnych zdobyć. Jeli scyła, potom wotmołwichu mi młodostni hakle po třećej próstwje. Mějach jim zawěsćić zo je naprašowanje anonymne. Připódla prajene: feedback běše přewšo snadny.
Je młodźina prosće lěnja? Ně, skerje boja so młodostni zasudźenja swójskeho politiskeho zmyslenja dla. Tež strach před wuspěchom strony AfD jich puta. Wuslědki wólbow pod 18 lětami pokazachu nažel jasnje, kotre ideje młodostnych narěča, lěpje, jich popadnu. Poprawom njedyrbjeli so Serbja předsudkow dla bojeć. W Serbach tola nichtó AfD njewoli ... abo?
Liza-Maria Cyžec
Po Choćebuzu kolesowali
To a tamne (29.08.24)
Znjezboženeho kolesowarja wobkradnył je njeznaty w sewjerorynsko-westfalskim Kleve njedaloko nižozemskeje mjezy. 65lětny kolesowar bě padnył. Podhladny, tohorunja z kolesom po puću, 65lětneho narěča. Po tym přičini swoje kolesowarske toboły při e-kolesu znjezboženeho a z nim wotjědźe. Swójske koleso wostaji na městnje njezboža stejo. 65lětny informowaše policiju. Jeho dowjezechu do chorownje.
Manipulowane awtomaty, z kotrymiž móžeš sej sam plyšowe zwěrjo wućahnyć, zaběraja policiju w brazilskej metropoli Rio de Janeiro. Při porjedźenju nastrojow bě technikarjam napadnyło, zo su awtomaty tak programěrowane, zo je zajimc hakle po wjacorych pospytach wuspěšny. Policija na to tuka, zo su wšě awtomaty milionoweho města potrjechene a zo tči kriminelna cwólba za tym.
