Za wjac zjawneje serbšćiny
Poskitk simultaneje techniki serwisoweho běrowa dotal lědma wužiwali
Wojerecy (SN/MiP). Mały jubilej pjećlětneho wobstaća serwisoweho běrowa za serbšćinu w komunalnych naležnosćach w awgusće je sobudźěłaćerka Franciska Grajcarekec nětko priwatnje hišće krónowała: ze serbskim kwasom w Radworju. Wšědny dźeń w běrowje na prěnim poschodźe domu Domowiny we Wojerecach pak njeznaje swjatočnosće, ale pilne wobdźěłanje dotal wjac hač 1 200 nadawkow. Dohromady 30 gmejnow je regularnje posłužby serwisoweho běrowa wužiwało. W času korona-pandemije je tež wjele přełožowarskich nadawkow ze stron krajnoradneho zarjada w Budyšinje dóšło. Tola Grajcarekec a jeje kolega Jan Kral njestarataj so jenož wo přełožki zarjadniskich tekstow a napisow. Wonaj gmejnam w serbskim sydlenskim rumje Sakskeje tež poradźowanje za zwoprawdźenje serbsko-němskeje dwurěčnosće poskićujetaj. A runja redakciji Serbskich Nowin wuwiwataj po potrjebje nowe słowa, tule za komunalnu politiku.
Debatuja zaso wo wotsunjenju
Smjertny islamistiski nadpad w Solingenje wubudźa diskusije
Solingen (dpa/SN). Po smjertnym nadpadźe z nožom w Solingenje jewja so razniše žadanja za krućišimi prawidłami wotsunjenja a noweho zakonja brónjow dla. Runočasnje žadaja sej wujasnjenje, čehodla su zamołwite zarjady loni na pospyće, syriskeho požadarja azyla wotsunyć, zwrěšćili. Jenož tohodla je mjenowany Syričan takle minjeny pjatk hakle krawny nadpad z třomi smjertnymi woporami skućić móhł.
Na nadróžnym swjedźenju w měsće w Bergiskim kraju bě skućićel dale wosom ludźi zranił, štyrjoch z nich ćežko. 26lětny podhladny sedźi wot soboty w přepytowanskej jatbje. Mjez druhim wumjetuja jemu čłonstwo w terorowej milicy islamski stat. Organizacija twjerdźi, zo je skućićel w jeje nadawku jednał. Wona rozšěri mjenujcy widejo, kotryž pječa atentatnika pokazuje. Hač je widejo woprawdźe awtentiske, njeje dotal jasne.
Na zasłužby Kamjenjana spominali
Jednanja tča w slepej hasy
Kairo (dpa/SN). Rozmołwy wo přiměrje w Gazaskim pasmje tča w slepej hasy. Při rozmołwach w egyptowskej stolicy Karo knježi tuchwilu „wobćežne połoženje“. Tole je powěsćernja dpa z kruhow wobdźělnikow zhoniła. Tuchwilu so w jednanjach „ničo wjace njehiba“. Pječa je israelska delegacija mjeztym wotlećała. Tež katarski emir Hamad Al Thani je Kairo wopušćił, runje tak kaž zastupnicy Hamas. Tući chcychu so wo aktualnym stawje wobhonić.
W Brazilskej so lěsy pala
São Paulo (dpa/SN). Na juhowuchodźe Brazilskeje cychnuja wulke lěsne wohenje. Knježerstwo zwjazkoweho stata São Paulo je mjeztym w 45 gmejnach nuzowy staw wukazało. Wjace hač 15 000 pomocnikow wojuje přećiwo płomjenjam. Tež wojerske lětadła su zasadźene. Dwě wosobje su móžneho zapalerstwa dla zajeli. Tež w kónčinje Amaconasa wojuja přećiwo wulkim lěsnym wohenjam. Wot junija hač do oktobra je w Brazilskej kóžde lěto sezona lěsnych wohenjow.
Macron pyta za knježerstwom
Razne nadběhi Ruskeje
Kijew warnuje Běłorusku
Söder: Žanu koaliciju ze Zelenymi
Berlin (dpa/SN). Předsyda CSU Markus Söder chce čorno-zelenej koaliciji na zwjazkowej runinje po wólbach zwjazkoweho sejma 2025 zadźěwać. Za to by přihłosowanje jeho strony trěbne było, „a te njebudźe“, rjekny Söder w rozmołwje ze sćelakom ARD. Söder spřećiwja so tak předsydźe CDU Friedrichej Merzej, kotryž chcył sej so po móžnym wólbnym dobyću CDU/CSU při přichodnych wólbach zwjazkoweho sejma po móžnosći wjele móžnosćow koalicije wobchować. „Čorno-zelene ze mnu njeńdźe. Na to móže so kóždy spušćeć“, Söder rjekny. Zeleni njejsu při swojich prócowanjach wo unije zrozumili, zo wobsteji unija z CDU a CSU. Jako předsyda CSU móže wón koaliciju ze Zelenymi wuzamknyć.
Do minjenych wólbow zwjazkoweho sejma bě so bayerski ministerski prezident hišće wuraznje za čorno-želeny zwjazk wuprajił. Tehdy bě sej wón wěsty, zo byštej CSU a Zeleni wužadanje ekologije a ekonomije zmištrować móhłoj. Mjeztym pak su so Zeleni přez swoje dźěło w koaliciji sami „diskwalifikowali“.
