Zadomjenje ludźi wolóžić
Komisija fachowcow dźěło skónčiła
Berlin (dpa/SN). W boju wo lěpše wuměnjenja za plahowanje skotu so wjele wobkedźbowana komisija fachowcow rozpušći. Gremij wokoło bywšeho zwjazkoweho ministra za ratarstwo Jochen Borcherta (CDU) je wčera wobzamknył, swoje dźěło skónčić, ministerstwo zdźěla. We wotpowědnym stejišću komisija rozłoži, zo njejsu wuměnjenja za wuspěšne dźěło ani w bywšej ani w prěnimaj lětomaj tuteje wólbneje doby stworjene byli. „Tež w naćisku zwjazkoweho etata 2024 njeje trěbny rozmach spóznajomny“. Tohodla komisija swoje dźěło skónči, zdźělichu.
„Kompetencna syć k plahowanju wužitneho skotu“ bě hižo 2020 koncept za poněčimny přetwar plahowanja k jasnje wyšim směrnicam předpołožiła. W tym zwisku žadachu sej srědki wjacorych miliardow eurow, zo njebychu ratarjo kóšty přetwara sami njesć trjebali. Amplowa koalicija bě jednu miliardu eurow zaplanowała, wojuje pak hižo měsacy wo dalše dołhodobne financowanje.
Fachowcy zrezignowali
Dobra rada móže druhdy chětro droha być. Tole je zwjazkowe knježerstwo hižo wospjet dožiwiło. Myslu jenož na bywšu zakitowansku ministerku Ursulu von der Leyen (CDU), kotraž je wjele pjenjez za eksternych fachowcow wudała a kotraž je namjety fachowcow rady sćěhowała. Njezapomnita je tež nowinarska konferenca tak mjenowaneje wuhloweje komisije w januaru 2019. Z hoberskim nawalom medijow sedźeše cyły kraj napjeće před wobrazowkami, zo by słyšał, što nam fachowcy nastupajo skónčenje zmilinjenja brunicy a z tym zwjazane kóšty namjetuja. Jich słowa zańdźechu bjez wulkeje diskusije kaž do zornowca dypane do dźěłoweho plana tehdyšeho knježerstwa.
Porno tomu je komisija za lěpše wuměnjenja při plahowanju skotu skerje ćichu smjerć zemrěła. Gremij fachowcow njeje so ze swojimi namjetami a scyła nic z financnymi předstawami přesadźić móhł a je zrezignował. Snano njebě jich dźěło spektakularne dosć. Marko Wjeńka
Njenamakaja wjace dosć wučomnikow
To a tamne (23.08.23)
Po přeprěčenju swětoznateho doła Monument Valley z impozantnymi skaliznami bliži so němski sportowc Jonas Deichmann na swojim pućowanju po USA horinam Rocky Mountains. 36lětnemu bě běh po sławnym dole w staće Arizona wosebity wjeršk dwójneho přeprě- čenja USA. Ekstremny sportowc bě so w juniju z kolesom na puć po kraju podał a je nětko pěši wróćo do New Yorka.
Pawk je w drogeriji w badensko-württembergskim Bietigheimje pola Karlsruhe zasadźenje policije zawinował. Njedźelu wječor dyrbješe so wobsadka policajskeho awta k wobchodej podać, po tym zo bě awtomatiski alarm zastojnikow wołał. Město paducha pak wuhladachu policisća pawka na alarmowej připrawje a pušćichu jeho do swobody.
Chcedźa pilotow wukubłać
Athen (dpa/SN). Grjekska je ukrainskemu prezidentej Wolodymyrej Zelenskemu poskićiła, ukrainskich pilotow za bojowe lětadła typa F-16 wukubłać. Zelenski dźakowaše so po rozmołwje z ministerskim prezidentom Kyriakosom Mitsotakisom za poskitk, kotryž je rady přiwzał, kaž rjekny. Najwjetši dźěl grjekskich powětrowych mocow wobsteji z lětadłow F-16 z USA. Piloća su jara nazhonići. Danska a Nižozemska běštej wčera Ukrainje F-16 přilubiłoj. Za to pak dyrbjało wukubłanje pilotow wotzamknjene być.
Ruska truty wotwobarała
Moskwa (dpa/SN). Ruski powětrowy škit je po informacijach zakitowanskeho ministerstwa w Moskwje štyri ukrainske truty wotwobarał. Dwaj trutaj su w Moskowskej kónčinje zničili, dalšej stej w pomjeznej kónčinje Brjanska na juhozapadźe kraja na zemju zrazyłoj. Nichtó njeje so zranił. Samsny čas bě dźěło na wšitkich třoch Moskowskich lětanišćach nachwilnje zlemjene. Hač měješe tole něšto z wotwobaranjom trutow činić, njeje znate.
Kawcija za Trumpa postajena
Zadwělowani su wohnjowi wobornicy a wobydlerjo w Grjekskej tež ...
Biden wotpalene město wopytał
Globalne poměry mocy změnić
Johannesburg (dpa/SN). Zwjazk pjeć razantnje so wuwiwacych hospodarstwow swěta Brics zetkawa so wot dźensnišeho na swój 15. wjeršk w južnoafriskej hos-podarskej metropoli Johannesburg. W srjedźišću wjerškoweho zetkanja, kiž traje hač do štwórtka, steji rozšěrjenje skupiny. Dotal přisłušeja zjednoćenstwu statow Brazilska, Ruska, Indiska, China a Južna Afrika. Nětko chce zwjazk dalše kraje přiwzać. Na wotpowědne kriterije čłonstwa chcedźa so dojednać. Dotal je wjace hač 40 krajow wo přiwzaće do skupiny Brics prosyło, mjez nimi Argentinska, Sawdi-Arabska, Zjednoćene arabske emiraty, Algeriska, Egyptowska, Iran, Venezuela a Thailandska.
Na wjeršk w Johannesburgu wočakuja chinskeho prezidenta Xi Jinpinga, brazilskeho prezidenta Inácia Lulu da Silvu, južnoafriskeho prezidenta Cyrila Rama-phosu a indiskeho premiera Narendra Modija. Rusku zastupuje wonkowny minister Sergej Lawrow. Staty Brics chcedźa globalne poměry mocy změnić, kotrež postajetej dotal USA a zapadny swět.
Mjeza poćežowanja docpěta
Zarjady za wukrajnikow wočakuja nawal próstwow wo staćanstwo
Drježdźany (dpa/SN). Wobdźěłanje próstwow wo spožčenje němskeho staćanstwa zarjadnišća w Sakskej lědma hišće dočinja. Komuny so boja, zo so tak a tak hižo dołhe časy wobdźěłanja z nowym zakonjom wo staćanstwje hišće podlěša, naprašowanje powěsćernje dpa pokazuje.
Zarjadnišća za spožčenje staćanstwa dźěłaja na mjezy poćežowanja a steja „praktisce krótko před kolapsom“, rjekny sakski społnomócnjeny za naležnosće wukrajnikow Geert Mackenroth (CDU). Zdźěla lěta dołhe čakanske časy njejsu akceptabelne. „W Lipsku, Drježdźanach a Kamjenicy čaka druhdy wjace hač tysac próstwow na wobdźěłanje. Tež na někotrych krajnoradnych zarjadach traje wobdźěłanje próstwow zdźěla 21 měsacow“, Mackenroth rjekny.
Po informacijach nutřkowneho ministerstwa Sakskeje su loni 2 276 ludźom němske staćanstwo spožčili. Lěto do toho bě jich 1 913. Z wotstawkom najwjace nowych staćanow pochadźa ze Syriskeje (790). Slěduja Ukrainjenjo (202), Vietnamjenjo (98), bjezstatni (75), Irakčenjo (69), Polacy (67), Rumunojo (58) a Rusojo (57).
