Naprašowanje frakcije Lěwicy pola zwjazkoweho knježerstwa

Berlin (dpa/SN). Ličba socialnych bydlenjow w Němskej je loni znowa woteběrała. Tak mějachu kónc lěta 2022 po wšej Němskej 1,088 milionow tajkich bydlenjow za ludźi ze snadnymi dochodami, něhdźe 14 000 mjenje hač lěto do toho. Tole wuchadźa z wotmołwy zwjazkoweho knježerstwa na naprašowanje frakcije Lěwicy w zwjazkowym sejmje.

Po tutych informacijach su loni 22 545 nowych socialnych bydlenjow twarili. Zwjazkowe knježerstwo bě připowědźiło, so kóžde lěto wo 100 000 nowych socialnych bydlenjow postarać. Negatiwna bilanca nastanje najebać nowotwar, dokelž bě pola 36 500 bydlenjow wobmjezowanje podruže wotpadnyło, zdźěla fachowča Lěwicy za bydlensku politiku Caren Lay. Wona bě so z naprašowanjom na amplowe knježerstwo wobroćiła.

Bydlenja faluja, nimale wšudźe. We wulkich městach stonaja wobydlerki a wobydlerjo, maja-li so za nowym bydlenjom rozhladować. Dźesatki ludźi na wobhladowanju bydlenja njejsu w Berlinje, Lipsku abo Kölnje hižo wuwzaće. Kak pak dyrbja ludźo začuwać, kotřiž nimaja pjenjezy we wjetšim wobjimje, kiž su wotwisni wot statneje podpěry? Za nich stejachu a steja w Němskej tak mjenowane socialne bydlenja k dispoziciji, kotrychž podruž je wot stata regulowana. Hdyž pak woteběra ličba tutych bydlenjow konstantnje, potom přińdu ći, kotřiž su w našej ­towaršnosći najčasćišo na poslednim městnje, do wulkich wuskosćow. Wukřik rozmjerzanja ze stron socialnych skutkow a lěwych politikarjow njeje tuž zadźiwanja hódny. By-li twar socialnych by­dlenjow wójna była, bychu so žadane ­pjenjezy na najspěšnišim puću nadešli. Poprawom wšak je wony twar wójna – wójna za fairne bydlenske wobstejnosće za wšěch. Maximilian Gruber

Konja z pastwy pokradnyłoj stej dźěsći w Callenbergu w Šwikawskim wokrjesu. Holcy w starobje jědnaće a 13 lět stej elektriski płót wotpinyłoj, wrota wote­wrěłoj a běžeštej z konjom sobotu wječor po dróze, policija zdźěli. Žona holcy wobkedźbujo zamołwiteho konjenca zazwoni. Tón zwěrjo wróćo na pastwu dowjeze. Holcy nochcyštej přeradźić, kajki zmysł jeju akcija měješe. Nětko dyrbitej ze skóržbu padustwa dla ličić.

Napiteho muža w kerku wuslědźił je policajski psyk w Düsseldorfje. Pozdatnje pjany muž bě so w nocy na njedźelu policajskej kontroli wuwinył. Wón smaleše po starym měsće, přesćahny bus na prawym boku a ignorowaše čerwjene ample. Po třoch kilometrach 22lětny awto wotstaji a pěši před policiju ćěkaše. Pos policije jeho w kerku namaka a snadnje zrani. Jězbnu dowolnosć muž njeměješe.

Nižozemska wubranka je zakitowarjej titula USA na swětowym mišterstwje kopańcy žonow w Awstralskej a Nowoseelandskej remis wotdobyła. Šlagrowy duel skupiny E skónči so w prěnjej partiji z 1:1. Wobě mustwje matej do zakónčaceho hrajneho dnja přichodnu wutoru nětko štyri dypki na konće a měłoj w normalnym padźe prěnjej skupinskej městnje mjez sobu wučinić. W partiji na koparsce a taktisce wysokim niwowje, docpě Jill Roord we Wellingtonje nawjedowanje za Nižozemjanki po 17. min. Lindsey Horan postara so po změnje stronow wo wurunanje (62.) a tež wo to, zo njemóžeše so Nižozemska za poražku w finalu WM 2019 rewanšować. W kónčnej fazy bě štyrikróćny swětowy mišter dobyću jasnje bliši hač Europjanki, kotrež pak móžachu za sebje zwěsćić, zo běchu w prěnjej połojcy hry lěpše mustwo.