Prezidentka zwjazkoweho sejma žada sej zhromadne napinanja

Berlin (dpa/SN). Prezidentka zwjazkoweho sejma Bärbel Bas je Zwjazk, kraje a komuny namołwjała, so ze zhromadnymi mocami wo wjace sprawnosće na polu kubłanja postarać. Trěbne je „cyłkowne napinanje na wšitkich třoch runinach“, rjekny politikarka SPD w rozmołwje z powěsćernju dpa. Wona wupraji so za to, wosebje ćežišćowe wobłuku z přidatnymi pjenjezami a personalom podpěrować a tak powołanje wučerja z lěpšim płaćenjom atraktiwniše sčinić.

Karjery w kubłanju su tež dźensa hišće móžne, su pak přeco hišće „wotwisne wot připada“, Bas rjekny. „Trěbne je zbožo a něchtó, kiž talent spóznaje a kubłanske šancy wotwěra.“ Statistiki dopokazuja, zo młodźi ludźo skerje studuja, hdyž ze swójbow akademikarjow pochadźeja. Dźěćom z dźěłaćerskich swójbow je tole tohorunja móžne, tež z pomocu wotpowědnych spěchowanskich móžnosćow kaž Bafög. Najebać to je dźěćom ze swójbow ze snadnymi dochodami ćežko, so za studij rozsudźić. Častodosć pobrachuja w swójbach tež přikłady.

Z podnurjaceho so awta ze swojim nanom telefonował je nowačk nadróžneho wobchada w Bremenje, po tym zo bě ze swojim awtom do rěki Weser zajěł. Nan synej nuznje radźeše, „jězdźidło spěšnje wopušćić, prjedy hač so doskónčnje njepodnuri“, policija zdźěli. 18lětny na to z woknom wulěze a so snadnje zranjeny na pobrjóh rěki wuchowa. Čehodla bě započatkar kontrolu nad awtom zhubił a po skłoninje do rěki zajěł, njeje jasne.

Po přepytowanju labora je nětko jasne: W lěsach pola Kleinmachnowa južnje Berlinje njeje lawica po puću była. Prěnje přepytowanje powostankow zwěrjeća je wunjesło, zo bě pytane zwěrjo rostlinožračk, rěčnica krajnoradneho zarjada zdźěli. „Njewuchadźamy hižo z toho, zo jednaše so wo lawicu“, wona rjekny. Tež analyza namakanych kosmow njeje žane pokazki na rubježne zwěrjo wunjesła.