To a tamne (11.07.23)
Sta piwowych kašćikow zhubiło je nakładne awto na dróze w hornjej Frankskej. Po informacijach policije sta so njezbožo wčera rano w Neudrossenfeldźe w Kulmbachskim wokrjesu. W křiwicy přełama něhdźe 200 piwowych kašćikow pobóčnu sćěnu awta a padny na dróhu. Rumowanje traješe wjacore hodźiny. 62lětny šofer dyrbi z chłostanjom ličić, dokelž njebě kašćiki porjadnje přiwjazał.
Z gumijowym čołmom bjezmała do dowoloweje łódźe na rěce Mosel prasnyła je skupina ludźi w Porynsko-Pfalcy. Swědcy běchu policiju informowali, dokelž čołm ze swojim wašnjom jězdźenja wobchad łódźow na rěce pola Bernkastel-Kues wohrožowaše. Jako policija čołm kontrolowaše, jedyn z muži do rěki skoči. Wšitkich štyrjoch wočakuje chłostanje wohrožowanja wobchada dla.
Mało ludźi bibliju čita
Lipsk (B/SN). Uniwersita Lipsk je we wosebitej studiji zwěsćiła, zo ma 40 procentow ludźi bjez konfesije wobsahi biblije za zajimawe, ale jenož 1,6 procentow Němcow w njej wšědnje, tydźensce 3,2 procentaj a 30 procentow jónu wob lěto čita, hačrunjež kóždy druhi ćišćany eksemplar Swjateho pisma wobsedźi. Jedna so wo prěnje reprezentatiwne cyłoněmske naprašowanje, na kotrymž bě so 1 209 wěriwych a njewěriwych wobdźěliło. Nawoda studije Gert Pickel „najebać mało čitarjow wobhladuje so biblija jako kulturne herbstwo za towaršnosć.“
Čas za reformy
Bonn (B/SN). Po wozjewjenju masiwnych wustupow z katolskeje cyrkwje a woteběraceje ličby kemšerjow žada sej žurnalistka Andrea Hoffmeier reformy. Wjesołe poselstwo Jězu Chrysta ma ludźi ze słowom a skutkom přeswědčić. Wažne dopóznaća swětoweje synody a ze Synodalneho puća maja so zaměrnje přesadźić. Trěbne je po słowach Hoffmeier mjez druhim nowe zrozumjenje wosady, nawjedowanja, samopostajenja, kultury dowěry a plurality.
Přećiwo dominancy muži
Rutte wopušći politiku
Den Haag (dpa/SN). Nižozemski ministerski prezident Mark Rutte chce po zwrěšćenju knježerstwa politiku wopušćić. Wón nochcył při nowowólbach wjace jako kandidat za swoju prawicarsko-liberalnu stronu VVD za pjatu dobu zastojnstwa nastupić a politiku wopušći, rjekny 56lětny Rutte dźensa w Den Haagu. Koalicija štyrjoch stron bě minjeny pjatk na krizowym posedźenju w zwadźe migraciskeje politiki dla rozpadnyła.
Steinmeier so AfD dla starosća
Berlin (dpa/SN). Zwjazkowy prezident Frank-Walter Steinmeier starosća so dobrych wuslědkow woprašowanjow AfD dla a warnuje před protestnymi wólbami. „Kóždy woler přewozmje zamołwitosć“, rjekny wón w lěćnym rozmołwje sćelakej ZDF. To płaći tež, „hdyž stronu sylniš, kotraž hrubosći rozestajenjow polěkuje“, wón rjekny. AfD docpěwa we woprašowanjach mjeztym 20 procentow. W Braniborskej, Durinskej a Sakskej je wona tuchwilu najsylniša politiska móc.
Unija za tepjenski konsens
Jednanja do zahajenja wjerška
Zranjeni při honjeńcy bykow
Žane wobdźělenje NATO na wójnje
Berlin (dpa/SN). Wědomostna słužba zwjazkoweho sejma nima tuchwilu žanych prawniskich pokazkow na to, zo so Němska z druhimi krajemi NATO z dodawanjom bróni na wójnje w Ukrainje wobdźěla – štož jej Ruska wumjetuje. „Dotal njenamakaja so žane prawniske posudki, kotrež bychu podpěru čłonskich krajow NATO jako formu wobdźělenja na konflikće hódnoćili“, rěka w posudku, kotryž bě zapósłanča Lěwicy Sevim Dagdalen skazała.
Přiwšěm wědomostnicy kritizuja, zo njejsu kriterije wobdźělenja na konflikće w ludowym prawje jasnje dosć definowane. Při tym njeńdźe jenož wo hardware, wo twjerdy material kaž brónje. Tež software měła so wobkedźbować. To potrjechi koordinowanje, wusměrjenje a nawod wojowanjow přez informacije tajnych słužbow a wojerskich poradźowarjow abo wukubłanja wojakow. Wužadanje wobsteji w tym, kriterije wobdźělenja na wójnje jasnišo postajić, w posudku rěka. Ruska krajam NATO wumjetuje, zo so z dodawanjom bróni na wójnje wobdźěleja.
Lauterbach: Tónkróć so radźi
Dalše posedźenje strowotniskich ministrow k reformje chorownjow
Berlin (dpa/SN). Do rozmołwow zwjazkoweho knježerstwa ze zastupnikami zwjazkowych krajow wo planowanej reformje chorownjow je zwjazkowy minister za strowotnistwo Karl Lauterbach swój optimizm zwuraznił. „Sym sej wěsty, zo so předewzaće tónkróć radźi“, rjekny politikar SPD dźensa rano w rozhłosu. „Smy swoje pozicije stajnje zaso trochu zbližili.“ Zdobom wón potwjerdźi, zo nochcył wo wšěm diskutować. Lauterbach na to pokaza, zo su kraje zamołwite za to, hdźe chorownje su a hač maja w městach jednu, dwě abo tři kliniki.
Bayerski minister za strowotnistwo Klaus Holetschek bě sej kónc tydźenja kompromis žadał, kotryž krajam móžnosće sobu skutkowanja njerubi. Politikar CSU chcył, zo kraje dale prawo planowanja za regionalne zastaranje z chorownjemi wobchowaja.
To a tamne (10.07.23)
W stilu policajskeho awta je 25lětna žona w Hannoveru swoje awto pomolować dała. Jenož reflektowace folije njeje wona wužiwać směła. Tež wopon a módra swěca běchu tabu, wona zdźěla. Na motorowej hawbje steji wotnětka „Police“ a nic „Polizei“. To je wažny rozdźěl, dokelž njeje design prawnisce škitany. Byrnjež 25lětna wšitke předpisy dodźeržała, je ju policija mjeztym wospjet zadźeržała.
Wosom huškow wuchowała je wohnjowa wobora z dešćikoweje roły w delnjofrankskim Aschaffenburgu. Młodźata běchu so na třěše historiskeho hrodu 22 metrow hłuboko do roły sunyli a njemóžachu so hižo sami wuswobodźić. Sobudźěłaćerka hrodu bě žałosćenje huškow słyšała a wohnjowu woboru zawołała. Wobornicy młodźata z ruku wućahnychu. Starka akciju wobkedźbowaše a so po wuchowanju z huškami zminy.
Žane skrótšenja za załožbu
Strašne bomby Ukrainje
Washington (dpa/SN). Knježerstwo USA chce Ukrainje po informacijach medijow brojacu so municiju přewostajić. Zakitowanske ministerstwo nochcyše drje wotpowědne informacije wobkrućić medijam pak dokumenty předleža. Brojaca so municija nad cilom w powětře rozbuchuje a dalše małe bomby rozdźěluje, kiž potom rozbuchnu. Američenjo běchu tajke bomby we wójnje přećiwo Vietnamje zasadźowali a tak protesty po wšěm swěće zbudźili. Bomby su wosebje mjez ciwilistami wjele woporow zawinowali.
Němske wójsko škita wjeršk
Vilnius (dpa/SN). Štyri dny do wjerškoweho zetkanja NATO w litawskej stolicy Vilniusu su tři za škit zetkanja nastajene baterije powětrowy rum škitaceho systema Patriot zwjazkoweje wobory zasadźenja kmane. Němske wójsko přewozmje z brónjowym systemom a něhdźe 250 wojakami škit wjerška před raketami, ale tež před lětadłami. NATO reaguje tak na přiwótřene wěstotne połoženje, bjez toho zo by pokiwy na wohroženja měło.
Habeck terminal zakitował
