Berlin (dpa/SN). Zwjazk a zwjazkowe kraje njeplanuja najprjedy raz žane přidatne wobmjezowanja přez hodowne swjate dny, chcedźa pak połoženje dale wobkedźbować. Přichodny tydźeń ma so planowana rada fachowcow schadźować, zo by połoženje noweje wirusoweje warianty omikron dla dokładnišo posudźowała. To je ministerski prezident Sewjerorynsko-Westfalskeje Hendrik Wüst (CDU) po wčerawšich wuradźowanjach zastupjerjow Zwjazka a krajow připowědźił.

Zwjazkowy kancler Olaf Scholz (SPD) chcył tohorunja wědomostny posudk wočaknyć a potom hladać, hač tuchwilne postajenja dosahaja. W nuzy měli krótkodobne naprawy na dnjowy porjad stajić. Scholz potwjerdźi, zo tuchwilne daloko sahace wobmjezowanja za nješćěpjenych tež přez hody dale płaća.

Kaž Berlinski knježacy wyši měšćanosta Michael Müller rjekny, je bjeze wšeho móžno so hody ze swójbu a přećelemi zetkać. Kóždy pak ma na swój škit dźiwać.

Berlin (dpa/SN). Němski institut za čłowjeske prawa ma hladajo na wuwiće koronapandemije zakonske rjadowanje tak mjenowaneje triaže za nuznje trěbne. „Status šćěpjenja njesmě žanu rólu hrać“ w prašenju, štó dóstanje w padźe móžneho přećeženja strowotniskeho systema intensiwnolěkarske zastaranje a štó nic, potwjerdźi direktorka instituta Beate ­Rudolf wčera w Berlinje. Tež wosoba, kotraž so „njerozumnje abo njesolidarisce“ zadźerži, ma prawo na strowotu.

W swojej najnowšej lětnej rozprawje namołwja institut hladajo na móžne problemy w chorownjach: „Němska trjeba čłowjesko- a wustawoprawnisce wopodstatnjene zasady jako zakład rozsudow, komu lěkarjo najprjedy pomhaja. Tajke zakonske rjadowanje měło aspekty postajić, kotrež njesmědźa za wuzwolenje pacientow žanu rólu hrać, kaž su to hišće wočakowany čas žiwjenja, žiwjenska kwalita, wužitk za towaršnosć abo staroba. Zakonjedawar njemóže čakać, doniž Zwjazkowe wustawowe sudnistwo wo tym njerozsudźi. Tuchwilna praksa na intensiwnych stacijach starych a zbrašenych „diskriminuje“, kaž institut zwěsća.

Z papjercowym čołmom je 22lětny po Neckaru w Stuttgarće jěć chcył, a to naje­bać zymske wjedro jenož w kupanskich cholowach. Tak chcyše so na Youtube hordźić. Z papjercowych tyzow spasleny a z wotpadkowymi titami wobdaty spław je wón wčera do wody pušćił, w poslednim wokomiku pak nastroj radšo zaso wućahnył. Policisća běchu jeho doraznje powučili, „zo tajka jězba scyła žana dobra myslička njeje“.

Z wubědźowanja wo najrjeńšeho kamela w Sawdi-Arabskej su wjacorych wobdźělnikow wuzamknyli. Tući běchu zakazane srědki wužiwali, zo bychu zwěrjata „płaćiwym měritkam rjanosće“ wotpowědowali. Potrjechenych je 43 kamelow. Jim běchu wobsedźerjo botox šćěpili, zo by koža krućiša była. Wubědźowanje je lukratiwne: Dobyćerjej kiwa myto 58 ­milionow eurow.