Tež čěske strowotnistwo je přiběraceje ličby natyknjenjow z ...
Merkel rěči z Morawieckim
Berlin (dpa/SN). Amtěrowaca zwjazkowa kanclerka Angela Merkel (CDU) je dźensa z pólskim ministerskim prezidentom Mateuszom Morawieckim w Berlinje wo napjatym połoženju na běłorusko-pólskej mjezy wuradźowała. W běhu popołdnja chcyštaj wonaj zjawnosć zhromadnje wo wuslědkach informować.
Hižo přez tydźenje spytaja tysacy migrantow z Běłoruskeje wonkownu mjezu Europskeje unije přewinyć a so do Pólskeje abo baltiskich statow předrěć. EU běłoruskemu mócnarjej Aleksanderej Lukašenkej wumjetuje, zo ćěkancow z krizowych kónčin zaměrnje do Běłoruskeje wabi a jich dale do EU sćele, zo by ju tak pod ćišć stajił a so za sankcije ze stron zjednoćenstwa statow Europy wjećił.
Krótkodźěło podlěšene
Nalada mjez zawodami dale špatna
Mnichow/Berlin (dpa/SN). Nalada mjez němskimi předewzaćelemi je so w nowembru znowa pohubjeńšiła. Wot instituta Ifo zwěsćena wobchodna klima, najwažniši konjunkturny barometer Němskeje, je porno oktobrej wo 1,2 na nětko 96,5 dypkow woteběrała, kaž institut wčera w Mnichowje zdźěli. Je to pjaty woteběracy měsac za sobu. Fachowcy wšak běchu snadniši spad wočakowali. Woni maja wuslědk naprašowanja za znamjo stagnacije, snano samo woteběraceho hospodarstwa.
Tež němska Industrijna a wikowanska komora (DIHK) je hladajo na přiwótřenu koronakrizu alarmowana. Prezident DIHK Peter Adrian rjekny powěsćerni dpa: „Dobre wuwiće na akcijowych wikach njesmě nas slepić. Mnohim předewzaćam Němskeje so hižo zaso chětro špatnje dźe. Mnozy samostatni, małe rjemjeslniske a srjedźostawske zawody město rozmacha skerje nowu krizu dožiwjeja.“
Při naprašowanju posudźuja zawody swoje tuchwilne połoženje a wuhlady do přichoda.
Scholz liči z přihłosowanjom
SPD, Zeleni a FDP so na koaliciske zrěčenje dojednali – Lěwica kritiska
Berlin (dpa/SN). Po dojednanju wodźacych zastupnikow SPD, Zelenych a FDP na koaliciske zrěčenje wo wutworjenju po wšej Němskej prěnjeje tak mjenowaneje amploweje koalicije su nětko čłonojo a delegaća na rjedźe. Hižo dźensa chcychu so Zeleni swojich čłonow prašeć, hač koaliciskemu zrěčenju a personalnym planam nowe knježerstwo nastupajo přihłosuja. Wothłosowanje ma dźesać dnjow trać a digitalnje abo z listom móžne być. Za přihłosowanje dosaha jednora wjetšina. We wobłuku SPD a FDP maja delegaća spočatk decembra na stronskimaj zjězdomaj koaliciske zrěčenje wotžohnować.
Byrnjež w koaliciskich jednanjach wšitke tři strony kompromisam přizwolić dyrbjeli, je sej přichodny zwjazkowy kancler Olaf Scholz (SPD) wěsty, zo wšitke tři strony zrěčenju přihłosuja. „To sym jara optimistiski. Je to dobry wuslědk z wida wšitkich třoch stron“, rjekny wón wčera wječor w telewiziji ARD.
Swěca a sćin
To a tamne (25.11.21)
Najebać zawrjene adwentne wiki w Lipsku koronapandemije dla móža sej ludźo tež lětsa zaso woblubowane dźěćace šalki z motiwom pěskowčika kupić. Předawać chcedźa je, dołhož su na składźe, wot 1. decembra přez internetny portal abo w předawanišću na Lipšćanskim Hłownym torhošću. Nimo toho poskića tež normalne zelene winowe šalki. Lipšćanske hodowne wiki dyrbja runje tak kaž hižo loni korony dla wupadnyć.
Gitara Bruca Springsteena abo keyboard Eltona Johna: Za beneficnu akciju w Los Angelesu je tójšto sławnych hudźbnikow swoje instrumenty dariło. Přesadźować budu je 11. decembra, kaž awkciski dom zdźěli. Wunošk awkcije přewostaja organizaciji, kotraž hudźbne šule na juhu USA podpěruje, zo móhli tež chude dźěći na instrumentach hrać nawuknyć.
Strukturu za zaručene samopostajowanje wutworić
Budyšin (SN/bn). „Wutworić korporaciju zjawneho prawa je najbóle dowidźomna naprawa, kotraž by kolektiwnemu samopostajowanju Serbow najlěpje polěkowała. Wosobinsce tajki krok z wulkej sympatiju wobhladuju.“ Tak zjima fachowc za statne a ludowe prawo dr. Stefan Oeter z Hamburgskeje uniwersity swoje mysle nastupajo prašenje, kak hodźała so kulturna awtonomija Serbow zwoprawdźić a juristisce zaručić. Wosebity hósć a eksperta wčerawšeho seminara „Samopostajowanje Serbow w Sakskej“, internetnje wuhotowaneho wot wuběrka „wustawa a prawo“ Serbskeho sejma, poda pohódnoćenje wot iniciatiwy zestajeneho naćiska za „statne zrěčenje“, rjadowace poćahi mjez Zwjazkom kaž tež Sakskej a Braniborskej a serbskim ludom. „Rozdźělnych přičin dla je mi naćisk problematiski. Sprěnja złožuje so na zrěčenja mjez statom a cyrkwjemi, štož mam za tola trochu přehnaty narok. Kmańšo drje by było so na wotpowědnych dojednanjach, na přikład z uniwersitami abo hospodarskimi komorami, orientować. Zdruha měli jasnje mjez teritorialnej a personalnej awtonomiju rozeznawać.
Za winowatosć šćěpjenja
Berlin (dpa/SN). Wjetšina wobydlerjow Němskeje wupraja so za powšitkownu winowatosć šćěpjenja pře koronawirus. To je wuslědk naprašowanja slědźenskeho instituta YouGov. Tak by 69 procentow woprašanych tajki powšitkowny zawjazowacy škit přećiwo strašnemu wirusej witało. 23 procentow to wotpokazuje. Před tydźenjomaj bě so hišće 44 proc. za šćěpjensku winowatosć wuprajiło, loni 26. decembra hišće 33 proc.
Předstaja koaliciske zrěčenje
Berlin (dpa/SN). SPD, Zeleni a FDP chcychu dźensa popołdnju swoje koaliciske zrěčenje za zhromadne zwjazkowe knježerstwo předstajić. Dobre wosom tydźenjow po wólbach zwjazkoweho sejma měješe zjawnosć wo dotal dowěrliwje wujednanych nadrobnosćach zhromadneho dźěła zhonić. Dopołdnja su so hłowni zastupnicy jednanjow wšitkich třoch stron na swojim zakónčacym posedźenju schadźowali. Zahajili su koaliciske jednanja 21. oktobra, po tym zo běchu so strony tak mjenowaneje ample na to dojednali.
Chcedźa chorych přepołožić
