Berlin/Drježdźany (dpa/SN). W zwisku ze sylnje stupacymi ličbami korona­natyknjenjow w Sakskej je zapósłanc zwjazkoweho sejma Torsten Herbst (FDP) krajne knježerstwo namołwił, so za to zasadźiło, koronatesty znowa bjezpłatnje zmóžnić. „Znajmjeńša we wokrjesach, kotrež maja wysoke ličby infekcijow, měł zaso poskitk bjezpłatnych testow za wšitke wobydlerki a wšitkich ­wobydlerjow być“, rjekny Herbst wčera w Berlinje.

Njewotwisnje wot šćěpjenjow je prawidłowne testowanje wažny instrument, zo hodźeli so natyknjenja zahe spóznać a infekciske rjećazy přetorhnyć. Tež dwójce šćěpjene wosoby móža so natyknyć a infekcije dale dawać.

Berlin/Lindau (dpa/SN). Z 33 949 nowymi koronainfekcijemi je so telko ludźi w běhu dnja natyknyło kaž ženje do toho w Němskej. Paralelnje k nowemu rekordej pytaja ministrojo za strowotu Zwjazka a krajow wot dźensnišeho na konferency w Lindauje nad Bodamskim jězorom za nowym zhromadnym kursom za pandemiju w zymje. Mjez druhim chcedźa hač do jutřišeho diskutować, kak móža wjace ludźi za wobnowjace šćěpjenje motiwować. Tež testowa winowatosć w hladarnjach je tema. Hišće amtěrowacy zwjazkowy minis­ter za strowotu Jens Spahn (CDU), je wčera znowa za tak mjenowane „boosterowe“ šćěpjenja wabił. Z jeho wida njeńdźe spěšnje dosć. Tohodla maja zwjazkowe kraje wšitkim ludźom w starobje nad 60 lětami list pisać a na to pokazać. Z krajow je namjet přišoł, wšitkich, kotřiž su starši hač 70 lět, pisomnje informować.

Wotewrjene je tež prašenje, hač maja so regionalne šćěpjenske centry za boosterowe šćěpjenje reaktiwizować. Wjacore kraje, Němski dźeń městow a zastupjerjo lěkarjow su namjet Spahna kritizowali.

Berlin (dpa/SN). Dźěłarnistwo policije (GdP) nima kontrole při mjezy k Pólskej najebać jasnje zwyšeneje ličby njedowolenych zapućowanjow požadarjow azyla tuchwilu za trěbne. „Aktualne migraciske połoženje drje je chutne, přiwšěm pak jara zdalene wot situacije, kajkuž smy we wobłuku masoweje migracije w lěće 2015 dožiwili. Tak wokomiknje scyła žaneje přičiny njeje, nachwilnje namjezne kontrole přewjesć“, rjekny předsyda GdP za zajimy zwjazkoweje policije Andreas Roßkopf wčera.

Ze 120 hač do 280 bjez dowolnosće zapućowanymi migrantami na dźeń při cyłkownej mjezy k Pólskej wot Ahlbecka hač do Žitawy su hišće we wobłuku, w kotrymž njeje wysoke zapřimnjenje do pućowanskeje swobody Europskeje unije z namjeznymi kontrolemi wusprawnić, wón doda. Roßkopf měješe nastupajo połoženje při němsko-pólskej hranicy tónle tydźeń tež rozmołwu z tuchwilu jednacym zwjazkowym ministrom nutřkowneho Horstom Seehoferom (CSU) a z Dagmar Busch, nawodnicu wotrjada za naležnosće zwjazkoweje policije w ministerstwje.

Glasgow (dpa/SN). Na swětowym klimowym wjerškowym zetkanju su zastupjerjo wuwićowych krajow industrijne staty namołwili, zo bychu jich wustorkowanja škódnych maćiznow hač do lěta 2030 połojcowali a financne slubjenja dodźerželi. „Njemóžemy dlěje čakać“, rjekny Sonam Phuntsho Wangdi, zastupjer knježerstwa z Bhutana a rěčnik skupiny nanajmjenje wuwitych krajow wčera w Glasgowje. „My smy nanajmjenje k tutej krizy klimy přinošowali.“

46 krajow skupiny, w kotrychž je ně­hdźe miliarda ludźi žiwa, su po słowach Wangdija jenož za jedyn procent globalnych klimoškódnych wustorkowanjow zamołwite. Runočasnje su wone hižo nětko wšědnje wot změny klimy potrjechene. „Smy wotwisni wot toho, štož so tu rozsudźi“, Wangdi podšmórnje. Wón je zhromadźenstwo statow namołwił, połojcowanje parnišćowych płunow hač do lěta 2030 postajić.

Zastupjerjo wuwićowych krajow běchu přesłapjeni, zo industrijne staty swoje w Pariskim klimowym zrěčenju po­twjerdźene slubjenje, kóžde lěto 100 miliardow dolarow k zmištrowanju klimoweje krizy přewostajić, hakle ze zapozdźenjom docpěja.