Zasudźeja smólnicowy ćah
Berlin/Drježdźany (dpa/SN). Wodźacy politikarjo su sakskej ministerce za strowotnistwo Petrje Köpping (SPD) swoju solidaritu wobkrućili a smólnicowy ćah něhdźe 30 ludźi před jeje domom minjeny pjatk w Grimmje zasudźili. Akciju wótrje kritizowali su mjez druhim předsyda SPD Norbert Walter-Borjans, zwjazkowy nutřkowny minister Horst Seehofer (CSU) a sakski ministerski prezident Michael Kretschmer (CDU). Seehofer rěčeše wo „organizowanym zatrašenju“.
Hotuja so na demonstraciju
Drježdźany (dpa/SN). Sakski krajny sejm chcyše dźensa popołdnju wo móžnym podlěšenju epidemiskeho połoženja w swobodnym staće rozsudźić. Hłowna přičina je dramatiske połoženje koronapandemije dla. Minjeny pjatk bě Roberta Kochowy institut za Saksku sydomdnjowsku incidencu 1 224 na 100 000 wobydlerjow zwěsćił. Policija hotowaše so z wodomjetakami na wulku demonstraciju přećiwnikow naprawow koronawirusa dla před krajnym sejmom.
Wjace bróni předawali
Bamž Franciskus je we wobłuku swojeho wopyta na Cypernje a w ...
Lauterbach budźe minister
FDP přihłosuje
Berlin (dpa/SN). FDP je z SPD a Zelenymi wujednanemu koaliciskemu zrěčenju z wjetšinu přihłosowała. Na wčerawšim digitalnym zjězdźe hłosowaše 535 delegatow z „haj“ a 37 z „ně“. Wosmjo so hłosa wzdachu. Po ličenju FDP wotpowěduje to 92,24 procentam přihłosowanja. Sobotu bě zjězd SPD zrěčenje z wjace hač 98 procentami přiwzał. Wuslědk wothłosowanja čłonow Zelenych wočakowachu dźensa popołdnju.
Wjednistwo FDP bě naležnje za 177 stron wopřijace zrěčenje a za planowanu amplowu koaliciju wabiło. „Sym přeswědčeny: Tutón kraj změje z koaliciskeho zrěčenja swoje lěpšiny, nowy rozmach je móžny“, rjekny předsyda Christian Lindner, nowy financny minister.
Putin a Biden chcetaj rěčeć
Moskwa/Washington (dpa/SN). Wosrjedź nowych napjatosćow w konflikće Ukrainy dla chcetaj ruski prezident Wladimir Putin a prezident USA Joe Biden jutře mjez sobu rěčeć. Internetny wjeršk su mjeztym w Krjemlu runje tak wobkrućili kaž w Běłym domje. Europska unija je Ukrainje wčera swoju podpěru přilubiła. Ruski wonkowny minister Sergej Lawrow porno tomu Němsku a Francosku namołwja w konflikće wjace wliwa wukonjeć. Putin a Biden staj připowědźiłoj, zo chcetaj konflikt na Ukrainje rozjimać.
Amerika a Ruska sej mjez sobu přihot wojerskeho zasahnjenja wumjetujetej. Stajnje zaso jewja so rozprawy wo pozdatnych planach Ruskeje, Ukrainu nadpadnyć. „Ofensiwa“ móhła so spočatk přichodneho lěta zahajić, kaž nowiny USA rozprawjeja.
Ruske wonkowne ministerstwo USA wumjetuje, zo chcedźa z „wurjadnej akciju“ połoženje na Ukrainje dale přiwótřić a zamołwitosć za to Ruskej přisunyć. Berlin a Paris njejstej dotal swojej zamołwitosći posrědkowanja wotpowědowałoj.
Žitawa nadźija so kamerow
Ličba kradnjenjow a zadobywanjow w pomjeznej kónčinje dale wulka
Žitawa/Zhorjelc (dpa/SN). Wobydlerjo Žitawy su znjeměrnjeni: Stajnje zaso jewi so mjeno města w třikrajowym róžku k Pólskej a Čěskej w policajskich rozprawach nastupajo padustwa a zadobywanja do bydlenjow. W socialnych syćach naležnje wo tym diskutuja, nic bjez přičiny. Po kriminalnej statistice je jeničce ličba kradnjenych jězdźidłow wot lěta 2019 do 2020 wo 76 procentow rozrostła.
Tež Žitawski wyši měšćanosta Thomas Zenker (njestronjan) ličby znaje. Hižo nalěto žadaše sej wón po wozjewjenju policajskeje statistiki wot sakskeho nutřkowneho ministerstwa wotpowědne naprawy. Wón so za to zasadźa, jednanje k instalaciji stražnych kamerow na najwažnišich čarach w Žitawskej kónčinje pospěšić. Srědki za to měli w etaće kraja zaplanowane być. „Smy w pomjeznym regionje. Tu je kriminalita wjetša hač wosrjedź kraja. Wjesnjanosća w hórskich kónčinach su runje tak alarmowani kaž předewzaćeljo“, wón wuzběhnje.
To a tamne (06.12.21)
Swojimaj wočomaj wěrić nochcyše wobsedźer pensije w juhozapadopfalcskim Hinterweidenthalu: W jednym z jeho łožow ležeše jemu cuzy muž – a to hišće dospołnje nahi. 65lětny „njeprošeny hósć“ bě so wčera do pensije zadobył, so wuslěkał a so do łoža lehnył. Policija přepytuje nětko ranjenja domjaceho měra dla. Kóšty za přidatne rjedźenje wšak je muž hnydom zapłaćił, kaž rěkaše.
Z bombu hrozył je 16lětny powołanskej šuli w sewjerorynsko-westfalskim Hammje, zo móhła so 21lětna šulerka kubłanišća nachwatanskej klawsurje wuwinyć. Młoda žona bě w interneće wo tajki telefonat prosyła. 16lětny drje chcyše jej swoju zmužitosć dopokazać a je w šuli zazwonił. Pozdźišo so młodostny sam pola policije přizjewi a njeskutk přizna. Policija přepytuje nětko přećiwo woběmaj kaženja zjawneho měra a hroženja dla.
„EU bjez Pólskeje njepředstajomna“
Němski wulkopósłanc na Collegiumje Polonicumje w Słubicach přewšo wobdźiwanu narěč měł
Wjace hač tři miliony zetkawanjow běchu so mjez młodostnymi z Pólskeje a Němskeje po podpisanju zrěčenja wo němsko-pólskim susodstwje a po runočasnym wutworjenju Němsko-Pólskeho młodźinskeho skutka dnja 17. junija 1991 wotměli. Wjace hač 400 binarodnych měšćanskich partnerstwow tworješe krute styki mjez towaršnosćomaj Pólskeje a Němskeje, kotrež pak so w zjawnosći přemało wotbłyšćuja. A předewšěm: Dynamika hospodarskich poćahow mjez Pólskej a Němskej je přewodźana wot wuspěcha. Pólska postupi w lěće 2020 k pjatemu najwažnišemu wikowanskemu partnerej Němskeje a přesćahny tak Italsku a Wulku Britanisku. 6 000 němskich předewzaćow je w Pólskej hospodarsce aktiwnych, 1 000 pólskich w Němskej.
Bamž ćěkancow wopytał
Nikozija (dpa/SN). Bamž Franciskus je dźensa ze swojim wopytom na Cypernje pokročował a so tam z nawodu prawosławneje cyrkwje Chryzostomosom II. rozmołwjał. W běhu dnja planowachu Božu mšu w stadionje stolicy Nikozije. Wjeršk pak měješe zetkanje z migrantami w cyrkwi swj. křiža w centrumje stolicy być. Bamž chcyše na połoženje ćěkancow, kotřiž běchu sej na kupu wućeknyli, skedźbnić a 50 z nich sobu do Roma wzać.
Šmjatki w Awstriskej
Wien (dpa/SN). Wotstup bywšeho awstriskeho zwjazkoweho kanclera Sebastiana Kurza jako šef konserwatiwneje ÖVP a z politiki scyła ma razne sćěhi za aktualnu koaliciju ÖVP ze Zelenymi. Kancler Alexander Schallenberg je wčera wječor připowědźił, zo chce tohorunja wotstupić, dokelž měłoj wobě zastojnstwje – kanclerstwo a předsydstwo ÖVP – w jednej ruce być. „To pak njebě nihdy mój wotpohlad a mój zaměr“, wón rjekny.
Sankcije migrantow dla
