To a tamne (12.11.21)
Debjenki z wobsydstwa ruskeje carskeje swójby su w šwicarskim Genfje přesadźowali. Ze safirami a diamantami wobsadźenu brošu a nawušnicy bě britiski diplomat za čas Oktoberskeje rewolucije 1917 z Ruskeje pašował. Debjenki je sej nětko anonymny kupc, kiž bě na awkciji telefonisce wobdźěleny, za 765 000 eurow zawěsćił. Drohoćinka słušeše něhdy ćeće carja Mikławša II., wulkowójwodce Mariji Pawlownej.
Po njewšědnym wuměranju ptakow w tropiskej hali „Gondwanaland“ Lipšćanskeho zwěrjenca je wona najprjedy jónu zaso wotewrjena. W běhu krótkeho časa běchu tam dwanaće štrusowych pocpulow a dwaj pawowej bažantaj zahinyli. Tak su halu na tři dny zawrěli. Mjeztym pak je wujasnjene, zo njejsu ptaki ani na ptaču gripu ani na t. mj. Newcastle-chorosć zahinyli.
Někotre wotewrjene prašenja
Berlin (dpa/SN). Wčera wječor dyrbješe 22 dźěłowych skupin we wobłuku koaliciskich jednanjow předsydstwam stron SPD, FDP a Zeleni swoje wuslědki předpołožić. Někotre wažne prašenja su hišće wotewrjene. Njedźiwajcy toho předsyda SPD Norbert Walter-Borjans wuslědki pozitiwnje posudźuje. „Bychu-li jednanja bjez problemow wotběželi, bychmy so prašeć dyrbjeli, štó je při wólbach přećiwo komu nastupił.“
Spahn nochce kandidować
Berlin (dpa/SN). Tučasny strowotniski minister a městopředsyda CDU Jens Spahn nochce so wo naslědnistwo stronskeho předsydy Armina Lascheta požadać. To rjekny wón wčera na posedźenju frakcije CDU/CSU w Berlinje. Město toho zo so wólbnemu bojej wěnuje, chce so Spahn radšo hač do poslednjeje mjeńšiny na swoje ministerstwo koncentrować. „Sym w teamje unije“, wón potwjerdźi.
Žona na čole rady EKD
Tichanowskaja přećiwo dialogej
Berlin (dpa/SN). Napjatosć na hranicy mjez Pólskej a Běłoruskej přiběra. Tysacy ćěkancow přebywaja tam w lochkich stanach a spytaja do EU dóńć.
Swjetlana Tichanowskaja je w Berlinje – tam zetka so tež z amtěrowacym financnym ministrom Olafom Scholzom (SPD) – Němskej wotradźiła z awtoritarnje knježacym Aleksanderom Lukašenkom rozmołwy w naležnosći wjesć. „Dialog z režimom Lukašenka njeje móžny. Tajne jednanja problem njerozrisaja“, Tichanowskaja podšmórny.
Mobilne mini-šćěpjenske centrumy
Zhorjelc (dpa/SN). Hladajo na sylnje stupacu ličbu natyknjenjow z koronawirusom chce wokrjes Zhorjelc mobilne mini-šćěpjenske centrumy wutworić. „Našimaj mobilnymaj šćěpjenskimaj teamomaj je swobodny stat dalšej přilubił. Jednamy ze zamołwitymi w Běłej Wodźe, Zhorjelcu, Lubiju a Žitawje, teamy tam na krutych terminach zasadźeć“, zdźěli wčera socialna decernentka Martina Weber.
Koronawirus ma wokrjes znowa chětro w horšći. „W běhu minjeneju dweju tydźenjow je so ličba pacientow w chorownjach podwojiła, na intensiwnych stacijach samo potrojiła“, Martina Weber wuswětli. Dale je Zhorjelski wokrjes znowa Zwjazkowu woboru wo pomoc prosył, 150 zarjadniskich sobudźěłaćerjow so nětko zaso wo slědowanje kontaktow stara. Krajny rada Bernd Lange (CDU) připowědźi razniše kontrole dodźerženje prawidła 2G nastupajo.
Jenož model njewostać
Zhromadnje za měr na swěće
To a tamne (11.11.21)
Z tempom 306 kilometrow na hodźinu bu njedaloko belgiskeho Lütticha šofer awta błysknjeny. To bě wón chětro spěšnje ze swojim wozom po puću. W Belgiskej směš poprawom jeno 120 kilometrow na hodźinu jěć. Dokelž pak su tamniše błyskače na maksimalne tempo 300 km/h wusměrjene, bě wodźer awta samo za tajki přespěšny a njetrjeba tuž žanu pokutu płaćić.
Wjacore lětdźesatki stare ćěło je policajski pos při zwučowanju we wokolinje wulkana Etna na Sicilskej namakał. W małej prózdnjeńcy wjedźeše pos zastojnikow k ćěłu. Po prěnich přepytowanjach policija z toho wuchadźa, zo bě muž tam w lětach 1970 do 1990 zemrěł. Při sebi měješe tež někotre lira-pjenježki. To bě italska měna do zawjedźenja eura.
Ambiwalencu znjesć a wutrać
Powalenje Berlinskeje murje a kwakla pogromoweje nocy
Berlin (dpa/SN). Centralna rada Židow w Němskej je so wospjet přećiwo tomu wuprajiła, 9. nowember jako wopomnjenski dźeń wjacorych historiskich podawkow wuhotować. „Tónle datum měł so ze spomnjećom za wopory holocausta stać“, rjekny wčera prezident centralneje rady Josef Schuster w Berlinje.
13 zranjenych wuchowali
Istanbul (dpa/SN). We wuchodoturkowskim měsće Malatya je so z dotal njeznatych přičin twarjenje, w kotrymž běchu tež někotre wobchody zaměstnjene, sypnyło. Spočatnje běchu lokalni pomocnicy hišće z toho wuchadźeli, zo je 20 ludźi w rozwalinach we wulkej nuzy. Po wšěm zdaću pak běchu so mylili, wšako su dźensa rano wuchowanske dźěła zakónčili a cyłkownje 13 zranjenych do chorownjow dowjezli.
Protest a zajeća
Běłohród (dpa/SN). Grafiti w centrumje serbiskeho Běłohrodu, kotryž pokaza wójnskeho złóstnika Ratka Mladića jako rjeka, wuwabja napjatosće. Wčera demonstrowachu wjacore sta ludźi přećiwo wobrazej. Někotři su jeja mjetali. Třoch aktiwistow a třoch prawicarjow, kiž wobdźělichu so na přećiwnej demonstraciji, policija nachwilnje zaja. Pod Mladićom běchu w juliju 1995 masaker w bosniskim měsće Srebrenica skućili.
Poručeja jenož biontech
„Na docpětym njewotpočujemy“
Kiel (SN/JaW). Schleswigsko-Holsteinska chce swoje kompetency w regionalnych a mjeńšinowych rěčach hišće bóle zeskutkownjeć. To wuchadźa z rozprawy wo narodnych mjeńšinach w kraju, informuje Berlinski mjeńšinowy sekretariat. Konkretnje chcedźa w krajnych zarjadach a zjawnych zarjadnišćach mjez druhim wo nałožowanje mjeńšinowych rěčow wabić, dalekubłanja personala spěchować a hižo wobstejace rěčne znajomosće na tafličkach lěpje woznamjenić. Dale chcedźa w Schleswigsko-Holsteinskej „wučbu frizišćiny a danšćiny rozšěrić, tež jako poskitk wjetšinowemu wobydlerstwu. Wšako je frizišćina wohrožena rěč.“ Takle rěka w rozprawje, kotruž je schleswigsko-holsteinski ministerski prezident Daniel Günther (CDU) kónc minjeneho měsaca w Kielu krajnemu sejmej předstajił.
