USA kritizuja nowy pólski zakoń
Waršawa (dpa/SN). Knježerstwo USA kritizuje wot pólskeho parlamenta schwaleny wjele diskutowany nowy medijowy zakoń. Swobodne a njewotwisne medije su na dobro demokratije, zwurazni rěčnik wonkowneho ministerstwa Ned Price we Washingtonje krótko do wothłosowanja. „Tohodla smy pólske knježerstwo namołwjeli, swój angažement za tule zasadu dopokazać.“
Delnja komora pólskeho sejma je wčera wječor po turbulentnej debaće za dwělomny medijowy zakoń hłosowała. Nowy zakoń předwidźi, zo smědźa přichodnje wukrajnicy w Pólskej jenož potom rozhłosowe licency dóstać, hdyž maja swoju centralu abo hłowne bydlenje we wobłuku europskeho hospodarskeho ruma. Po měnjenju kritikarjow měri so zakoń na priwatny telewizijny sćelak TVN24, kiž słuša koncernej Discovery w USA. Sćelak je pólskej knježerstwowej stronje Prawo a sprawnosć napřećo kritisce nastajeny. Powšitkownje wočakuja, zo reforma rozhłosoweho zakonja poćaham mjez Pólskej a USA zeškodźi.
Wabja dale za šćěpjenje
Kanclerski kandidat unije Armin Laschet wólbnobojowu jězbu zahajił
Frankfurt n. M. (dpa/SN). Kanclerski kandidat CDU/CSU Armin Laschet wupraja so za to, kampanju šćěpjenja přećiwo koronawirusej zesylnić. Wšitke napinanja měli na to wusměrjene być, šćěpjenje dale pohonjeć. „Nowemu lockdownej dyrbimy zadźěwać“, rjekny Laschet na wopyće pjasćowarskeho kluba za młodostnych w Frankfurće nad Mohanom. Aktiwity, kaž te w integratiwnym pjasćowarskim klubje, su w koronapandemiji wosebje ćerpjeli. Zamołwići njesměli jenož na incidency hladać, ale dyrbjeli tež konsekwency na njedobro dźěći a młodostnych wobmyslić. „Jenož digitalnje přez wobrazowku njemóžeš zhromadnje socialnje wuknyć“, rjekny ministerski prezident Sewjerorynsko-Westfalskeje. Žurnalistam wón po swojim wopyće rjekny, zo „chce CDU přichodne tydźenje wojować. „Trjebamy skónčnje politiski wólbny bój z jasnym pomjenowanjom frontow.“ Tak dyrbjeli wo dźěłowych městnach w industriji rěčeć, štož měło z klimowej politiku zwjazane być.
Wustajeńca klětu w Budyšinje
To a tamne (12.08.21)
Nowu złotu medalju dóstanje japanska olympiadnica Miu Goto, po tym zo bě měšćanosta jeje ródneho města Nagoya Takashi Kawamura při witanju sportowcow w radnicy města do medalje kusnył. To je organizaciski komitej rozsudźił. Goto bě měšćanosće swoju złotu medalju wokoło šije powěsnyła, na čož 72lětny trofeju do ruki wza a do njeje kusny. Wobrazy sceny zbudźichu rozhorjenosć. Kawamura je so mjeztym zamołwił.
Nuznikowy připowěšak za prominentnych su w Hornjej Frankskej pokradnyli. Něhdźe 40 000 eurow drohi připowěšak běchu na zarjadowanju mebloweho wobchoda w Kulmbachu wužiwali a po tym při dróze wotstajili. Jako chcychu jón nazajtra wotewzać, bě wón preč. Za transport tajkeho připowěšaka wšak je wjetše nakładne awto trěbne. Policija nětko za swědkami pyta.
Pomocnicy do Grjekskeje dojěli
Patras (dpa/SN). Němscy pomocnicy su do grjekskeho přistawneho města Patras dojěli, zo bychu tamnišim wohnjowym woboram w boju přećiwo lěsnym wohenjam pomhali. Telewizijne wobrazy pokazuja, kak swój hłowny kwartěr natwarjeja. Cyłkownje wočakuja tam 220 wohnjowych wobornikow a čłonow Techniskeho pomocneho skutka ze 46 jězdźidłami. W Grjekskej mjeztym pomocnicy z 20 krajow přećiwo płomjenjam wojuja.
Namócnosće naprawow dla
Vilnius (dpa/SN). Při protestach přećiwo planowanym wobmjezowanjam koronawirusa dla je wčera wječor w Litawskej k namócnosćam dóšło. Při tym zajachu w stolicy Vilniusu 26 ludźi, dźesać policistow so zrani. Nastork protestow běchu plany knježerstwa, zo smědźa přichodnje jenož hišće přećiwo koronawirusej šćěpjeni zjawne wobchadne srědki a ćěłu bliske posłužby wužiwać. Něhdźe 5 000 demonstrantow bě so před twarjenjom parlamenta zhromadźiło. Tam dóńdźe k rozestajenjam z policiju.
Talibanojo dale postupuja
Kónc darmotnych testow schwaleny
Podstupim/Berlin (dpa/SN). Braniborski ministerski prezident Dietmar Woidke (SPD) je plany knježerstwa k zakónčenju darmotnych testow na koronawirus zakitował. „Hdyž je kóždy jednotliwc pola nas w kraju składnosć měł so šćěpić dać a hdyž njeje žanych medicinskich přičin přećiwo šćěpjenju, čehodla dyrbjała towaršnosć testy dale płaćić“, rjekny Dietmar Woidke wčera po posedźenju krajneho sejma w Podstupimje.
Wot 11. oktobra Zwjazk kóšty za darmotne testy hižo njepřewozmje. To su wčera na posedźenju ministerskich prezidentow zwjazkowych krajow z kanclerku Angelu Merkel (CDU) wobzamkli. Opozicija je wobzamknjenje konferency ministerskich prezidentow kritizowała. Předsyda FDP Christian Lindner rěčeše wo gratach krjudowanja. Šef Lěwicy Dietmar Bartsch žada sej pozitiwne poskitki k šćěpjenju město nuzowanja.
Tójšto ćahow stawka dla wupadnje
Lipsk (dpa/SN). Wot dźensnišeho ranja dyrbja so z ćahom pućowacy w Sakskej, Saksko-Anhaltskej a Durinskej na zapozdźenja a wupady nastajić. Hladajo na cyłoněmski stawk dźěłarnistwa lokomotiwnikow dźěła železnica mjeztym z narunanskim jězbnym planom. Tak dyrbja pasažěrojo předewšěm w regionalnym železniskim wobchadźe na wuchodźe Němskeje z wobmjezowanjemi ličić. W dalokowobchadźe je Němska železnica po cyłej Němskej 75 procentow swojich zwiskow šmórnyła. Ludźo maja wot wčerawšeho wječora składnosć, so internetnje wo narunanskim jězbnym planje železnicy wobhonić.
Dźěłarnistwo bě stawki wčera připołdnju po wuličenju wothłosowanja čłonow wobzamknyło a hižo wječor zahajiło. Oficialnje stawkuja lokomotiwnicy za wyšu mzdu a lěpše dźěłowe wuměnjenja. Tak žadaja sej koronowu premiju 600 eurow a 3,2 procentaj wjac mzdy w dwěmaj schodźenkomaj. Železnica chce wulkich stratow koronakrizy dla dobu zwyšenja mzdy časowje podlěšić.
To a tamne (11.08.21)
Kóčku z palaceho bydlenja wuchowała je wohnjowa wobora w Frankfurće nad Mohanom. Do toho bě w kuchni wjaceswójbneho domu woheń wudyrił. Wobydlerjo móžachu dom hišće wopušćić, jenož kóčka wosta w palacym bydlenju. 17lětna dźowka podarmo za njej pytaše a dyrbješe skónčnje bjez swojeje micki z bydlenja. Wohnjowa wobora ju skónčnje namaka. Dokelž bě so z kurom zajědojćiła, dósta wona samo kislikowu masku.
Zo by wutrajnosć baterije pruwował, je muž ze swojim e-scooterom po awtodróze A 2 jěł. Policija jeho zadźerža, po tym zo běchu jej to wjacori šoferojo přizjewili. Zastojnikam 24lětny rjekny, zo je elektriski roler dźeń do toho kupił a zo chcyše wědźeć, kak dołho aku dźerži. Zo njesmě na awtodróze scyła jězdźić, njebě jemu znate. Dokelž njeměješe předpisane zawěsćenje za roler, dyrbješe dale nóžkować.
Smědźa so za šćěpjenjom prašeć
Sydney (dpa/SN). Dźěłodawarjo w Awstralskej smědźa so wotnětka přistajenych prašeć, hač su pře koronu šćěpjeni. Ministerski prezident Scott Morrison je dźensa wotpowědne směrnicy za předewzaća předstajił najebać debatu, hač škit datow to scyła dowola. Zaměr naprawy je tomu zadźěwać, zo nješćěpjeni koronawirus na swojim dźěłowym městnje rozšěrjeja. Dźěłodawar ma prawo, jich z nadawkow wuwjazać.
Chcedźa zaso stawkować
Frankfurt n. M. (dpa/SN). Pola Němskeje železnicy je nowy stawk lokomotiwnikow wotwidźomny. Při wothłosowanju dźěłarnistwa GDL wupraja so wjace hač 95 procentow čłonow za stawk, kaž předsyda dźěłarnistwa Frank Weselsky dźensa w Frankfurće nad Mohanom zdźěli. Dokładne plany stawka pak hišće nimaja. Dźěłarnistwo žada sej 3,2 procentaj wjace mzdy. Železnica skedźbnja na wulke straty w koronakrizy a nima žadanje dźěłarnistwa za přiměrjene.
Karnewal jeno za šćěpjenych
