Čěska: Swobodnej dnjej přistajenym stata?
Praha (dpa/SN). W susodnej Čěskej planuja pře koronu šćěpjenych wosebje mytować. Wšitkim přistajenym stata, kotřiž su injekciju dóstali, chcedźa přidatnej zapłaćenej dnjej dowola dać. To je ministerski prezident Andrej Babiš na Twitteru připowědźił. „Je dźě wěrno, zo su někotři šćěpjeni sylnišu reakciju po injekciji měli“, přizna załožer populistiskeje strony ANO.
Knježerstwo w Praze chce hišće wjace ludźi motiwować, zo bychu so šćěpić dali, 66lětny multimiliardar Babiš doda. W Čěskej ze swojimi přibližnje 10,7 milionami wobydlerjow płaći dotal 4,6 milionow ludźi jako dospołnje šćěpjenych. Kabinet ma hižo jutře, pjatk, wo naležnosći rozsudźić.
Pozadk akcije móhli wólby čěskeho parlamenta w septembrje być.
Loni w Němskej mjenje błyskow było
Berlin/Drježdźany (dpa/SN). W Sakskej je so loni mjenje błyskało hač w lěće 2019. Kaž z měrjenjow Błyskoweje informaciskeje słužby předewzaća Siemens wuchadźa, je w swobodnym staće 12 643 błyskow něhdźe zadyriło. Ličba wotpowěduje 0,7 błyskam na kwadratny kilometer. Lěto do toho zličichu 20 900 błyskow. W přirunanju zwjazkowych krajow ležeše Sakska tehdy z 1,14 błyskami na kwadratny kilometer na štwórtym městnje, loni na dźesatym. Načolnik w swobodnym staće je Mišnjanski wokrjes z 1 655 błyskami a z hustotu 1,1. Najwjetšu hustotu zwěsćichu w delnjosakskim Wolfsburgu (5,8).
Podobna je tendenca registrowanych błyskow w Braniborskej. W lěće 2019 běše jich 1,25 na kwadratny kilometer, loni z 1,2 tróšku mjenje.
Kraje winowatostne testy podpěruja
Berlin (dpa/SN). Zwjazkowe knježerstwo dóstawa so při planowanej winowatosći testowanja za nawrótnikow z dowola, kotřiž dospołne šćěpjenje abo wustrowjenje dopokazać njemóža, pod časowy ćišć. Wón jara na to tłóči, zo to nětko rjaduja, rjekny bayerski ministerski prezident Markus Söder (CSU) wčera we wusyłanju ZDF „Markus Lanz“. Jeho braniborski kolega Dietmar Woidke (SPD) rjekny w sćelaku Phoenix, zo dyrbja chětře rozsudźić a nic hakle srjedź abo kónc awgusta.
Knježerstwowi šefojo wjacorych krajow winowatosć testowanja podpěruja. Berlinskeho knježaceho měšćanostu Michaela Müllera (SPD) cituja ze słowami, zo su testy centralny dypk, zo bychu natyknjenja mjez nješćěpjenym wobydlerstwom wobmjezowali. Ministerska prezidentka Porynsko-Pfalcy Malu Dreyer (SPD) wočakuje wot zwjazkoweho knježerstwa koncept, „kak hodźałoj so kontrola a dodźerženje winowatosće testowanja zaručić“.
Kónc přestawki wodychnjenja
Dźensa je lětuši dźeń přećeženja zemje, kiž měł k rozmyslowanju pohnuć
Berlin (dpa/SN). Přetrjeba resursow po cyłym swěće bliži so po trochowanjach wědomostnikow zaso stawej, kaž bě wón do koronapandemije. To wuchadźa z wobličenjow non-profitoweje organizacije Global Footprint Network ze sydłomaj w USA a w Šwicarskej. Lětuši tak mjenowany dźeń přećeženja zemje je dźensa, štwórtk. „Wot 29. julija zemju potajkim přewužiwamy, bjerjemy jej resursy, kotrež wona lětsa wjace wobnowić njemóže“, zwurazni rěčnik organizacije Germanwatch Steffen Vogel napřećo powěsćerni dpa.
Dźeń přećeženja zemje bě loni po wobličenjach 22. awgust, wjace hač tři tydźenje pozdźišo hač w lěće 2019. Tehdy bě wón hižo 26. julija docpěty. „To bě zawěrno jedyn wuskutk korony“, měni Rolf Buschmann ze Zwjazka za wobswět a přirodu Němskeje (BUND). W prěnich žołmach pandemije bu jasnje mjenje resursow přetrjebane. „A to ma wjele z tym činić, zo smy w lockdownje byli.“
Wusłužena pozicija
To a tamne (29.07.21)
Dźewjeć awtodróhowych wotpočnišćow w New Jerseyju chcedźa po swětoznatych wuměłcach pomjenować. Wone maja potom mjez druhim James Gandolfini, Whitney Houston, Jon Bon Jovi abo Frank Sinatra rěkać. Z mjeńšimi wustajeńcami chcedźa tam na žiwjenje a tworjenje „starow“ skedźbnjeć. Z akciju hódnoća wusahowacy talent z New Jerseyja pochadźacych wuměłcow, kaž guwerner Phil Murphy zdźěli. Spěwar Bruce Springsteen tajke počesćenje wotpokazuje.
Dokelž je wažnu zdźělenku w ćahu přesłyšał, je 49lětny muž po puću z Hamburga do schleswigsko-holsteinskeho Neumünstera wulězć skomdźił. Hakle jako ćah na wotstajenskich kolijach stejo wosta, jemu to napadny. Dokelž njeje sej sam won zwěrił, zawoła policiju, kotraž jeho skónčnje „wěsće z ćaha přewodźeše“.
Unija hłosy zhubja
Berlin (dpa/SN). Hladajo na nowe naprašowanje instituta Forsa k wólbam zwjazkoweho sejma wuchadźa, zo by uniju jenož hišće 26 procentow ludźi woliło. Tež SPD je jedyn procentny dypk zhubiła a leži pola 15 proc. Jenož dwaj dypkaj za njej steji FDP. Zeleni bychu sylne 21 proc. hłosow žnjeli. AfD přińdźe na dźesać a Lěwica na sydom proc. Tři koalicije bychu móžne byli: unija/Zeleni, unija/SPD/FDP kaž tež Zeleni/SPD/FDP.
Namołwa w zwisku z róčnicu
Genf (dpa/SN). Wysoki komisar UNO za ćěkancow Filippo Grandi wjacore kraje namołwja, principije Genfskeje konwencije za ćěkancow zakitować. Wón so starosći, dokelž europske a tamne kraje dale a časćišo spytaja zamołwitosć njepřewzać. To praji Grandi hladajo na dźensnišu 70. róčnicu podpisanja mjenowaneje konwencije. Dokument je zakładny stołp azyloweje politiki po cyłym swěće. Podpisarjo měli škit ludźom zmóžnić, kotrymž w domiznje přesćěhanje hrozy. Jich njeměli tuž tam wróćo pósłać.
Zjawne etaty z wulkim dołhom
Po hrózbnym njezbožu w Leverkusenskej chemijowej fabrice wohnjowa ...
Chłostanski wukaz teoloze
Waršawa/Köln (dpa/SN). W Pólskej je rozsud němskeho sudnistwa kedźbnosć zbudźił. Kaž medije susodneho kraja rozprawjeja, dósta profesor katolskeje teologije Dariusz Oko z Krakowa němski chłostanski wukaz našćuwanja ludu dla. Přičina je přinošk w Kölnskim časopisu „Theologisches“, w kotrymž je pólski duchowny homoseksualnych w cyrkwi jako „parazitow“, „rakowinu“, „homo-mafiju“ a „homoseksualnu kwaklu“ wothódnoćejo woznamjenił. Rěčnica Kölnskeho hamtskeho sudnistwa powěsćerni dpa wčera wobkrući, zo chłostanski wukaz wobsteji. Přećiwo njemu pak je prawiznik wobwinowaneho mjeztym znapřećiwjenje zapodał. Chłostanje předwidźi pjenježnu pokutu 4 500 eurow.
Testy po dowolu winowatostne?
Berlin/Mnichow (dpa/SN). Dowolnicy maja so hižo wot noweho měsaca na rozšěrjenu winowatosć nastajić, so při nawróće do Němskeje testować dać. Zwjazk je přilubił so hač do 1. awgusta wo to prócować, jednotnu winowatosć testowanja zawjesć „nic jeno za lěty, ale na přikład za wšěch, kotřiž po normalnym puću z awtom abo železnicu přichadźeja“, rjekny bayerski ministerski prezident Markus Söder (CSU) wčera wječor we wusyłanju ARD „Tagesthemen“. Popołdnju bě zhonił, zo tworja prawniski zakład, kiž ma so wot 1. awgusta zeskutkownić.
Po słowach Södera je rjadowanje dosć jednore. Kóždy, kiž z awtom, ćahom abo lětadłom zaso zapućuje, trjeba test. Dotal płaći winowatosć testowanja jeničce za ludźi, kotřiž z lětadłom do kraja přińdu.
Söder pak njeje so wo tym wuprajił, kak přichodnje ze šćěpjenymi a wustrowjenymi wobchadźeć. Zwjazkowy minister nutřkowneho Horst Seehofer (CSU) bě nowinje Bild (dźensniše wudaće) prajił: „Štóž je dopokazujomnje šćěpjeny abo wustrowjeny, wězo žadyn test njetrjeba.“
