Winowatosć šćěpjenja wukazać?
Berlin (dpa/SN). Prezident Zwjazkoweje lěkarskeje komory Klaus Reinhardt žada sej intensiwnišu kampanju šćěpjenja. „Hdźe wostanje telewizijny wabjenski spot do wječornych powěsćow. Mamy pak ludźi tež na městnje informować, wosebje tam, hdźež je zwólniwosć so šćěpić dać skerje snadna. Dyrbimy ludźi narěčeć.“ Kóždy dorosćeny dyrbjał k tomu přinošować, zo wostawa ličba natyknjenjow z koronawirusom dale snadne, a da so šćěpić, Reinhardt potwjerdźa.
Mjeztym dale wo tym debatuja, hač njeměli winowatostne šćěpjenje za personal w šulach a pěstowarnjach wukazać. Prezident zwjazka wučerjow Hans-Peter Meidinger to kritisce wobhladuje. Wón na to skedźbnja, zo su wučerjo zwjetša zwólniwi so šćěpić dać a zo je w někotrych zwjazkowych krajow nimale 90 procentow personala šćěpjenych.
Strowotniski fachowc SPD Karl Lauterbach je přećiwo winowatostnemu šćěpjenju: „Šćěpjenje přećiwo koronawirusej dyrbi dale dobrowólny rozsud kóždeho jednotliwca wostać. To smy slubili.“
„Wuznawamy so k stawiznam“
Zhorjelska synagoga po wobšěrnym ponowjenju swjatočnje wotewrjena
Zhorjelc (AK/SN). Po wobšěrnym ponowjenju je Zhorjelska synagoga – natwarjena mjez 1909 a 1911 w młodźinskim stilu – zaso wužiwajomna. Přichodnje ma wona jako kulturny forum a dom modlenja městno zetkawanja, stawiznow, wučby a zhromadnosće być. „Naše europske město Zhorjelc je symbol zhromadźenstwa, wotewrjenosće swětej napřećo a tolerancy. Mjez nami nimaja antisemitizm, populizm, ekstremizm a rasizm žane městno“, podšmórny Zhorjelski wyši měšćanosta Octavian Ursu (CDU) wčera na swjatočnym poswjećenju. „Njekłonimy so jeno před židowskimi woporami nacionalsocialistiskeje diktatury, ale wuznawamy so tež k zachowanju synagogi a k stawiznam města. Na swjatočnosć přichwatali běchu nimo wyšeho měšćanosty społnomócnjena zwjazkoweho knježerstwa za kulturu a medije Monika Grütters, sakski ministerski prezident Michael Kretschmer (wobaj CDU), zastupnicy měšćanskeje a krajneje politiki kaž tež židowskeho žiwjenja.
To a tamne (13.07.21)
Urin psow je w Japanskej prawdźepodobnje sćežor ample powalił. Přepytowanje deleka wotłamaneho železneho sćežora přez fachowcow policije je wunjesło, zo bě wokoło stołpa 40 króć wjace urina hač pola druhich tajkich sćežorow w měsće Suzuka. Přepytowarjo su přeswědčeni, zo je so sćežor na křižowanišću z woporom korozije stał. Pódla njeho je šćežka, po kotrejž so ludźo ze swojimi štyrinohatymi lubuškami wuchodźuja.
Wosrjedź awtodróhi z připowěšaka skočiła je kruwa w hornjej Bayerskej. Ratar bě howjado po A 8 do směra na Mnichow transportował, jako wone z nakładowanskeje rampy skoči. Na to běžeše awtam napřećo po jězdni. Ratar to hakle pytny, jako jeho šoferojo trubjo na to skedźbnichu. Z wulkej prócu so burej a přiwołanej policiji skónčnje poradźi, kruwu popadnyć a ju wróćo na připowěšak dóstać.
Přihotuja klimowu konferencu
Vatikan (B/SN). W přihotach na klimowy wjeršk w šotiskim Glasgowje w nowembrje (COP26) zdźěłuje 40 nabožnych nawodow-specialistow a dźesać wědomostnikow stejišćo za swětowu politiku. Za to ma so 4. oktobra we Vatikanje konferenca pod hesłom „Faith and Science: Towards COP26“ wotměć. Je chětro wěste, zo so bamž na njej wobdźěli, rjekny arcybiskop Paul Gallagher. Nuznosć, rozrisać socialne a wobswětopolitiske prašenja, kotrež je bamž w swojej encyklice „Laudato si“ naćisnył, dźeń a bóle přiběra.
Nowa domizna za wěriwych
Mjeńšina k wólbam nastupi
Berlin (dpa/SN). Něhdźe 70 lět po prěnim zaćahu do zwjazkoweho sejma ma Južnoschleswigski wolerski zwjazk SSW znowa šansu, zapósłanca do parlamenta pósłać. Zwjazkowy wólbny wuběrk je stronu danskeje mjeńšiny w Schleswigsko-Holsteinskej oficialnje k wólbam zwjazkoweho sejma dopušćił. Načolny kandidat SSW je 41lětny Stefan Seidler. Strona je wot pjećprocentowskeje hranicy wuwzata. Jej dosaha něhdźe 50 000 płaćiwych hłosow za jedyn mandat.
Rockerojo zakazani
Berlin (dpa/SN). Zwjazkowy nutřkowny minister Horst Seehofer (CSU) je rockerowu skupinu Bandidos MC Federation West Central zakazał a rozpušćił. Po posudku nutřkowneho ministerstwa njeńdźe rockerowej skupinje w prěnim rjedźe, kaž to we wustawkach twjerdźa, wo zhromadne jězby z motorskim, ale chce móc a wliw w rockerowej scenje rozpřestrěć a to tež namócnje napřećo druhim skupinam přesadźić.
Wólbna kampanja Zelenych
Thomasa Jurka z politiki rozžohnowali
Kromola (CK/SN). Z małym přijećom na Kromolanskim starym hrodźe je sakski ministerski prezident Michael Kretschmer (CDU) sobotu bywšeho sakskeho hospodarskeho ministra a wjelelětneho zapósłanca krajneho a zwjazkoweho sejma Thomasa Jurka (SPD) z aktiwneje politiki rozžohnował. Kretschmer, sam hač do lěta 2017 w zwjaz- kowym sejmje, bě zhromadnje ze swojim kolegu Jurkom wo to wojował, zo dóstanje Kromolanski park srědki z fondsa k zachowanju měšćanskich pomnikoškitnych objektow. Jurk dźakowaše so Kretschmerej za „tójšto wosobinskich wokomikow najebać wšelake politiske nastajenje“. Hdyž bě wo hornjołužisku domiznu šło, je Jurk stajnje za rozrisanjom pytał, wuzběhny.
Prezident Ukrainy w Němskej
Namołwja dale ke kedźbliwosći
To a tamne (12.07.21)
Policajske awto jako taksi wužiwać chcyše chětro natutkany w badensko-württembergskim Heidenheimje. Muž bě zastojnikow w nocy na njedźelu do nutřkowneho města wołać dał. Ći drje přijědźechu, přeće 44lětneho pak wotpokazachu, na čož wón njemdrje reagowaše. Policisća jeho powučichu a muž jim slubi, zo pěši domoj póńdźe.
Ćeknjeneho warana dla dyrbješe klimowy dom w Bremerhavenje kónc tydźenja za wopytowarjow zawrjeny wostać. Dźesatki sobudźěłaćerjow su intensiwnje za něhdźe 80 centimetrow dołhim nimale wurosćenym nilowym waranom pytali. Warany su zwučene so derje schować. Twarjenje ja jara wulke. Jeničce wustajeńca wopřijima 11 500 kwadratnych metrow. Prawdźepodobnje bě zwěrjo pjatk rano twochnyło, jako njebě wobhrodźenje techniskeho zmylka dla zawrjene.
Siegfried Albert njeboh
Budyšin (SN). Serbski superintendent na wuměnku Siegfried Albert je 7. julija po dlěšej ćežkej chorosći 84lětny w Budyšinje zemrěł, kaž serbska zjawnosć wčera zhoni.
Po maturiće na Serbskej rozšěrjenej wyšej šuli w Małym Wjelkowje studowaše 23. měrca 1937 w Zajdowje rodźeny Albert ewangelsku teologiju w Lipsku. Lěta 1962 bu jako farar w Hrodźišću zapokazany, wot 1981 bě farar Michałskeje wosady w Budyšinje. Jako naslědnik Gerharda Wirtha wukonješe wot 1984 hač do 2002 zastojnstwo Serbskeho superintendenta. Jako tajki bě wobdźěleny na zhromadnym dialogu zastupnikow Zwjazkoweho předsydstwa Domowiny a Serbskeje ewangelsko-lutherskeje superintendentury 1988 w NDR. Njeboćički je serbske wosadne popołdnja jako nowu formu nabožneho skutkowanja zawjedł a po tymle puću wuski zwisk k serbskim wosadnym w ewangelskich dwurěčnych wosadach wudźeržował.
Pohrjebna swjatočnosć budźe štwórtk, 15. julija, w 11 hodź. w Budyskej Tuchorskej cyrkwi. Přizamknje so chowanje na tamnišim pohrjebnišću.
