Wo knihach a kniharni (09.04.20)

štwórtk, 09. apryla 2020
artikl hódnoćić
(0 )

Muka a nuznikowa papjera w Němskej, bagety a wino w Francoskej, brónje w USA­ – w kóždym kraju hrabaja ludźo w času pandemije za za nich njeparu­jomnymi wěcami „wšědneje potrjeby“. Tež w literarnym wobłuku su nětko knihi popularne, kotrež so z katastrofowymi scenarijemi kaž mordarskim wirusom zaběraja. Tak dožiwja w Francoskej a Italskej jedyn klasikar tele dny swój revival: Alberta Camusowy roman „La Peste“ je w bestsellerowych lisćinach wulkeho online-wikowarja wot 71. na 3. městno postupił. W Němskej je kniha wo boju sewjero­algeriskeho města Oran přećiwo morej w 1940tych lětach tuchwilu w ćišćanej formje rozebrana, tak zo da nakładnistwo Rowohlt jeje mjeztym 90. nakład něm­skeho wudaća „Die Pest“ ćišćeć.

W USA je runje sciencefiction-roman „Severance“ chinsko-ameriskeje awtorki Ling Ma z lěta 2018 jara woblubowany. W tutej „postapokalyptiskej satirje“ pochadźa mrětwa, kotraž so po wšěm swěće rozpřestrěwa, – štó by to wěrił? – z Chiny. Awtorka portretuje wšědny eksistencny bój imigrantki před, za čas a po katastrofje, kotraž njezniči jenož wjetšinu swětoweho wobydlerstwa, ale tohorunja kapitalistiski system, kotryž maja US-Ameri­čenjo snadź bóle we sebi hač štó druhi na swě­će.

W Němskej je cyle druha, skoro analytiska kniha požadana. W njedawnym interviewje ze sćelakom Deutschlandfunk praji znaty spisowaćel Klaus-Peter Wolf, zo bu z jeho stawizny „Todesbrut“ (2010) nětko woprawdźitosć. Tutón wirusowy thriller Wolf napisa, po tym zo bě sam w lěće 2009 na swinjacu gripu schorjeł. A štož wón w knize wopisuje, je chětro blisko tomu­, štož tuchwilu dožiwjamy – łódź z chorymi njesmě do žanoho přistawa, cyłe město je zawrjene, panika a ekstremne zadźerženja póčnu so šěrić. Za swój scenarij je awtor hižo tehdy wo planach Swětoweje strowotniskeje organizacije a zwjazkoweho knježerstwa rešeršował. Tak wopokaza so roman z dźensnišeho wida ­nimale kaž wěšćenje. Wolf sam poruča w tuchwilnej situaciji tajke knihi čitać – wone su po jeho měnjenju „eksorcizm přećiwo našemu strachej, dokelž powědaja, kak so ludźo zadźerža. … Čitanje romana je zwučowanje: Kak bych so sam zadźeržał?“ Michał Nuk

wozjewjene w: Wo knihach a kniharni
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND