Židźino je wjes blisko Wojerec ze žiwej serbskej kulturu, hdźež wobydlerjo hišće mnohe stare tradicije kaž camprowanje, póstniske reje w narodnej drasće a kermušu haja. Měšany chór wsy serbski spěw swěru pěstuje a kóžde lěto sej druhe ćěleso na spěwanje pod měrowym dubom přeproša. Před 20 lětami załožichu pod nawodom Hanelory Gučoweje serbske drastowe towarstwo, kotrež skutkowanje něhdy jara aktiwneje Domowinskeje skupiny dale wjedźe. Nowe zjednoćenstwo zrodźili běchu po 400. róčnicy prěnjeho naspomnjenja susodnych Horow 1995. W swjedźenskim ćahu pokazowachu Židźinjenjo tehdy někotre serbske wobrazy, za čož žnějachu wjele připóznaća. Z toho nasta myslička, wutworić towarstwo za hajenje serbskich tradicijow a narodneje drasty. Zdobom zrodźichu ideju, pod hesłom „swačina na pólnej mjezy“ kóžde lěto spočatk junija swjedźeń z pokazku bywšich ratarskich dźěłow a wašnjow wuhotować, na nim tež serbsku kulturu ze spěwom, reju a hudźbu předstajić.