ST Kundraćicy
– ST Viktoria Worklecy 0:3
(20:25, 17:25, 22:25)
Za hosća hrajachu: Marko Brězan, Milan Budar, Jan Bětnar, Ludwig Eckert, Stefan Gedik, Jurij Lipič, Stefan Wjenka, trenarjej: Marcel Rjelka a Matijas Eckert
Zazběh do noweje sezony bě so za volleyballistow prěnjeho mustwa ST Viktorije Worklecy z chětro špatnej powěsću započał. Při obligatoriskim pjatkownym treningu bě so rutinowany přistajer Marcel Rjelka zranił. Zranjeneho naruna na poziciji přistajerja Jan Bětnar. Marcel Rjelka přewza tuž zhromadnje z Matom Eckertom, kotryž budźe w nowej hrajnej dobje poradźowar Worklečanskich volleyballistow, funkciju trenarja.
W prěnjej sadźbje dyrbjachu so akterojo do hry namakać. Wobaj cyłkaj so najprjedy raz hač k 16:16 chětro kopoleštej. Po tym pak nasta za hosći předskok z pjeć dypkami. W druhim přechodźe běžeše hra za Worklečanow přez dlěši čas kaž na štryčku. Wosebje dźěło při blokowanju běše jara solidne. Při jasnym předskoku 13:20 přińdźe nowačk Marko Brězan do hry. Ralbičan přetwori sadźbowy bul k 17:25. Krótki, za to pak wuspěšny zastup.