Po tym zo přesadźichu so wolejbulisća Serbskeho gymnazija Budyšin wuspěšnje we wokrjesnym finalu w Biskopicach a tež na regionalnym finalu w Rychbachu (Reichenbach), podachu so hólcy starobneje klasy II do Dippoldiswaldy na krajne finale. Tam nastupichu woni jako jedne ze šěsć najlěpšich šulskich wolejbulowych mustwow swojeje staroby ze Sakskeje. Wubědźowanje wotmě so w dwěmaj staflomaj. W stafli gymnaziastow z Budyšina běchu tež mustwa Gymnazija Bernhard von Cotta z Brand-Erbisdorfa a mustwo Lipšćanskeho Krajneho gymnazija za sport.
Serbski gymnazij Budyšin – Gymnazij Bernhard von Cotta Brand-Erbisdorf 2:1
Hižo w prěnjej hrě běše niwow na polomaj jara wysoki. W prěnjej sadźbje partije přećiwo cyłkej z Brand-Erbisdorfa přesadźichu so Budyscy wolejbulisća z 25:22. Přiwšěm běše hra jara wurunana. W druhim přechodźe podležachu přećiwnikej snadnje z 23:25. W třećej, a zdobom rozsudnej sadźbje, woni hišće jónu pokazachu, zo zamóža tež měr wobchować, štož so skónčnje wudani. Serbska šestka přesadźi so jasnje z 15:7.
Serbski gymnazij Budyšin – Krajny gymnazij za sport Lipsk 0:2