Wot spočatka apryla hač do spočatka meje mějachu wšitke juniorske mustwa Łužiskich lodohokejowych liškow přestawku. A dokelž tež prěnje mustwo Běłowodźanow wjace njehraje, dachu zamołwići 12. jutrownika w liščej jamje lód wottać.
Spočatk meje započachu wšitke młodźency z lěćnym treningom. Dwaj měsacaj dołho zwučuja woni nětko wonka abo w sportowej hali, prjedy hač póńdu spočatk julija zaso na hrajnišćo w swójskej lodowej arenje.
Planowane je, zo trenuja wotnětka starobne skupiny U 9 dwójce wob tydźeń, U 11 trójce a tamne (U 13/U 15/U 17/U 23) hižo štyri razy w běhu sydom dnjow, tak zo najwažniše fitnesowe zakłady polěpša.
Skupinje U 9 a U 11 matej stajnje hłowneho trenarja a třoch pomocnikow. Dwě mustwje U 13 matej wobě jednoho šefnazwučowarja. Team U 15 ma přez lěćo hnydom dweju trenarjow. Jedyn zamołwja fitnesowy wobłuk a wobłuk wokoło muskulatury, tamny atletiku. Třo dalši kolegojo pomhaja jako nazwučowarjo lodohokeja. Tež U 17 a U 23 matej wobě po jednym šeftrenarju.
Kooperacija z ELV Niskej w nowej lodohokejowej sezonje wjace njebudźe.
Wuchodoněmske mišterstwa U 15 2020/2021 – hłowne koło
