Na festiwalu „prěni delnjoserbski comingout-film“ pokazali

Choćebuz (SN/bn). Identita, honjenje za sensacijemi, migracija a integracija, žarowanje, filozofiski, fyzikaliski a pječa ně­hdy lěpši čas kaž tež tradicije – cyłkownje dźesać přinoškow prěnjeje „Dołheje nocy krótkich łužiskich filmow“ we wobłuku Choćebuskeho filmoweho festiwala (CFF) wotbłyšćowaše aktualne towaršnostne temy a wotpowědowaše raz wjace, raz mjenje słodej dohromady ně­hdźe 500 přihladowarjow. Najlěpšu rezonancu žněješe pask „Pytaś a namakaś“, na kotryž bě publikum po wšěm zdaću najbóle wćipny. „Standing ovations hižo do předstajenja – to na CFF hišće njemějachmy“, dźiwaše so moderator Sebastian Schiller. Luka Golinski a Mira Dubian, kotrajž mjenujetaj swoju konsekwentnje dwurěčnje podtitulowanu produkciju „prěni delnjoserbski comingout-film“, rysujetaj drje „fiktiwnu, přiwšěm złožowacu so na wosobinske dožiwjenja“ stawiznu dosć wobćežneho puća młodeje Serbowki, njewotpowědowaceje „klasiskemu rólowemu modelej“ w stereotypnej delnjołužiskej wsy.