Jako do pokalneje hry přećiwo Hanno­verej w sćoplenskim času nadobo fyzioterapeuća a hladarjo na trawnik chwa­tachu, ležeše stajny wrotar Elias Bethke ze sylnymi bolosćemi na hrajnišću. Nětko so wobkrući, zo bě so něšto chutneho stało. Wrotar bě zamołwitym zdźělił, zo je so muskulatura w zadnim dźělu lě­weho nadkolena torhnyła. Za čas wu­strowjenja a rehabilitacije pak budźe wón w Berlinje w firmje Reathleticum w dobrych rukach. To pak woznamjenja, zo 22lětny Bethke swojemu towarstwu wjacore měsacy k dispoziciji njesteji, štož budźe towarstwu jara falować. Wulkej prašakaj stejitej za angažementom noweho wrotarja a za tym, hač móže a smě so Bethke hišće lětsa na hrajnišćo wróćić. Hač do ­toho ma kongenialny teamowy kolega Alexander Sebald městno we wrotach FC Energije zabrać. Tola trenar Claus Dieter Wollitz ­hižo wo tym rozmysluje, dalšeho angažować. „Dyr­bimy nětko wuradźować, kak na sportowym polu ­ze situaciju wobchadźamy. Wšako mamy z našimaj druhimaj wrotarjomaj ­Alexom Sebaldom a Maxom Böhnke dobreju hólcow w kadrje.