W prěnjej blidotenisowej wokrjesnej lize hrajachu pjatk wječor DJK Konjecy – TTC Wojerecy III 10:5 a TTV Hózk/Kulow II – Viktoria Worklecy 3:12. W rjadach Konječanow doby Julian Hrjehor wšitke partije, za Worklečanow běchu Roman Straube, Stephan Mět a Markus Bulank wuspěšni.

We wolejbulowej wobwodnej lize wuchodna Sakska je prěnje wolejbulowe mustwo žonow Viktorije Worklecy sobotu w domjacej sportowni přećiwo tabulkowemu susodej ze Žitawy (23:25, 19:25, 21:25) a načolnikej z Ochranowa (20:25, 19:25. 23:25) stajnje 0:3 přěhrało.

W sakskej klasy stafla wuchod wróćichu so Worklečanscy wolejbulisća z dobyćom 3:2 (25:22, 22:25, 18:25, 31:29. 17:15) z Drježdźan-Coschütz. Trenar Šćěpan Wjeńka praji po hrě: „Tuta sezona so ze snadnymi sadźbowymi wuslědkami a rozsudnymi pjatymi sadźbami ćehnje. Myslu sej, zo to na tym zaleži, zo mamy tajke młode mustwo. Tam čuwy hišće wulku rólu hraja. Prěnju sadźbu nimale přeco wysoko dobudźemy a potom druhu a třeću sadźbu přěhrajemy. A naposledk tola dobudźemy.“

Wčera je so mustwo U18 Viktorije na sakskm mišterstwje w Lipsku wobdźěliło. Hólcy wokoło kapitana Jurja Bobki a trenarja Aleksandera Cyža wobsadźichu na kóncu šeste městno.