Na štwórtym domjacym hrajnym dnju w sakskej klasy wuchod witachu Worklečanscy wolejbulisća hosći ze Seifersdorfa. To je jeničke mustwo, přećiwo kotremuž dotal hišće dobyli njejsu. Jenički­ dypk předskoka zawěsći domjacym druhe městno w tabulce před cyłkom ze Seifersdorfa.

ST Viktoria Worklecy –

TSV Seifersdorf 3:1

(25:17; 25:23; 15:25; 26:24)

Spočatk prěnjeje sadźby wuhra so na wočakowanym wysokim niwowje. Dypki wotměnjejo wobě mustwje zběraštej. Při stawje 9:11 měješe Beno Bobka nadaće. Tutón wuži słabosć w přiwzaću hosći a hnydom sydom preciznych bulow na samsne městno hraješe. Předskok sej Worklečenjo hižo z rukow wzać njedachu a sadźbu jasnje 25:17 dobychu.

Tež w druhim přechodźe hosćo na Ralbičanskej tribunje wobhladanja hódny wolejbul dožiwichu. Sylne nadběhi, runje tak sylne wotwobaranja a wuwojowane bule na woběmaj bokomaj běchu prawy přikusk. Byrnjež wotstawk maksimalnje dwaj dypkaj wučinjał, njenasta zaćišć, zo móhli Worklečenjo sadźbu přěhrać a tak skónči wona ze zasłuženym 25:23.