Wojerecy – to bě sportowy kónc tydźenja z tójšto rjanymi hrami, ze swójbnej atmosferu a bičwolejbulom na wysokim niwowje za hrajerce a hrajerjow mustwa „Słónčna róža“. Minjeny kónc tydźenja bě so serbski kwartet na tradicionalnym bičwolejbulowym cupje we Wojerecach wobdźělił.

Hižo 23. raz su woblubowany turněr na hrajnišćomaj we Wojerecach organizowali. Mjeztym, zo bydlenske drustwo „žiwjenske rumy“ z.t. jako hłowny organizator funguje a městno k dispoziciji staja, starachu so nazhonite ruki Wojerowskeho towarstwa Nachbarschaftshilfeverein wo sportowe wuhotowanje. Cyłkownje 21 mustwow z Wojerowskeho regiona přeprošenju sćěhowaše, zo bychu w pěsku wo požadany titul wojowali. Tež serbski cyłk „Słónčna róža“ ze Sernjančanku Xeniju Koberec, Konječanku Klaru Kralec, Hórčanom Janom Zarjeńkom a Budyšanom Eliasom Kummerom bě so prěni raz za turněr přizjewił.