Muž po zwadźe w Žitawje zemrěł
Žitawa (SN). Muž je při zwadźe w Žitawskim azylowym přebywanišću zemrěł. 41lětny wudycha hišće na městnje swojich ćežkich zranjenjow dla, policija zdźěli. 24lětneho přećiwnika zwady su zastojnicy přechodnje zajeli. Dokładna přičina za rozestajenje je njejasna. Kriminalna policija wobstejnosće njeskutka přepytuje. Tež zastupjerjo statneho rěčnistwa a fachowcy za prawnisku medicinu su wčera wječor přebywanišćo za slědami přepytali.
„Z wulkim poraženjom zhonich wo hroznym njeskutku na Sakskej hasy w Žitawje, kotrehož dla je 41lětny muž z Pakistana zemrěł. W tutych ćežkich hodźinach myslu na přiwuznych wopora. Prošu wšitke wobydlerki a wobydlerjow wo sćerpnosć. Přepytowanja policije hišće traja, tak zo móhli fachowcy wobstejnosće njeskutka dospołnje wujasnić“, krajny rada Zhorjelskeho wokrjesa dr. Stephan Meyer (CDU) reagujo na pad rjekny. Zdobom wón k tomu namołwja, nikoho pawšalnje zasudźić, tež požadarjow azyla abo druhe skupiny wobydlerstwa nic. „Wobkrućam, zo budźemy z wuslědkom přepytowanjow transparentnje wobchadźeć.“
Zhladuja starosćiwje na USA
Mnichow (dpa/SN). Nimale połojca industrijnych předewzaćow w Němskej boji so negatiwnych wuskutkow na swój zawod, jelizo Donald Trump wólby w USA 5. nowembra dobudźe. To je cyłkownje 44 procentow zawodow. To wuchadźa z naprašowanja Ifo-instituta, kotrehož wuslědki su dźensa wozjewili. Pozitiwnych efektow nadźijeja so pjeć procentow předewzaćow. 51 procentow rozdźěle njewočakuja. Předewšěm liča předewzaća z wuskimi hospodarskimi zwiskami do USA z negatiwnymi sćěhami.
Dobre powěsće njewočakuja
Washington/Berlin (dpa/SN). Z kelko dawkami móže zwjazkowe knježerstwo klětu ličić a što to za etat woznamjenja? Prašenje měješe dźensa zwjazkowy financny minister Christian Lindner (FDP) rozrisać, jako na swojej tuchwilnej jězbje w USA wuslědki nazymskeho dawkoweho trochowanja předstaji. Dobre powěsće tole njebudu, wšako je konjunktura w Němskej dale słaba. Za lětsa wočakuje zwjazkowe knježerstwo, zo je so hospodarski wukon pomjeńšił. Aa tež za klětu wěšća fachowcy jenož słaby rozrost.
Dyr za Berlinsku Lěwicu
Pućowacy na lětanišćomaj Lipsk/Halle a Drježdźany dyrbja hač do ...
Skónčnje centrum za wopytowarjow
Marienberg (dpa/SN). Za wopytowarjow swětoweho herbstwa UNESCO Montanregion Rudne horiny/Krušnohoří nastanje wažne kontaktne městno w Marienbergu. Tam ma so prěni ze šěsć wopytowarskich centrow na sakskim a čěskim boku zrealizować. Z připóznaćom swětoweho namrěwstwa je so region do rjadu wuznamnych kulturnych krajinow swěta zarjadował, wuzběhny sakska ministerka za kulturu a turizm Barbara Klepsch (CDU) wčera na zarjadowanju. Tam bu zakładny kamjeń za projekt połoženy. „Pokład měł so pěstować“, wona wuzběhny.
Montanowy region liči mjeztym hižo pjeć lět k swětowemu herbstwu UNESCO. Zwoprawdźenje wopytowarskeho centruma pak je so dlijiło. Město Marienberg chcyše poprawom hižo spočatk lěta centrum wotewrić. Centrum chcedźa při markantnym torhošću města natwarić.
Wo deeskalaciju so prócować
Namóc přećiwo žonam dale přiběra
Berlin (dpa/SN). Namóc přećiwo žonam a holcam w Němskej po wuhódnoćenju policajskeje statistiki sylnje přiběra. Kaž wosebite přepytowanje wotbłyšćuje, bě loni cyłkownje 62 404 holcow a žonow z woporom njeskutka přećiwo seksualnemu samopostajowanju. K tomu słušatej na přikład wumocowanje a seksuelne nućenje. Lěto do toho zličichu policajske zarjady 58 900 woporow žonow a holcow. W lěće 2015 běchu to 32 460 wumocowanych. Policija pak z toho wuchadźa, zo njeje so wulka ličba potrjechenych přizjewiła.
Jasnje přiběrała je loni tež ličba woporow, kotrež wosobinsce swobodnje žiwe być njemóžachu. Při tutych deliktach, ke kotrymž słuša mjez druhim nućenska prostitucija, je policija loni wjace hač 148 000 žónskich woporow registrowała. Přirunujo tole z lětom do toho je policija po cyłym Zwjazku něhdźe 134 000 potrjechenych dokumentowała. W lěće 2013 běše tomu něhdźe 106 000 woporow.
Rozhłosowy přinošk powyšić?
Posedźenje ministerskich prezidentow krajow w Lipsku zahajili
Lipsk (dpa/SN). Ministerscy prezidenća krajow schadźuja so wot wčerawšeho hač do jutřišeho na swoju lětnu konferencu w Lipsku. Dźensa zahajichu zhromadne wuradźowanja. W srjedźišću třidnjowskeho zetkanja su rozmołwy wo reformach nastupajo zjawnoprawniski rozhłós, wo migraciji kaž tež wo napjatym financnym połoženju komunow. Nimo toho zetkaja so šefojo krajnych knježerstwow w Lipsku ze społnomócnjenymi za zbrašenych w krajach a zastupjerjemi zwjazkow za inkluziju.
Sakska je 1. oktobra předsydstwo konferency ministerskich prezidentow (MPK) přewzała. Ministerski prezident swobodneho stata Michael Kretschmer (CDU) so dale za doraznišu azylowu politiku zasadźa. Ličba 170 000 próstwow wo azyl, kotruž su w Němskej hač do kónca septembra docpěli, je prosće přewysoka. Sakska žada sej mjez druhim wotpokazanje ćěkancow při hranicach, lěpši škit wonkownych hranicow EU a zwoprawdźenje azylowych jednanjow w krajach zwonka EU.
