Trump Alcatraz zaso wotewrě
Washington (dpa/SN). Prezident USA Donald Trump chce we wukraju produkowanym filmam wysoke cła napołožić. Republikan zdźěla na swojej internetnej platformje Truth Social, zo je wikowanskemu ministerstwu kazał, „hnydom započeć, wšě filmy, kiž do kraja přińdu a su we wukraju produkowane, z cłom sto procentow zwjazać“. Trump w tym zwisku skorži, zo filmowa industrija USA hinje. Druhe kraje pječa filmowcow USA wotwabja, samsny čas pak „Hollywood zniča“. To je wothłosowana akcija druhich krajow a tuž wohroženje narodneje wěstoty USA, je sej prezident wěsty.
Dalši wukaz prezidenta USA potrjechi wuwołane jastwo Alcatraz na kupje před pobrjohom Kaliforniskeje. Sobu najhórše jastwo njedaloko San Franciska je wot lěta 1963 zawrjene a dźensa turistiska atrakcija. Trump je nětko zamołwitym přikazał, Alcatraz „wutwarić a powjetšić“, zo móhli w nim najhóršich a najsurowišich złóstnikow zaměstnić. Znowa wotewrjeny Alcatraz budźe „symbol prawa, porjada a sprawnosće“, Trump rjekny.
Koaliciske zrěčenje podpisane
Dźěłowy zakład noweho zwjazkoweho knježerstwa CDU/CSU a SPD steji
Berlin (dpa/SN). Dźesać tydźenjow po wólbach zwjazkoweho sejma su dźensa pjatu čorno-čerwjenu koaliciju w stawiznach zwjazkoweje republiki wutworili. Předsydźa CDU, CSU a SPD podpisachu w Berlinje swoje 144 stron wopřijace koaliciske zrěčenje z hesłom „Zamołwitosć za Němsku“. Bjezposrědnje do toho je SPD swój personal za nowe zwjazkowe knježerstwo předstajiła.
Hižo wčera bu znate, zo stanje so předsyda SPD Lars Klingbeil z wicekanclerom a financnym ministrom. Wón je po zwjazkowym kancleru Friedrichu Merzu (CDU) druhi najsylniši politikar noweho knježerstwa.
To a tamne (05.05.25)
Na awtodróze A 5 rejowała je kwasna hosćina njedaloko Freiburga. Do toho běchu wjacore awta kwasneje kolony wobchad zadźerželi. Potom někotři wulězechu a na dróze rejowachu. Šoferojo za kolonu njemějachu žane zrozumjenje a wołachu policiju. Zastojnicy kwasarjow z awtodróhi přewodźachu a kontrolowachu. Nětko dyrbja z chłostanjom ličić.
Sławny popowy spěwar Dieter Bohlen wosobinsce je paduchow prosył, wjesnu taflu sydlišća Tötensen w delnjosakskim wokrjesu Harburg zaso wróćić. „Moji přećeljo, sće tole byli?“ praša so Bohlen swojich fanow na Instagramje. Wón móhł sej derje předstajić, zo je něchtó taflu jako fanowu trofeju so wzał. 71lětny Bohlen w Tötensenje bydli. Spěwar, producent a sudnik pola „Němska pyta za superstarom“ přilubja sprawnemu paduchej zastupny lisćik za koncert.
Poradźowar přesadźeny
Washington (dpa/SN). Prezident USA Donald Trump je dotal najhłubšu personalnu změnu w swojim knježerstwje wukazał a narodneho wěstotneho poradźowarja Mikea Waltza wotwołał. Waltz ma přichodnje pola UNO w New Yorku jako wulkopósłanc USA skutkować. Wočiwidnje bě afera skupinskeho chata z tajnymi informacijemi USA, kotruž Waltzej wumjetuja, přičina přesadźenja.
Demonstracije měrne wostali
Berlin/Hamburg (dpa/SN. Na tradicionalnych demonstracijach lěwicarskeje a lěwicarsko-ekstremistiskeje sceny w Berlinje a Hamburgu je so wčera wjace hač 25 000 ludźi wobdźěliło. Powšitkownje je lětsa w dalokej měrje měrne wostało, zamołwići zdźěleja. Policija zdźěli, zo je so dwanaće policistow zraniło. Radikalni běchu w Berlinje praskotaki, kamjenje a bleše na zastojnikow mjetali.
AfD prawicarsko-ekstremistiska
Při tradicionalnej mejskej manifestaciji na Budyskich Žitnych wikach ...
Pólska njepřeje sej razniše kontrole mjezy
Berlin (dpa/SN). Pólske wulkopósłanstwo w Berlinje zhladuje skeptisce na připowědźene razniše pomjezne kontrole ze stron Němskeje, kotrež běštaj předsyda CDU Friedrich Merz a přichodny nutřkowny minister Alexander Dobrindt (CSU) připowědźiłoj. „Tuchwilne kontrole na němsko-pólskej mjezy su hižo wulki problem za wšědny pomjezny nadróžny wobchad a za fungowace nutřkowne wiki EU“, rjekny jednaćel wulkopósłanstwa Jan Tombinski nowinarjam. Wón poćahowaše so na hižo płaćiwe naprawy stareho amploweho knježerstwa, kotrež zawinuja hodźiny trajace haćenja na dróhach z Pólskeje do Němskeje. „Tohodla sej njepřejemy, zo so pomjezne kontrole hišće dale přiwótřa.“
Tombinski, kiž njeje hišće jako wulkopósłanc powołany, ale hižo jaki tajki dźěła, doda: „Wězo wotpowědujemy swojej zamołwitosći, wonkowne mjezy Europy k Ruskej a Běłoruskej škitać. Zdobom pak wočakujemy, zo swoboda pućowanja w Schengenskim rumje dale wobsteji.“
Pjenježne dary njezměnjene
Radebeul (dpa/SN). Při cyłosakskej akciji wosuškoweho pjenježka su loni něšto wjace pjenjez nazběrali hač lěto do toho. Po informacijach Sakskeje diakonije znosychu 25 151 eurow na dobro pomocneje organizacije „Chlěb za swět“. To bě z dobrymi 50 euram snadnje wjace hač 2023. Začuwamy přiběracu njewěstosć ludźi“, rjekny čłonka předsydstwa diakonije Kathleen Westphal powěsćerni dpa. „Ćim bóle so wjeselu, zo je so zaso telko ludźi na akciji wosuškoweho pjenježka wobdźěliło a znamjo solidarity sadźiło.“
Wot lěta 1994 nastajeja pjekarjo w swobodnym staće w dohodownym času pod hesłom „My mamy wosušk, druzy ani chlěba nimaja“ w swojich wobchodach tyzy za pjenježne dary. Kupcy móža do nich drobne pjenjezy ćisnyć, kotrež při nakupje wróćo dóstanu. Po tutym puću je so mjeztym wjace hač 800 000 eurow za projekty přećiwo hłodej, chudobje, njedosahacemu zežiwjenju a njesprawnym žiwjenskim wobstejnosćam nahromadźiło.
W 31. lěće akcije je so nimale 430 pjekarnjow wobdźěliło. Lěta 2020 nazběrachu rekordnych 38 000 eurow.
USA a Ukraina inwestuja zhromadnje
Washington/Kijew (dpa/SN). Přichodny zhromadny fonds USA a Ukrainy za nowonatwar ma do projektow k wudobywanju mineralijow, zemskeho wolija a płuna kaž tež z tym zwjazaneje infrastruktury inwestować. Tole je zastupowaca ministerska prezidentka Ukrainy Juli Swyrodenko po podpisanju hospodarskeho zrěčenja z Washingtonom zdźěliła. „Ukraina a zjednoćene staty zhromadnje inwesticiske projekty postaja, kotrež maja so financować“, wona internetnje piše. Prěnich dźesać lět njesmě fonds swoje dobytki wupłaćić, ale dyrbi je do nowych projektow inwestować.
Hladajo na wobmyslenja w Ukrainje, zo Kijew swoje zemske pokłady USA prosće přewostaja, rjekny Swyrodenko, zo je fonds runoprawny objekt USA a Ukrainy. Kijew swój podźěl z pjenjezami zapłaći, kotrež je z předawanjom licencow a surowiznow wuzbytkował. Amerika móže jako swój podźěl tež brónje přinošować, na přikład lětadła wotwobarace systemy.
