Serbske naležnosće w Radworskej gmejnje běchu hižo přeco łoskoćiwe. Tole płaći ćim bóle, dokelž njejsu Serbja jenož w poměrnje wulkej gmejnje ze swojimi 24 wjesnymi dźělemi mjeńšina, ale tež w gmejnskej radźe. Stajnje zaso zdawa so, zo su Serbja najebać wšě zakonske rjadowanja w mjeńšinowych naležnosćach prošerjo, kotřiž dyrbja něšto přesadźić, štož wobydlerjow w nakromnych kónčinach gmejny njestara.

Ćim rjeńšo je, zo su so gmejnscy radźićeljo wčera wječor jednohłósnje za pokročowanje dwurěčneho kubłanskeho koncepta „2plus“ w Radworskej šuli wuprajili. To je jasny signal politikarjam, kotřiž chcedźa serbsku wučbu za jednu z dweju rjadownjow 1. lětnika šmórnyć a serbšćinu jenož hišće jako cuzu rěč wuwučować. Podawk pak tež dopokazuje, zo dyrbimy při wšěch zakonskich rjadowanjach dale wo swoje prawa wojować. Zo mamy při tym němskich sobuwobydlerjow poboku, je pozbudźowace. Marko Wjeńka

Po njezbožu ćeknjeneho kolesowarja pyta policija w sewjerorynsko-westfalskim Bergheimje. Tam bě dotal njeznaty na kolesowarskej šćežce do napřećo jěduceje žony prasnył a padnył. Po tym muž zaso stany a so na swojim kolesu wotsali, bjez toho zo by so wo znjezboženu žonu starał. Tež přewodnica muža, kotraž njebě na zražce wobdźělena, so wo znjezboženu njestaraše. Policija pyta za swědkami.

Wulki traktor pokradnyli su njeznaći njedaloko delnjosakskeho Buchholza. Něhdźe 100 000 eurow drohe jězdźidło steješe na ratarskim statoku. Paduši traktor startowachu a natwarichu z drjewjanymi rjadami a paletami rampu. Po njej jědźechu z traktorom typa Deutz-Fahr na připowěšak abo nakładne awto, zo bychu jón wotwjezli. Kriminalna policija je wšelake slědy zawěsćiła.

Najwjetša narodna mjeńšina Europy tema interskupiny EU-parlamenta

W EU-parlamenće, kotryž su woby­dlerki a wobydlerjo EU njedawno wuzwolili, njesedźi ani jedyn zastupjer Romow, hačrunjež liči mjeńšina zhromadnje ze swojimi podskupinami wjace hač šěsć milionow čłonow a je tak najwjetša mjeńšina EU. Tole jako fakt hižo mnoho wupraji, měnješe Costel Bercuş po zašłym posedźenju interfrakcionelneje dźěłoweje skupiny tradicionalne mjeńšiny, nacionalne zhromadźenstwa a krajne rěče. Jeho běchu sej čłonki a čłonojo skupiny přeprosyli, zo by wo situaciji Romow w Europje rozprawjał. Costel Bercuş je poradźowar za europske naležnosće 1991 załoženeje rumunskeje strony Romow Partida Romiloe Pro-Europa (PRPE). Tuta je wóndano zastupnistwo w Straßburgu załožiła, zo by zajimy Romow na europskej runinje dale zesylniła.

Brüssel (dpa/SN). W Europskej uniji je prěnje štyri měsacy lěta widźomnje mjenje ludźi ilegalnje přez mjezu přišło hač samsny čas loni. Ličba je wo nimale 30 procentow na něhdźe 47 000 woteběrała, z datow EU wuchadźa. Najraznišo pokazuje so wuwiće na tak mjenowanej zapadnej balkanskej čarje, hdźež zličichu jenož hišće 3 100 migrantow, minus 58 procentow. Tola tež na druhich čarach ličby migrantow woteběraja.

Kónc sankcijow woswjećili

Damaskus (dpa/SN). W Syriskej su ludźo we wjacorych městach zběhnjenje sankcijow USA woswjećili. Po informacijach swědkow zarjadowachu wobydlerjo swjedźenje na naměstach a awtowe korsa mjez druhim w stolicy Damaskusu kaž tež w Homsu a druhdźe. Prezident USA Donald Trump bě sankcije w sawdiskej stolicy Riadźe zběhnył. W Syriskej maja tole za wažny signal móžneho hospodarskeho rozmacha a lěpšeho žiwjenja.

Znowa rakety na Israel