Iran njeplanuje wotprawjenja
Washington (dpa/SN). Hladajo na masowe protesty w kraju Iran žane wotprawjenja njeplanuje. Tole je wonkowny minister Abbas Araghtschi zdźělił. W kraju nimaja wotpohlad, někoho wobwěsnyć, rjekny wón ameriskemu sćelakej Fox News. Prezident USA Donald Trump bě Iranej z raznymi reakcijemi hrozył, jeli kraj planuje, zajatych demonstrantow wotprawić.
Tarifowe jednanja a stawki
Podstupim (dpa/SN). Tarifowe jednanja za přistajenych zjawneje słužby su dźensa w Podstupimje dale wjedli. Sta sobudźěłaćerjow su so z teje přičiny dźensa k warnowanskim stawkam zešli. Hižo minjene dny běchu ludźo po namołwje dźěłarnistwow za swoje žadanja na dróhu šli. Dźěłarnistwo ver.di a zwjazk zastojnikow žadatej sej za 920 000 přistajenych zjawneje słužby sydom procentow wjace mzdy, znajmjeńša pak 300 eurow měsačnje wjace. Zwjazkowe kraje tole jako dospołnje přehnate wotpokazuja.
Reformuja wobydlerski pjenjez
Wobydlerjo města Minneapolis w zwjazkowym staće USA Minnesota ...
Na našćuwanje ludu reagować
Drježdźany (dpa/SN). Sakska justicna ministerka Constanze Geiert kritizuje planowane konsekwency za ludźi, kotřiž su našćuwanja ludu dla zasudźeni. „Dyrbimy přestać, na tajke zasudźujomne njeskutki hnydom z chłostanskim prawom reagować“, rjekny politikarka CDU sćelakej MDR. „Město toho měli so na to koncentrować, zo w našej demokratiji na našćuwanje ludu towaršnostnje reagujemy a nic zakońsce.“
Naćisk zwjazkoweho justicneho ministerstwa předwidźi, zo so ludźom, kotřiž su našćuwanja ludu dla zasudźeni, pasiwne wólbne prawo wozmje. Tak móhli potrjecheni prawo, so do zjawnych zastojnstwow wolić dać, na pjeć lět zhubić. Naćisk pak njeje hišće schwaleny.
Zelenskyjza nuzowy staw
Žane dojednanje wo Grönlandskej
Washington (dpa/SN). Po njewuspěšnej krizowej rozmołwje mjez USA, Danskej a Grönlandskej su Němska a dalše europske kraje wojersku wuskušowansku akciju na arktiskej kupje zahajili. Zwjazkowa wobora je dźensa skupinu wojakow do stolicy Nuuk pósłała. Francoscy wojacy su tohorunja po puću do Grönlandskeje, kotruž chcedźa sej USA přiswojić.
Rozmołwu we Washingtonje wo arktiskej kupje běchu wčera wječor bjez wuslědka skónčili. Danski wonkowny minister Lars Løkke Rasmussen rjekny, zo je zetkanje z wonkownym ministrom USA Marcom Rubiom a wiceprezidentom J.D. Vanceom fundamentalnje rozdźělne měnjenja wujewiło. Prezident USA Donald Trump njebě pódla. Na jeho reakciju nětko wšitcy čakaja.
Trump bě wospjet rjekł, zo trjebaja USA Grönlandsku za swoje narodne wěstotne zajimy, pokazawši na wohrožowanja ze stron Ruskeje a Chiny. Grönlandska ma tójšto wažnych zemskich pokładow. Při tym njebě wón wuzamknył, zo tež wójsko USA zasadźi.
Žadaja sej reformy w Sakskej
Komuny a hospodarstwo swobodneho stata zhromadny zwjazk załožili
Drježdźany (dpa/SN). Komuny Sakskeje su zhromadnje z hospodarstwom aliancu za reformy w swobodnym staće załožili. „Zaměr je, wubědźowanjakmanosć sakskeho hospodarstwa jasnje zwyšić a zdobom jednanjakmanosć komunow dołhodobnje zaručić“. Tole su načolne komunalne zwjazki a Zjednoćenstwo sakskeho hospodarstwa w Drježdźanach zdźělili. W zhromadnym dokumenće zamołwići knježerstwo namołwjeja, wotpowědne reformy spěšnje zwoprawdźić.
W dokumenće mjenuja awtorojo kopicu naprawow, z kotrymiž chcedźa běrokratiju wottwarić, financy komunow polěpšić, fachowe mocy zdobyć a we wobłukach kubłanja, energije, infrastruktury a digitalizacije polěpšenja docpěć. Ministerskeho prezidenta Michaela Kretschmera (CDU) a jeho knježerstwo přeprošuja na dialog wo zrealizowanju naprawow a wo wotpowědnym časowym planje. Alianca ma so za „konstruktiwneho a spušćomneho partnera statneho knježerstwa a je zwólniwa, zamołwitosć přewzać a aktiwnje na zwoprawdźenju reformow sobu dźěłać“.
Swoboda druhdy boli
Wjace potrěbnych rentnarjow
Drježdźany (dpa/SN). Dale a wjace sakskich rentnarjow je na socialnu pomoc pokazanych. W septembru 2025 je w swobodnym staće něhdźe 20 700 ludźi w rentnarskej starobje tak mjenowane zakładne zawěsćenje přijimowało. Tole wuchadźa z ličbow Zwjazkoweho statistiskeho zarjada, kotrež bě sej BSW wužadało. Po tym je so ličba potrjechenych w běhu minjenych pjeć lět nimale podwojiła. W septembru 2020 bě 11 900 rentnarjow pomoc dóstało. Žony to ze 54 procentami bóle potrjechi hač mužow.
Štóž njemóže so jako rentnar sam zežiwić, ma prawo na zakładne zawěsćenje. Wysokosć pomocy indiwidualnje wuliča. Rentowe zawěsćenje poruča ludźom, kiž dóstawaja mjenje hač 1 062 eurow renty, pruwować dać, hač maja prawo na pomoc. 1,1 milion ludźi je w Sakskej kónc 2024 rentu dóstało. Hladajo na tutu ličbu běštej mjenje hač dwaj procentaj na socialnu pomoc pokazanej. Přerězna měsačna renta w Sakskej wučinja tuchwilu 1 594 eurow. Mužojo dóstawaja z 1 730 w přerězku wo něšto wjace hač žony, kiž maja 1 482 eurow. Cyłoněmska přerězna renta je 1 692 eurow.
Sydom zranjenych pola Zhorjelca
Policija trjeba wjac prawow
Berlin (dpa/SN). Justicna senatorka Berlina Felor Badenberg (CDU) žada sej wjace prawow za policiju, zo móhła skutkownišo přećiwo ekstremizmej postupować. W sćelaku rbb wona wčera rjekny, zo měli tajne słužby wjace inwestować hač dotal. Za wotkrywanje kriminelnych syćow trjeba policija w digitalnym swěće wjace prawow. „To je wažne, dokelž su prawicarsko-ekstremistiske, lěwicarsko-ekstremistiske a islamistiske skupiny swoje aktiwity w dalokej měrje do digitalneho ruma přepołožili.“
Při tym njeńdźe jenož wo składowanje IP-adresow, Badenberg potwjerdźi. Wěstotne zarjadnišća trjebaja techniku, zo móhli wobrazy na awtomatizowane wašnje wuhódnoćić a lěpje spóznawać.
Z wida justicneje senatorki zjawnosć bój lěwicarskich ekstremistow złahodnja, dokelž „wojuja tute skupiny za dobre zaměry. Druhdy za klimu, druhdy přećiwo prawicarjam a přećiwo rasizmej, druhdy přećiwo namocy stata“. Nastanje zaćišć, zo stat tajke njeskutki milišo posudźuje. „Njeje žanoho dobreho ekstremista“, senatorka rjekny. „W Berlinje so ekstremizm dale a bóle wuwiwa.“
