To a tamne (03.02.26)
Před sudnistwom zamołwić dyrbi so wot dźensnišeho najstarši syn norwegskeje krónprincesny Mette-Marit. Marius Borg Høiby je po přeswědčenju statneho rěčnistwa wjacore žony wumocował a splažnje znjewužiwał. Někotre z nich je wón znjewužiwał, jako spachu a je njeskutki filmował. Cyłkownje 38 dypkow skóržby wopřijeja tež domjacu namóc, wobškodźenja a drogowe a wobchadne delikty. Wobskorženeho su sobotu zajeli.
Šěsć dalšich tydźenjow zymy w USA je sławny bobak (Murmeltier) Phil ludźom wěsćił. W městačku Punxsutawney w zwjazkowym staće Pennsylvania su so jeho na swjedźenju Swěčka Marije – połojcy zymskeho počasa – z oraklom prašeli, hač so zyma bórze pominje abo nic. Prašenje bě, hač widźi Phil swój sćin. Bohužel bě wuslědk na njedobro wšěch, kotřiž so bórzomneho kónca zymy nadźijeja.
Digitalne alfabetizowanje
Vatikan (B/SN). Bamž Leo XIV. žada sej škitne naprawy přećiwo znjewužiwanju kumštneje inteligency (KI). „Wjetšinje čłowjeskeje kreatiwity hrozy strach, zo so přez KI naruna. Přez nju stanu so ludźo z pasiwnymi konsumentami njereflektowanych myslow, njelubych anonymnych a njeawtorizowanych produktow. Za jich spóznaće trjebamy ‚digitalne alfabetizowanje‘. Jenož tak móžemy wobšudnistwu kumštneje inteligency zadźěwać.“
Podpěra Ukrainje
Kijew (B/SN). Na njedźelnej Božej mši na Pětrowym naměsće je bamž Leo XIV. namołwił: „Apeluju na wšěch, prócowanja k zakónčenju wójny dale zesylnić.“ Ukrainski wonkowny minister Andrij Sybiha dźakuje so bamžej za pomoc, za dotalne 260 jězdźidłow z pomocnymi srědkami, za ultrazwukowe nastroje, generatory a wosom chorobnych awtow.
Bamž mudrje wobkedźbuje
Starosća so dla planowanych wulkowosadow
Hodźij. Na kantoraće w Hodźiju je Serbski wosadny zwjazk zawčerawšim swoju hłownu zhromadźiznu wotměł. Na nju bě 21 čłonow a hosći z tradicionelnych němsko-serbskich ewangelskich wosadow Hornjeje Łužicy přichwatało.
Superintendent Krystof Rummel rozprawješe wo wosadnym dźěle lěta 2025. Wjerški běchu Serbski ewangelski kónc tydźenja w Hainewaldźe, Serbski cyrkwinski dźeń w Husce a ekumeniski dworowy swjedźeń w Hrubjelčicach. Za lěto 2026 přihotuja mjez druhim zaso Serbski ewangelski kónc tydźenja wot 10. do 12. apryla w Hainewaldźe a Serbski cyrkwinski dźeń 13. a 14. junija we Wojerecach.
Wuradźuja srjedu a štwórtk
Kijew (dpa/SN). Ukrainski prezident Wolodymyr Zelenskyj je připowědźił, zo wotměja so přichodne rozmołwy wo skónčenju ruskeje wójny přećiwo Ukrainje srjedu a štwórtk w Abu Dhabiju. Za wčera planowane wuradźowanja běchu přestorčili. Planowane su direktne rozmołwy mjez ukrainskej a ruskej delegaciju. Zastupnicy USA mjez woběmaj posrědkuja. Ruska njeje nowe terminy wuradźowanjow hišće wobkrućiła.
Dobrindt za sylne tajne słužby
Berlin (dpa/SN). Zwjazkowy nutřkowny minister Alexander Dobrindt (CSU) chce we wobłuku tajnych słužbow dale wusko w USA hromadźe dźěłać. Tole rjekny wón Augsburgskim nowinarjam. Dotalna praksa dyrbjała so dale wjesć, njedźiwajo na tuchwilnu politisku situaciju, rjekny Dobrindt hladajo na kritiku přećiwo USA a jeje prezidentej Donaldej Trumpej.Dobrindt chcył tajne słužby w Němskej nimo toho dale wutwarić a jim nowe prawa a móžnosće přizwolić.
Zaso mały shutdown w USA
Wojacy japanskeho wójska pomhaja w prefekturje Aomoru na sewjeru ...
Iran: Njedowěru přewinyć
Lěkarjo dyrbja hić
Kritizuje Södera dla žadanja
Berlin (dpa/SN). Wodźaca politikarka SPD Annika Klose je wuprajenje předsydy CSU Markusa Södera nastupajo dlěše dźěłowe časy w Němskej kritizowała. Dźěławi w Němskej hižo tójšto zdokonjeja. Wjetšina z nich je zwólniwa, „tež raz hodźinu dlěje dźěłać“, rjekny socialnopolitiska rěčnica frakcije SPD w zwjazkowym sejmje sćelakej RTL. Zdobom na to skedźbni, zo je rjadowanje dźěłowych časow wěc tarifowych partnerow a nic zakonjedawarja. „Tohodla mam tute žadanje za njewoprawjene.“
Bayerski ministerski prezident je wčera w sćelaku ARD rjekł: „Hodźina dźěła wob tydźeń wjace by nam tójšto hospodarskeho rozmacha zaručiła. To njeje přewjele žadane.“ Söder žadaše sej nimo toho kónc tak mjenowaneje renty ze 63, potajkim połnu rentu za ludźi, kotřiž su wosebje wjele lět do rentoweho zawěsćenja płaćili.
Tež tutón namjet Klose kritizowaše. Renta ze 63 wšak wjace njeeksistuje. „Mjeztym wo to dźe, zo smědźa 65lětni z połnej rentu woteńć.“
Syriska: Kurdišćina připóznata
Přechodne knježerstwo a zastupjerjo Kurdow so na přiměr dojednali
Ar-Raqqa/Damaskus (SN/mb). Syriske demokratiske mocy (SDF), wobrónjene jednotki pod nawodom Kurdow za zakitowanje demokratiskich kónčin Sewjerowuchodneje Syriskeje, a islamistiske přechodne knježerstwo w Damaskusu su so na přiměr dojednali. To je pjatk Berlinske zastupnistwo demokratiskeho samozarjadnistwa wobkrućiło. Zašłe tydźenje běchu islamistiske milicy masakry přećiwo kurdiskej ludnosći skućeli, we woblěhowanym měsće Kobanê bě po informacijach ko-měšćanostki a ko-měšćanosty hač do 400 000 ćěkancow. Nic jenož tu hrožeše humanitarna katastrofa.
