Nowy rekord přeńdźenjow
Přewažnje měrliwje wopominali
Drježdźany (dpa/SN). Wjacore tysac ludźi su w sakskej stolicy přećiwo pochodej prawicarskich ekstremistow składnostnje wopominanja zničenja města w Druhej swětowej wójnje protestowali. Na wjacorych městnach běchu sej prawicarjo a přećiwni demonstranća tak bliscy, zo so widźachu a słyšachu. K direktnej konfrontaciji pak njeje dóšło. Na přećiwnu demonstraciju bě něhdźe 3 000 demonstrantow přichwatało, prawicarjow naličichu něhdźe 2 000. Policija žane oficialne ličby njewozjewi.
Najebać mjeńše rozkory z policiju bě napřećiwny protest přewažnje měrliwy, rjekny rěčnik policije Thomas Geithner. Wosebje na spočatku demonstracije běchu přećiwni demonstranća spytali, čaru prawicarskeho „pochoda wopomnjeća“ ze sydanskimi blokadami přetorhnyć. Při tym běchu demonstranća tež policiju nadběhowali. Zastojnicy dyrbjachu tuž popjerjowy spray wužiwać. Dohromady 2 200 policistow bě sobotu w Drježdźanach zasadźenych, mjez nimi běchu tež zastojnicy na konjach.
Rubio: USA su dźěćo Europy
Je so na konferency w Mnichowje woprawdźe přećelski zwuk přesadźił?
Mnichow. W Bayerskej wotmě so kónc tydźenja zaso wěstotna konferenca. Wot lěta 1963 schadźuje so tam lětnje mjezynarodna diplomatiska, politiska, intelektualna a žurnalistiska elita, zo by wo přichodźe swěta rěčała.
Loni je wotewrjenska narěč ameriskeho wiceprezidenta J. D. Vanca europskich partnerow zadźiwała a zamjerzała. W njej běše Vance Europje wotsalenje wot idealow swobody a wohrožowanje demokratije wumjetował. Jako přikład mjenowaše wot europskeho sudnistwa w lěće 2024 jako njepłaćiwe deklarowane prezidentske wólby w Rumunskej. Hladajo na tutu narěč běše atmosfera do spočatka lětušeje konferency napjata. Wobdźělnicy běchu wćipni, što wonkowny minister USA Marco Rubio w swojej narěči tematizuje.
Mnichowska hadrjeńca
To a tamne (16.02.26)
Zranjeny kormoran je so wóndano w Bremenskej klinice předstajił. W jeho pysku tčeše hoka wudy. Z pyskom bě ptak wjacekróć wo wokno nuzoweje stacije chorownje na lěwym brjohu rěki Weser dypał a sobudźěłaćerjow na sebje skedźbnił. Na to wohnjowu woboru zawołachu, kotraž zhromadnje z mediciniskim personalom hoku z pyska wotstroni. Po tym ptaka do parka klinikuma pušćichu.
Wjelka dla dyrbješe póstniski přećah w sewjerorynsko-westfalskim Leverkusenje sobotu skrótka pozastać. Popołdnju běchu wobydlerjo policiji zdźělili, zo běchu wjelka w měsće wuhladali, zdźěli rěčnik policije w Kölnje. Tež zamołwiteho za přećah wo tym informowachu, kotryž ćah z teje přičiny přetorhny. Zastojnicy na městnje za wjelkom pytachu a jeho tež nańdźechu, dokelž bě jara spłóšiwy.
Team němskich sankowarjow wuspěšny był
Šesty wubědźowanski dźeń Zymskich olympiskich hrow w Italskej skónči so z dalšim wjerškom za Němsku: Mustwowa stafla sankowarjow doby złoto. Runočasnje postarachu so sportowcy w sněhakowanju, lodohokeju a snowboardcrossu wo spektakularne wuslědki.
Wjeršk bě mustwowa stafla sankowarjow, při čimž dobychu Julia Taubitz, Max Langenhan, Tobias Wendl a Tobias Arlt kaž tež Dajana Eitberger a Magdalena Matschina suwerenje złotu medalju. Němska triumfowaše před Awstriskej a Italskej a wobkrući z tym swoju wurjadnu dominancu w tutej disciplinje. Mustwowa stafla je hakle wot olympiskich hrow 2014 w Sočiju dźěl olympiskeho programa. Němska je wšitke dotalne olympiske wubědźowanja w tutej disciplinje dobyła, nětko hižo štwórty raz pospochi. Zdobom bě to cyłkownje sedma złota medalja za dwójku Wendl/Arlt. Z tym staj wonaj rekordnaj olympiskaj dobyćerjej Němskeje na Zymskich olympiskich hrach.
Čakaja na wuslědk jednanjow
Podstupim (dpa/SN). Tarifowe jednanja za přistajenych zjawneje słužby so nachileja. Dźensa wječor drje so rozsudźi, kak wuspěšne dotal wobćežne wuradźowanja běchu. Dźěłarnistwo ver.di a Zwjazk zastojnikow wot srjedy w Podstupimje ze zastupnikami zwjazkowych krajow wuradźujetej. Dźěłarnistwo žada sej sydom procentow wjace mzdy za 900 000 přistajenych. Dźěłodawarjo skića pječa pjeć procentow.
Wobstaraja sej bojowe truty
Brüssel (dpa/SN). Němska chce sej zhromadnje z druhimi europskimi partnerami NATO wulke mnóstwa tunich bojowych trutow wobstarać. Wotpowědnu iniciatiwu su na zetkanju čłonskich krajow NATO w Brüsselu podpisali. Truty maja 500 kilometrow daloko lećeć móc a wotwobaranske systemy njepřećela přežadać. Francoska, Wulka Britaniska, Pólska a Šwedska truty zhromadnje wobstaraja. Zaměr je, skrućić kmanosć NATO, so sama zakitować.
Posudk wo klimje cofnyli
Swojorazne a skurilne kostimy su wčera, na tak mjenowanym „tučnym ...
Mnichowska konferenca zahajena
Mnichow (dpa/SN). Ze zasadnej narěču wo wonkopolitiskich prašenjach je zwjazkowy kancler Friedrich Merz (CDU) dźensa Mnichowsku wěstotnu konferencu zahajił. Při tym so wón za to wupraji, Europu jako samostatnu politisku móc sylnić a tež hladajo na zakitowanje skrućić. Nowa politika prezidenta USA Donalda Trumpa na mjezynarodnej runinje je Merzej nastork, naležnosće Europy w swójskej zamołwitosći rjadować. Wuraznje so kancler za to zasadźowaše, styki Europy z USA dale pěstować.
Lětuša wěstotna konferenca je po informacijach zarjadowarjow konferenca superlatiwow. Na nju wočakuja wjac hač 60 statnych a knježerstwowych šefow, to je wjace hač hdy do toho. Nimo toho wobdźěli so wjac hač sto wonkownych a zakitowanskich ministrow. W srjedźišću wuradźowanjow steja łamki swětoweho porjada, wójna w Ukrainje a hrožaca wójna mjez USA a Iranom. Na kromje konferency wočakuja wjacore demonstracije, mjez druhim přećiwo awtoritarnemu iranskemu knježerstwu w Teheranje.
Zwada Nobeloweho myta dla
Njesłyšany diplomatiski skandal mjez Waršawu a Washingtonom
Waršawa. Polacy nochcedźa swojimaj wušomaj a wočomaj wěrić: Tradicionalnje dobre a wutrobne poćahi k USA su po skurilnej diplomatiskej zwadźe, kotraž nima w najnowšich stawiznach swojeho runjeća, ćežko wobškodźene.
Minjeny štwórtk bě wulkopósłanc USA w Pólskej Tom Rose wozjewił, zo USA wšitke styki z prezidentom pólskeho sejma Włodzimierzom Czarzastym přetorhnu. Přesyda sejma bě rjekł, zo spožčenje měroweho Nobeloweho myta prezidentej USA Donaldej Trumpej wotpokazuje. Do toho bě kongres USA zhromadnje z nawodnistwom israelskeho parlamenta Knesset wšitkim krajam list z namołwu pósłał, so za Trumpa jako noweho lawreata myta wuprajić. Po diplomatiskim eklaće so dale a wjace pólskich politikarjow z prezidentom sejma we Waršawje solidarizuje.
