To a tamne (11.06.25)
Zhromadnje hudźić, spěwać a hudźbu aktiwnje dožiwić, je přewšo wunošne za derjeměće čłowjeka. Wědomostny pospyt při lětušich Drježdźanskich hudźbnych swjedźenskich dnjach je tute dopóznaće doraznje wobkrućił. Wobdźěleni probandźa mějachu wo wjele wyšu koncentraciju oxytocina, znaty jako hormon zbožownosće. Naměrjene mnóstwo hormona bě wyše hač při hubkowanju abo při splažnych aktiwitach.
Nawal zymy je w Južnej Africe nadróžny chaos zawinił. Sněh, wichor a zliwki blokowachu dróhi a zawinowachu zapławjenja a zesuwanje zemje. Wosebje potrjechene běchu wuchodne prowincy. W někotrych kónčinach mějachu telko sněha, zo njemóžachu ludźo wažne wobchadne zwiski wjace wužiwać. Zamołwići wukazachu za někotre gmejny druhi najwyši warnowanski schodźenk sněha dla.
Wojacy přećiwo demonstrantam
Prezident USA sćele dalšich narodnych gardistow do Los Angelesa
Los Angeles/Washington (dpa/SN). Zakitowanske ministerstwo USA mobilizuje na přikaz prezidenta USA Donalda Trumpa dalšich 2 000 wojakow narodneje gardy, zo bychu protesty přećiwo migraciskej politice USA w Los Angelesu podusyli. Tole je rěčnik Pentagona Sean Parnell připowědźił. Přisłušnikow narodneje gardy zwołaja do słužby, zo bychu migracisku politiku USA podpěrowali a sobudźěłaćerjam wotpowědneho zarjada zmóžnili, swoje nadawki „swěru“ spjelnjeć.
Minjeny čas běchu sobudźěłaćerjo ministerstwa za zapućowanje ICE tysacy ludźi zajeli, kotřiž bjez płaćiwych dokumentow w USA bydla, mjez nimi tež dźěći. Z městnami běchu potrjechenych na jich dźěłowym městnje zajeli a wotwjedli.
Kaliforniski guwerner Gavin Newsom, kotryž je poprawom za zwołanje narodneje gardy přisłušny, postupowanje Trumpa šwika: „Tule njeńdźe wo zjawnu wěstotu, ale wo to, ego strašneho prezidenta pěstować.“
Židźa dale a wohroženiši
Drježdźany (B/SN). Krajny zwjazk za přizjewjenje antisemitiskich njeskutkow (Rias) je 2024 w swojej lětnej bilancy 349 padow podał. To je stopnjowanje wo 82 procentow k předchadnemu lětu. „Naš zhromadny nadawk je židowske žiwjenje škitać a antisemitizmej so spřećiwjeć,“ praji zamołwity knježerstwa Thomas Feist. Dwě třećinje nadpadow a wěcnych škodow měrještej so přećiwo israelskemu statej a jeho wobydlerjam.
Wěnuje so tež Bohu
Mnichow (B/SN). Profesor Harald Lesch je wuznawacy protestant a moderator wědomostnych serialnych telewizijnych wusyłanjow kaž „Terra X“, „Leschs Kosmos“ abo „Frag den Lesch“. W swojich wusyłanjach je so tež hižo prašenjam „Mamy dušu?“, „Što je wosud?“ abo „Eksistuje Bóh?“ wěnował. Astrofyzikar Lesch wuwučuje na uniwersiće w Mnichowje přirodnu filozofiju.
Pomhaja bjezdomnym
Ruske truty na Kijew
Kijew (dpa/SN). Ruska je ukrainsku stolicu Kijew znowa masiwnje z trutami a raketami nadběhowała. Minjenu nóc bě po informacijach powěsćernje dpa sylny ropot kanonow słyšeć, kotrež lětadła wotwobaraja. Po ukrainskich informacijach je Ruska zdobom balistiske rakety zasadźiła, kotrež su w třoch měšćanskich wobwodach Kijewa škody zawostajili. W nocy na póndźelu bě Ruska dotal najwjetši nadpad z trutami na Ukrainu přewjedła.
„Compact“ před sudnistwom
Lipsk (dpa/SN). Zwjazkowe zarjadniske sudnistwo w Lipsku je dźensa znowa wo zakazu prawicarsko- ekstremneho magacina Compact jednało. W chwatnym rozsudźe běchu sudnicy zakaz loni w lěću nachwilnje zaso zběhnyli, tak zo móžeše časopis dale wuchadźeć. Nětko dyrbja doskónčnje wo tym rozsudźić. Bywša zwjazkowa nutřkowna ministerka Nancy Faeser (SPD) bě magacin 16. julija 2024 zakazała, mjenujo jón „centralny organ prawicarsko-ekstremistiskeje sceny“.
Wosom mortwych w šuli
Aktiwisća wupokazani
Šef BND warnuje před Ruskej
Berlin (dpa/SN). Prezident zwjazkoweje tajneje słužby BND, Bruno Kahl, před tym warnuje, ruske wotpohlady nastupajo zapad a NATO podhódnoćić. „Smy sej jara wěsći a mamy za to dopokazy tajneje słužby, zo je Ukraina jenož kročel na puću do zapada“, rjekny Kahl rozhłosownikam. „W Moskwje su ludźo, kotřiž njewěrja, zo artikl 5 wustawy NATO funguje. A woni bychu to rady wuspytali.“ Tutón artikl je centralny dypk kolektiwneho zakitowanja a rjaduje mjezsobnu pomoc w padźe nadpada.
Zaměr ruskeho nawodnistwa je, wliw kraja směr zapad rozšěrić. „Woni chcedźa NATO na staw, kotryž bě kónc 90tych lět, wróćo stłóčić“, Kahl rjekny. Wottrašenje je „njekrawny puć“, wójnje zadźěwać.
Moskwa a Kijew jatych wuměniłoj
Moskwa (dpa/SN). Ruska a Ukraina stej dalšu wuměnu jatych zahajiłoj. Na to běchu so zastupnicy Kijewa a Moskwy w direktnych rozmołwach spočatk měsaca w Istanbulu dojednali. Prěnju skupinu ruskich wojakow pod 25 lětami su z ukrainskeje wójnskeje jatby pušćili, zakitowanske ministerstwo w Moskwje zdźěla. Ukrainje su podobnu ličbu jatych přepodali. W Kijewje su tule informaciju wobkrućili. Ruscy wojacy su tuchwilu w Běłoruskej, hdźež jich lěkarsce přepytuja a zastaraja.
„Naši ludźo su zaso doma“, piše ukrainski prezident Wolodymyr Zelenskyj internetnje. Mjez nawrótnikami su nimo młodych wojakow tež zakitowarjo ukrainskeho města Mariupol, kotřiž běchu dlěje hač tři lěta w ruskej wójnskej jatbje. Wuměna jatych bě zazběh wjacorych akcijow tutoho razu.
W druhim kole jednanjow mjez ruskimi a ukrainskimi zastupnikami běchu so na wuměnu jatych a padnjenych dojednali. Pječa chcetej krajej hač do tysac jatych wojakow mjez sobu wuměnić.
Zawostaja jěry přisłód
Přemało městna za nakładna awta
Podstupim/Drježdźany (dpa/SN). Podłu němskich awtodróhow pobrachuja tysacy parkowanišćow za nakładne awta. Tole je po měnjenju Awtomobiloweho kluba Europa strašne wohroženje nadróžneho wobchada. Wot 15. apryla hač do 3. junija su w nadawku kluba ličili, kelko nakładnych awtow wječor wot 20.30 hodź. při awtodróhach parkuje. Při tym zwěsćichu, zo je předewšěm na južnym Berlinskim wobkruhu A10 a podłu A24 w Mecklenburgsko-Předpomorskej situacija wopak parkowacych awtow dla strašna.
Z wućeženjom 165 procentow je w Sakskej wosebje parkowanišćo Hornja Łužica sewjer při A4 negatiwnje napadnyło. Podłu A17 pola Drježdźan zwěsćichu 120 procentow wućeženja. „Wot 16 hodź. šoferojo wšědnje wo parkowanišća wojuja“, rjekny rěčnik předsydstwa Zwjazka nakładnych wozydłownistwow Dirk Engelhardt. Parkowanišća su wječor a w nocy masiwne přećežene a wobchad wotstajenych wozydłow dla zdźěla strašnje wohroženy. Tak steja nakładne awta na zajězdach, kiž na parkowanišća wjedu abo na parkowanskich płoninach, kiž su za wosobowe awta rezerwowane.
