Wokrjes přewza zamołwitosć
Najebać to, zo ma Zhorjelski wokrjes sam financielne ćeže, chce jako towaršnik tři chorownje w Běłej Wodźe, Žitawje a Habrachćicach dołhodobnje zachować. Tole podšmórny krajny rada dr. Stephan Meyer (CDU) minjeny pjatk w Zhorjelcu.
Zhorjelc (AK/SN). „Chcemy likwiditu stejnišćow chorownjow we wokrjesu zaručić. Lětsa steji za to po wobzamknjenju wokrjesneho sejmika dźesać milionow eurow k dispoziciji. W přichodnymaj lětomaj z financnym podźělom 20 milionow eurow ličimy. Tež za to trjebamy škitne naprawy“, wón wuswětli. Drje ma wokrjes sam financne ćeže, tola zachowanje stejnišćow chorownjow w Běłej Wodźe, Žitawje a Habrachćicach je za dr. Stephana Meyera nuzny winowatostny nadawk a zawěsćenje kwality medicinskeho zastaranja ludnosće. „Tole dyrbimy zawodnje a hospodarsce zamołwić“, krajny rada potwjerdźi.
Transformator do Choćebuza dojěł
To a tamne (28.05.25)
K jědźi poskićeja mjedwjedźe, kotrež přichodny čas we wobłuku wosebiteho programa w Słowakskej zatřěla. Tole zdźěla wobswětowe ministerstwo w Bratislavje. Wotstronjenje zatřělenych zwěrjećow we wotpowědnych zawodach je brojenje, ministerstwo argumentuje. Wšitke zatřělene zwěrjata, kotrež wuměnjenja spjelnja, móža k jědźi poskićić, „dokelž je mjaso mjedwjedźow słódne“.
Znowa je so dalši pospyt z nowej raketu miliardara Elona Muska nimokulił: Najwjetši hdy twarjeny raketowy system předewzaća SpaceX njeje swój zaměr docpěł. Raketa je drje porno předchadnikam swětnišćo docpěła. Při nawróće do zemskeje atmosfery pak je wona rozpadnyła. „Jako njeby lět hižo rozbudźowacy dosć był, je Starship tež hišće razantnu, njeplanowanu demontažu dožiwił“, předewzaće SpaceX zdźěla.
Knježerstwo: Strukturu za Serbow zesylnili
Sakske knježerstwo ma społnomócnjenu za serbske naležnosće – postupowanje knježacych pak je wjele prašenjow zbudźiło. Jedyn tydźeń je trało, doniž njejsu z ministerstwa za wědomosć, kulturu a turizm (SMWK) wotmołwy do redakcije našeho wječornika dóšli.
Drježdźany (SN/mb). Što čini nowa społnomócnjena Franciska Brechowa, štož dr. Madlena Malinkowa činiła njeje? Wšako je so dotalna społnomócnjena za serbske naležnosće w SMWK wšěm za Serbow relewantnym temam wěnowała. Wotmołwa Jörga Förstera, rěčnika ministerki za kulturu a turizm Barbary Klepsch, rěka, zo je Malinkowa serbske naležnosće mjez ministerstwami konkretnych składnosćow dla koordinowała, Brechowa budźe to stajnje z pomocu interministerielneje dźěłoweje skupiny činić.
Morjenje dale wuswětluja
Drježdźany/Łužnica (dpa/SN). „Grawoćiwy njeskutk nas šokěruje“, praji nan morjeneje młodeje žony, kotruž su w lěsu blisko Łužnicy před něhdźe tydźenjom nadešli. 21lětna rěkaše Emma a bydleše ze swojej maćerju w Drježdźanach. Na partijach w lěsu blisko wjeski je časćišo była, nan powěda. Wón znaje tež 16lětneho, kotryž je jeho dźowku morił: „Wón běše krótki čas jeje nowy přećel.“ Policija bě poslednje dny tež za swědkami njeskutka pytała. Namołwje su wjacori ludźo wotpowědowali a swoje wobkedźbowanja podali. „Jednotliwe pokiwy smy dóstali, tute nětko wuhódnoćimy“, praji rěčnik statneho rěčnistwa w Drježdźanach. Zastojnicy pak so dalšich pokiwow nadźijeja, zo bychu pad bórze wuswětlili.
Jasne nětko je, zo je młoda žona wukrawiła, po tym zo je skućićel wjackróć do njeje kłół. Identitu mordarja policija znaje, tola so bliže wo tym njewupraja. Jasne dale njeje, kak je so njeskutk stał, što běchu motiw a pozadki skućićela, kotryž je swój wopor znał. Młodu žonu chcedźa w swójbnym rowje w Magdeburgu pochować, zwotkelž wona pochadźa. Nan kaž tež bratraj a sotra tam bydla.
Wočakuja rusku ofensiwu
Kiew (dpa/SN). Ukrainski prezident Wolodymyr Zelenskyj Ruskej wumjetuje, zo přihotuje nowu wojersku ofensiwu. Njeje žanych pokazkow na to, zo so prezident Wladimir Putin zhromadnje ze swojimi sobudźěłaćerjemi na kónc wójny hotuje a diplomatiske rozrisanje chutnje pohonjuje, rjekny Zelenskyj w swojim wječornym widejowym poselstwje. „Nawopak, mamy dopokazy, zo wón nowe ofensiwne operacije přihotuje.“
Wjace dowěry nowej koaliciji
Hamburg (dpa/SN). Dowěra wobydlerjow Němskeje do noweho zwjazkoweho knježerstwa je po najnowšim woprašowanju wjetša hač při nastupje amploweje koalicije w lěće 2021. W reprezentatiwnym woprašowanju Opaschowskeho instituta za wuslědźenje přichoda rjekny 56 procentow woprašanych, zo maja wulku nadźiju do noweho knježerstwa CDU/CSU a SPD. Před štyrjomi lětami bě so 52 procentow pozitiwnje wo nowym zwjazkowym knježerstwje wuprajiło.
Israel zaso w Libanonje
Pomocnicy staraja so na dróhach Liverpoola wo zranjeneho, po tym zo ...
Žane brónje Israelej
Berlin (dpa/SN). Bywši předsyda frakcije SPD Rolf Mützenich je so za to wuprajił, Israelej hižo žane brónje njedodawać. „To móhł nětko zasadnje dobry rozsud być“, wón dźensa w interviewje ze sćelakom Deutschlandfunk zwurazni, předewšěm hladajo na tuchwilne postupowanje israelskeje armeje w Gazaskim pasmje. Zwjazkowe knježerstwo dyrbi z parlamentom wo tym wuradźować a na kóncu zwjazkowa wěstotna rada wo tym rozsudźi. Zwjazkowy kancler Friedrich Merz (CDU) je so wčera raznje přećiwo postupowanju Israela wuprajił. Na Europskim forumje sćelaka WDR w Berlinje wón wčera zwurazni, zo njerozumi, što israelske wójsko w Gazaskim pasmje čini. „Ja zaměr njezapřimnu. Ciwilna towaršnosć dale a bóle ćerpi, předewšěm minjene dny. To njehodźi so hižo z bojom přećiwo terorizmej wopodstatnić.“
Dźěłarnistwo žadanje spušćiło
Berlin (dpa/SN). Dźěłarnistwo IG Metall je hladajo na napjate hospodarske połoženje swoje dotalne žadanje za štyri dny trajacym dźěłowym tydźenjom spušćiło. „Štyri dny trajacy tydźeń z połnej mzdu njesteji aktualnje hižo na lisćinje žadanjow dźěłarnistwa“, rjekny předsydka dźěłarnistwa Christiane Benner nowinarjam. Přiwšěm wostanje tajke rjadowanje dźěłoweho časa zmysłapołne.
Hladajo na napjate hospodarske połoženje w mnohich wobłukach Benner na to pokaza, zo dźěłodawarjo sami dźěłowy čas přistajenych přikrótša – na kóšty přistajenych.
Při cyłoněmskim zawjedźenju štyri dny trajaceho tydźenja z połnej mzdu boja so předewzaća negatiwnych sćěhow za němske hospodarstwo. Při woprašowanju rjekny 94 procentow wšěch 823 woprašanych předewzaćow, zo bychu hospodarski potencial přisadźili. Nimale 70 procentow firmow rjekny, zo njebychu swoje nadawki spjelnić móhli a zo bychu mjezynarodnje zwisk k načolnym předewzaćam zhubili.
Nowy kurs Merza kritizuja
W rjadach SPD wobaraja so zběhnjenju wobmjezowanja němskich brónjow
Berlin (dpa/SN). Wot zwjazkoweho kanclera Friedricha Merza (CDU) připowědźene zběhnjenje wšěch wobmjezowanjow při zasadźenju němskich brónjow přećiwo Ruskej zbudźa kritiku SPD. Socialdemokratiski politikar za wonkowne naležnosće Ralf Stegner nima kročel Merza „za pomocliwu“. Nowinarjam wón rjekny: „Wšitko, štož wójnu rozšěrja, je wopačne. Lěpje by było, diplomatiske prócowanja zesylnjeć.“
Zastupowaca předsydka Zelenych Agnieszka Brugger porno tomu připowědź zwjazkoweho kanclera wita. „Wladimir Putin runje z nowej surowosću wšitke prócowanja wo měr a rozmołwy z bombami niči. By wulki zmylk był, tomu přihladować“, wona rjekny.
Merz bě wčera na Europskim forumje sćelaka WDR w Berlinje rjekł, zo za wot Němskeje dodawane brónje w Ukrainje hižo žane wobmjezowanja njepłaća, štož dalokosć zasahnjenja na ruskim teritoriju nastupa. To rěka, „zo móže so Ukraina nětko tež zakitować, z tym zo na přikład wojerske zepěranišća w Ruskej nadběhuje. To wona dotal w tutej formje njemóžeše“, Merz rjekny.
