To a tamne (06.03.17)
Skerje njezwučenu spansku městnosć je sej 25lětny w delnjofrankskim Sennfeldźe wupytał. Tak nańdźe jeho wohnjowa wobora wčera rano tři metry wysoko na hałzy štoma. Kaž so wukopa, bě wěstotny personal diskoteki młodeho muža sobotu wječor chětro wopiteho z lokala wuzamknył. Kak pak je so na štom dóstał, to muž wčera hižo njewědźeše.
Njezranjeny zražku z awtom přežiwił a samo hišće jako tak mjenowany slepy pasažěr sobu jěł je zajac w badensko-württembergskim Winnendenje. Šoferka jězdźidła bě sobotu na policajskim rewěrje njezbožo z dźiwinu přizjewiła. Jako zastojnicy awto wčera dokładnje za slědami přepruwowachu, nańdźechu zajaca za prědnjej storkawu, hdźež bě so zapopadnył. Skónčnje policisća jeho njezranjeneho wuswobodźichu a na městnje na swobodu pušćichu.
Generalej telefonowałoj
Moskwa (dpa/SN) Wodźacaj zastupnikaj ruskeho wójska a NATO staj prěni króć po wudyrjenju krizy Krimy lěta 2014 dla zaso kontakt nawjazałoj. Kaž zakitowanske ministerstwo w Moskwje zdźěla, staj šef generalneho staba Walerij Gerasimow a předsyda wojerskeho wuběrka NATO, čěski general Petr Pavel, wčera telefonowałoj. Tak rěčeštaj mjez druhim wo wuhladach wožiwjenja prawidłownych wojerskich kontaktow a wo tym, kak hodźało so hrožacym zražkam při wojerskich zasadźenjach zadźěwać.
Bydlenje kandidata přepytali
Paris (dpa/SN). Policija je Pariske bydlenje kandidata za zastojnstwo francoskeho prezidenta Françoisa Fillona přepytała, rozprawja francoska powěsćernja AFP. Konserwatiny kandidat ma mjerzanje z justicu, dokelž jemu wumjetuja, zo je swoju žonu a samo dwě dźěsći ze statnych srědkow za pozdatne sobudźěło płaćił, byrnjež wone scyła za stat njedźěłali. Nahladnosć Fillona mjeztym samo w swójskich rjadach woteběra. Cyły rjad politikarjow Republikanskeje strony jeho namołwja, kandidaturu cofnyć.
Gabriel chce Ukrainje pomhać
Po hroženju z bombu je policija dźensa radnicu města Gaggenauwa ...
Napjatosćeso dale přiwótřili
Němska zhromadnje zTuneziskej
To a tamne (03.03.17)
Wukubłanc Berlinskeje policije je z kradnjenymi wěcami wikował. Mjeztym wšak je suspendowany. Kriminalna policija bě jeho jako skućićela wuslědźiła, po tym zo bě w kantinje policajskeje šule pokradnjenu drohu kameru předać spytał a dalše kradnjene wěcy we wuwěšku poskićał. Jako ciwilnaj zajimcaj staj policistaj 20lětneho zajałoj, jako tón jimaj kameru na předań poskići.
Štóž so w sudniskej žurli zadźeržeć njemóže, dyrbi z chłostanku ličić. Wyše krajne sudnistwo w Oldenburgu je nětko rozsud hamtskeho sudnistwa w Leeru wobkrućiło. Žona wupraji jako swědka w jednanju, w kotrymž bě muž ranjenja ćěła dla wobskorženy. Jako toho bratr wupraji, so jemu žona stajnje zaso wótře směješe, komentujo jeho wuprajenja ze słowomaj „to njetrjechi“. Dokelž časćiše napominanja sudnicy njepomhachu, napołoži jej chłostanku 150 eurow.
Knobloch: Serbja dobry přikład
25. politiska popjelna srjeda sakskeje CDU w hali na Budyskim Třělnišću
Budyšin (SN/MkWj). Serbja su wčera wječor cyle njewočakowano w srjedźišću mjeztym 25. politiskeje popjelneje srjedy sakskeje CDU w Budyšinje stali, byrnjež jeno skrótka. Charlotte Knobloch, ně- hdyša předsydka Centralneje rady Židow w Němskej a čestny hósć wječora, pokaza na spočatku swojeje narěče na bohate tradicije Serbow, na přikład na křižerske procesiony a na měrniwe zhromadne žiwjenje Serbow a Němcow we Łužicy. Tole je jej hladajo na konflikty po wšěm swěće runjewon z přikładom a jónkrótne, „nimaja dźě Serbja maćerny kraj“. 84lětna Knobloch rozprawješe hosćom wo swojim wopyće w Budyskim Serbskim muzeju, hdźež bě jej nawodnica Christina Boguszowa wo našim ludźe rozprawjała.
Pozitiwnje „napadnył“ je wčera w hali na Budyskim Třělnišću tež Budyski młodźinski dujerski orchester: Wón přednjese w dobrej kwaliće medley serbskich spěwow, kaž „Hdźež so módrja, zelenja“, „Dźens je swjedźeń“ abo „Hančička wowčerjowa“.
Njewitany wustup ministra
Berlin (dpa/K/SN). Šef Lěwicy Bernd Riexinger raznje kritizuje, zo smě turkowski justicny minister Bekir Bozdağ w Němskej wustupić. Jenož někotre dny po zajeću korespondenta nowiny Die Welt Deniza Yücela w Istanbulu chce Bozdağ dźensa wječor w badensko-württembergskim Gaggenauwje syły swojich krajanow za to wabić, wuprajić so za zawjedźenje prezidialneho systema w Turkowskej. 16. apryla něhdźe 1,6 milionow „němskich“ Turkow wo tym sobu rozsudźi.
Kanclerka w Eyptowskej
Berlin/Kairo (dpa/K/SN). Zwjazkowa kanclerka Angela Merkel (CDU) je dźensa w Kairu z egyptowskim statnym prezidentom Abdelom Fattahom al-Sisijom wo móžnych rozrisanjach migraciskeje krizy rěčała. Hłowne dypki rozmołwy běchu domojpósłanje škita njepotrěbnych wosobow, polěpšenje žiwjenskich wuměnjenjow za nich w Egyptowskej, bój přećiwo pašowarjam ludźi kaž tež politiska stabilizacija Libyskeje.
Wopytataj němskich wojakow
Bjezdwěla wjeršk był
Iniciatiwa frakcijam plan předstajiła
Podstupim (SN). Delegacija Iniciatiwy za demokratisce legitimowane ludowe zastupnistwo – Serbski sejm bě zawčerawšim, wutoru, z hosćom frakcijow CDU, Lěwicy, Zwjazka 90/Zelenych a SPD w Podstupimskim krajnym sejmje.
Čłonojo iniciatiwy Hanzo Wylem-Kell (delnjołužiski rěčnik), dr. Andreas Kluge (Drježdźany) a dr. Měrćin Krawc (Budyšin) podachu hosćićelam přehlad k pozadkej, zo ma kóždy lud zasadne prawo na swójski parlament. Tomu wšitke frakcije přihłosowachu, skedźbnjejo tež na wólby Rady za serbske naležnosće w Braniborskej lěta 2015, kaž ze zdźělenki iniciatiwy wuchadźa. Runje tak mějachu wulke zrozumjenje za žadanje, zo měł parlament serbskeho ludu sam rozsudźić, kak so wot Zwjazka a krajneju sejmow Załožbje za serbski lud přewostajene srědki zasadźa.
Dale wuradźowachu wutoru wo kompetencach Serbskeho sejma w kulturnych, kubłanskich a politiskich naležnosćach.
