Zbrašenych na dźěle bóle wobdźěleć
Drježdźany (SN). Sakska socialna ministerka Barbara Klepsch (CDU) je sej składnostnje wčerawšeho Mjezynarodneho dnja ludźi ze zbrašenjemi wjetše zjawne wědomje za to žadała, jich bóle na dźěłowym žiwjenju wobdźěleć. „Woni su motiwowani a wukonići fachowcy, předewzaća měli tónle potencial bóle wužiwać“, rjekny wona wčera w Drježdźanach. Ludźo ze zbrašenjemi přeco hišće w samsnej měrje wot rozmacha na powšitkownych dźěłowych wikach njeparticipuja.
Tak je so ličba ćežkozbrašenych přistajenych wot 2005 hač do 2015 drje wo 45 procentow na nimale 42 200 zwyšiła, runje tak podwoji so jich podźěl na wšěch bjezdźěłnych na 6,2 procentaj, kaž sakske socialne ministerstwo zdźěli. „To pokaza trěbnu potrjebu jednać.“ Sakska spěchuje dźěłodawarjow, kotřiž tajke wosoby wukubłuja abo nowopřistajeja, we wobłuku krajneho programa přidatnje k prawidłownym wukonam a narěči firmownikow, so přistajenju tajkich wotewrjeć.
Wuchod trjeba pjenjezy EU
Wo přichodźe ratarstwa su ratarscy ministrojo wuchodoněmskich krajow rozmyslowali a za zhromadnu agrarnu politiku EU po lěće 2020 dźesać tezow zestajeli. Jich adresataj staj přisłušnaj čłonaj Europskeje komisije, budgetny komisar Günther Oettinger a agrarny komisar Phil Hogan. Podamy tule někotre wobsahowe ćežišća.
Wudawki za europsku agrarnu politiku wučinjeja něhdźe 40 procentow budgeta Europskeje unije. Brexita a dalšich nadawkow EU dla boja so ministrojo wobmjezowanja ratarskeho budgeta. Tohodla sej pominaja, financy za ratarstwo a wjesny rum dale zaměrnje zasadźić a sprawnje rozdźělić. „Přichodna zhromadna agrarna politika dyrbi tak wuhotowana być, zo jeje europsku nadhódnotu jasnje spóznawaš a zo ju towaršnosć jako wažny spěchowanski instrument zaznawa, kotryž tež zwonka ratarstwa skutkuje“, pišu ministrojo.
Domjace ratarstwo njeje narunajomne, wšako zaruča wone zastaranje z kwalitatiwnje wysokohódnymi cyrobiznami. To tyje sobu škitej klimy, wobwliwuje žiwjenje na wsy a skići powołanske šansy.
Postajenje za přechod
Sym podpisała, dokelž ...
... je mi wažne, zo so mjeńšinowe prawa w Europskej uniji zesylnja. Su-li tež wuměnjenja mjeńšin we wšelakich krajach jara rozdźělne, mamy zasadnje samsne zaměry a wužadanja. Rěčnu a kulturnu mnohotnosć w Europje zesylnić a skrućić je zaměr, wo kotryž dyrbimy zhromadnje wojować. Zo je zhromadne wustupowanje mjeńšin zmysłapołne a wuspěšne, pokazuje mjez druhim zhromadne dźěło mjeńšin na zwjazkowej runinje w Němskej! Iniciatiwa FUEN měła tuž tomu dopomhać, zo so spěchowanske programy EU mjeńšinowym rěčam přiměrja. Tuchwilne programy na polu kubłanja, medijow, kultury a młodźiny měli wuměnjenja małych ludow wobkedźbować, jim wobdźělenje a spěchowanje z europskich programow jednorišo spřistupnić.
To a tamne (04.12.17)
Dokelž je swědk naheho muža w kapałce widźał, je policija natutkany porik při jeho zetkanju myliła. Přichwatana patrulja zwěsći na chórje cyrkwički we Waldshuće-Tiengenje porik w starobje 29 a 27 lět, při čimž bě muž woprawdźe nahi. Kaž so pozdźišo wukopa, bu porik hižo krótko do toho při seksualnych jednanjach w kapałce tamnišeje chorownje lepjeny. Wězo dyrbještaj muž a žona cyrkej hnydom wopušćić a mataj nětko z pjenježnej pokutu ličić.
Američan Mike Hughes njespušći w žanym padźe swój plan, ze samotwarjenej raketu do swětnišća lećeć. Kaž tamniša telewizija Fox 5 rozprawja, móhł wón swój eksperiment snano dźensa wotměć. 61lětny wunamakar a stuntman je swoju samospaslenu raketu na priwatnej ležownosći w małym Amboyju w kaliforniskej pusćinje Mojave natwarił.
„Jasne wuznaće wobydlerstwa k žiwej demokratiji“
Krajny sejm Schleswigsko-Holsteinskeje je lětsa wobzamknył, podpěrać wobydlersku iniciatiwu Federalistiskeje unije europskich narodnych mjeńšin (FUEN) Minority SafePack. Zdobom wupraja so parlament zwjazkoweho kraja, w kotrymž sydla z Frizami, Danami w Němskej a Sintami a Romami hnydom tři w Němskej připóznate narodne mjeńšiny, za lěpši škit mjeńšin. Ministerski prezident Daniel Günther (CDU) wobydlerjow tehdy namołwi, so na podpismowej akciji FUEN wobdźělić. Serbske Nowiny su z nim wo iniciatiwje rěčeli.
Sće iniciatiwu hižo podpisał?
D. Günther: Haj. Tež krajne knježerstwo Schleswigsko-Holsteinskeje Minority SafePack podpěruje a je w juliju na swojej internetnej stronje namołwu wozjewiło ju podpisać. Nimo toho smy na našej internetnej stronje zarjadowali wotkaz k online-portalej iniciatiwy. Štóž so za mjeńšinowu politiku w našim kraju zajimuje, toho tež wo akciji FUEN awtomatisce informujemy.
Serbja w Němskej maja porno druhim mjeńšinam w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?
Zhromadne dźěło w fokusu stało
Brüssel/Budyšin (SN/JaW). Mjeńšinowe gmejny a rěčne mjeńšiny a jich móžne zhromadne dźěło stejachu w srjedźišću wčera a dźensa wotměwacych so diskusijow zastupnikow Federalistiskeje unije europskich narodnych mjeńšin (FUEN) a Europskeho wuběrka regionow w Brüsselu. Serbow zastupowaše na wuradźowanju pod hesłom „Sylnje w regionach zakótwjene – Mjeńšinowe gmejny a rěčne mjeńšiny w regionach EU“ předsyda Domowiny Dawid Statnik.
Kaž Budyski zarjad třěšneho zwjazka w nowinskej informaciji medijam zdźěla, je so Dawid Statnik dźensa na podijowej diskusiji na temu „Nowowusměrjenje prioritow – róla mjeńšinowych zhromadźenstwow a rěčnych mjeńšin w demografiskej změnje a w hranicy překročacym ekonomiskim a socialnym wuwiću“ wobdźělił. Tam rozjimachu mjez druhim móžnosće zhromadneho dźěła mjeńšinowych regionow, tworjenje bi- a multilateralnych partnerstwow kaž tež móžnosće Europskeje unije, tajke projekty financować.
Přizwolenja zapodała
Brüssel/Frankfurt (dpa/SN). Lufthansa je po informacijach wubědźowanskich dohladowarjow EU krótko do termina korigowany namjet za wotpohladane přewzaće Air Berlina zapodała. Doba za rozsud podlěši so tuž hač do 21. decembra, zdźěla dźensa Brüsselski zarjad. Njemjenuje pak žane detaile k namjetam Lufthansy. Frankfurtski DAX-koncern chce z dźělnymaj towaršnikomaj LG Walter a Niki za 210 milionow eurow nahladny dźěl Air Berlina z 81 jetami a k tomu słušacymi lětanskimi prawami přewzać.
Němska wotćehnje diplomata
Berlin (dpa/SN). Reagujo na najnowši raketowy test Sewjerneje Koreje Němska swoje diplomatiske styki z wuchodoaziskim krajom wobmjezuje. Wonkowny minister Sigmar Gabriel (SPD) je na wopyće we Washingtonje připowědźił, zo němskeho diplomata – nic pak wulkopósłanca – ze stolicy Pjöngjanga wotćahnu. Zdobom bu Sewjerna Koreja namołwjena, sobudźěłaćerja swojeho wulkopósłanstwa w Berlinje wróćo zwołać.
Orbán da ludźi wobstražować
Bamž wabi wo pomoc ludej Rohingya
Dhaka (dpa/SN). Bamž Franciskus je mjezynarodne zhromadźenstwo migraciskeje krizy ludu Rohingya dla namołwił, spěšnje jednać. Njeńdźe jenož wo to, rozrisać politiske prašenja, kotrež su přesunjenje masow ludźi zawinowali, rjekny pontifeks wčera w stolicy Bangladesha Dhaka, bjez toho zo by muslimsku mjeńšinu direktnje mjenował. Franciskus sej zdobom pominaše, Bangladesh materielnje podpěrać. Dźensa je so ze zastupjerjemi Rohingyajow zetkał.
Ze zwjazkoweho stata Rakhine w Myanmarje su statysacy přisłušnikow Rohingya do Bangladesha ćeknyli. Zjednoćene narody rěča wo „etniskim čisćenju“. Krizu maja za sobu najwjetšu humanitarnu katastrofu swěta.
Wulka Britaniska ludźi z EU hižo tak njewabi
London (dpa/SN). Dźeń a mjenje wobydlerjow Europskeje unije dźe do Wulkeje Britaniskeje, zo bychu tam dźěło našli. To wuchadźa z najnowšich trochowanjow britiskeho zarjada za statistiku ONS.
Po wotumje za brexit je drje loni 230 000 ludźi wjace zapućowało hač wupućowało, bě pak to 100 000 mjenje hač w lěće 2015. Wjace hač tři štwórćiny z toho su ludźo z Europskeje unije. W dwanaće měsacach hač do junija 2016 bě 130 000 dźěłopytacych z EU přišło, lěto po tym bě jich jeno 74 000. W samsnym času je ličba staćanow EU, kotřiž su Wulku Britanisku wopušćili, jasnje wot 95 000 na 123 000 přiběrała.
