Lubosć k blišemu w srjedźišću konferency stała
Budyšin (SN/mwe). Wot pjatka do njedźele wotmě so w hali na Budyskim Trělnišću nadkonfesionalna konferenca Momentum. Na njej wobdźěli so 13 swobodnych křesćanskich wosadow, kotrež su tež jako powšitkownowužitne towarstwa Budyskeho wokrjesa zapisane. Hosćićelka zarjadowanja bě Budyska wosada Jozuwy. Něhdźe 600 přewažnje młodych ludźi z Budyšina, Ochranowa a wokoliny, z Wojerowskeje kónčiny, Kodersdorfa, Lubija, Žitawy a Běłeje Wody zwurazni na zarjadowanjach we wobłuku Momentuma swoje wěrywuznaće, zo bychu Bohu a jeho synej Jězusej hołdowali.
Pod hesłami kaž „Lubosć Wumóžnika je triumfowała“, „Kaž wón tež ja z rowa stanu“ abo „Jězuso, dźakuju so, zo sy nas wumóžił a zo njejsmy hižo winicy“ so holcy a hólcy druhdy samo hač do ekstazy spěwajo modlachu. K tomu běchu sej tež rěčnikow a prědarjow, mjez druhim ze Šwicarskeje, přeprosyli, prědowacych jim požadosć za „darjenjom, wodaćom abo sebjepytanjom bjez hrěcha“.
Tilich: Zahubny signal za Łužicu
To a tamne (02.05.17)
Kuriozna zwada wo předań praženych kołbaskow při płoće awtodróhoweho parkowanišća durinsku justicu dale zaběra. Tuchwilu čakaja na rozsud Weimarskeho wyšeho zarjadniskeho sudnistwa, hač rewiziju přećiwo rozsudej prěnjeho sudnistwa dopušća. Mějićelka předawanskeje budki při A 9 jězdźerjam wozydłow mjeztym dale kołbaski a kofej poskića, a to přez dwaj metraj wysoki płót. Wotpowědny zakaz města bě sudnistwo w Gerje w prěnjej instancy wobkrućiło.
Problemowy baćon Ronny, kotryž bě loni braniborsku wjes Glambeck ze swojimi atakami terorizował, tam zaso je, kaž wjesna předstejićerka wobkrući. Loni bě wón z pyskom stajnje zaso do awtow a woknow dypał, hdyž so tam w špihelu widźeše. Naposledk wěšachu ludźo płachty před wokna, zo bychu so škitali.
Połčasna bilanca wostrózbja
Drježdźany (dpa/SN). Sakscy Zeleni su hladajo na dźěło knježerstwoweje koalicije CDU a SPD přesłapjeni. Po wulkich nadźijach, kotrež běchu so po znowazaćahu SPD do wot CDU nawjedowaneho knježerstwa jewili, bilanca wostrózbja, rjekny frakciski šef Volkmar Zschocke po połčasu legislaturneje doby. Tójšto dojednanjow z koaliciskeho zrěčenja njeje zwoprawdźenych. SPD wón wumjetowaše, zo so přećiwo CDU njepřesadźa.
Granaty rozbuchnjene
Baršć (dpa/SN). Na wotpadkowej deponiji njedaloko awtodróhi A 15 mjez Rogoznom a Baršćom su dźensa dopołdnja dźewjeć granatow ze swětoweje wójny rozbuchnyli, kotrež běchu před dnjemi při twarskich dźěłach namakali. Wotrězk awtodróhi bě za to něhdźe hodźinu zawrjeny. Třo wobydlerjo bliskeho wjesneho hotela dyrbjachu twarjenje wopušćić runje tak kaž dźewjeć dźěłaćerjow deponije. Tež płunowodaj běštej zawrjenej.
Prezident: Měr wobchować
Posedźenje bjez wuslědkow
Turkowska hłowna tema wuradźowanja
To a tamne (28.04.17)
Ze 37 lětami hižo 38 dźěći porodźiła je Ugandźanka Mariam Nabatanzi. Tole su zamołwići kraja oficialnje wobkrućili. Trójce bě žona dwójniki porodźiła, štyri razy trójniki a trójce samo štwórniki. Dźěći pochadźeja wot samsneho nana. Najstarše dźěćo je mjeztym 23 lět, najmłódše štyri měsacy. Swójba we wsy Kabimbiri, połsta kilometrow zwonka stolicy Kampala, bědźi so z pjenježnymi problemami. Regionalni politikarjo namołwjeja ludźi, swójbu podpěrać.
Krokodila na zahrodźe namakali su awstralscy wohnjowi wobornicy, jako w Darwinje palacy so dom hašachu. Swójba dźeržeše mjeztym 70 lět stareho a štyri metry dołheho rjapnika Alberta kaž domjace zwěrjo, samo z dowolnosću zarjadnistwow. Mjeztym zemrěty wobsedźer domu bě krokodila 1958 w rěce popadnył.
USA nět za diplomatiju
Washington (dpa/K/SN). USA maja wotmysł, na Sewjernu Koreju powjetšić diplomatiski a hospodarski ćišć. Tak chce prezident Donald Trump Pyongyang k tomu nuzować, zo swoje atomowe a balistiske rakety wottwari. Čłonojo knježerstwa USA namołwichu swojeje zamołwitosće sej wědome staty, sobu kročić po diplomatiskim puću a komunistiske nawodnistwo Sewjerneje Koreje pohnuć k deeskalaciji a dialogej.
Šulerjo budu wojersce kubłani
Waršawa (dpa/K/SN). Pólska chce přichodnje šulerjow wojersce wukubłać. Wiceminister za zakitowanje Michał Dworczyk rjekny, w kóždym z 300 wokrjesow nastanje poněčim znajmjeńša jedna wojerska šula. Hižo w septembru chcedźa na 50 šulach wotpowědny pilotowy projekt wupruwować. Młodostni změja wob tydźeń dwě hodźinje teoretiskeje wučby a k tomu trening na wojerskich zwučowanišćach. Hižo nětko wuknu wyši šulerjo z brónju wobchadźeć.
Zasah policije přećiwo policiji
Merkel warnuje London před iluzijemi
Berlin (dpa/SN). Zwjazkowa kanclerka Angela Merkel (CDU) je Wulku Britanisku hladajo na jednanja w zwisku z wustupom kraja z Europskeje unije před iluzijemi warnowała. „Stat zwonka EU, štož Wulka Britaniska budźe, njemóže samsne prawa kaž čłon Europskeje unije měć“, rjekny Merkel dźensa dopołdnja w zwjazkowym sejmje. „Mam zaćišć, zo maja někotři we Wulkej Britaniskej w tymle prašenju hišće iluzije. To pak je brojenje časa.“ W swojim knježerstwowym stejišću do wurjadneho wjerškoweho zetkanja brexita dla kanclerka potwjerdźi, zo měli so najprjedy wšitke wuměnjenja wustupa „na spokojace wašnje“ zrjadować. Hakle potom móhli wo poměrje k Londonej rěčeć, „a nic nawopak“. Dyrbja tuž wot wšeho spočatka wo financielnych winowatosćach Londona rěčeć. Přiwšěm budu poćahi dale „wuske a dowěrliwe“. Čłonojo EU chcedźa sobotu směrnicy za jednanje z Wulkej Britaniskej wo wustupje wobzamknyć. „Móžemy z toho wuchadźeć, zo rada 27 krajow sylny signal zhromadnosće do Londona sćele.“
To a tamne (27.04.17)
Přeswědčeny, zo je w swojim bydlenju, je so pjany muž dušował. Jako wobydlerka w badensko-württembergskim Mainhardće jeho wuhlada, zamkny so z dźěćimi do druheje stwy a zawoła policiju. Na prašenje zastojnikow, hdźe bydli, jim wopity rjekny: „Nó tule.“ Poněčim jemu switaše a wón so pola žony zamołwi. Muž bydleše někotre hasy dale. Do bydlenja žony bě so dóstał, dokelž njebě zamknjene.
450 eurow pokuty dyrbi němska turistka płaćić, dokelž je so w sławnej Trevi-studni w Romje kupała. Policisća běchu ju při tym lepili. Čehodla je 60lětna do studnje zalězła, kotraž bu přez nócne kupanje Anity Ekberg w filmje „La Dolce Vita“ swětosławna, dotal njewědźa. Turisća studnju stajnje zaso wužiwaja, zo bychu so spektakularnje prezentowali. Zamołwići města spytaja, kupacych z wysokimi pjenježnymi chłostanjemi wottrašić.
